Read Tobelo O YESAYA 52 Bible Online

O YESAYA 52 - Tobelo bible

O YESAYA 52

¹ Nomomiki, hei Yerusalem, nomomiki! Nakuata anihininga! Nomahinoa opakeanga imomulia. Hei Yerusalem, okota itebi-tebini, o nyawa yopese-peseke yowohamokauaoli yatilakuru aningorana maamo-amoko.

²Nomomiki okafoil̄e, hei Yerusalem, na parihi o kafo inita-taulika ngonaika. Nahohe orante imahiliko-liko anitomaruku, hei Sion manyawa initago-tagokino!

³Ma Jou watemo Aiumatika, ”Ngini inihukumu de kapö parahaja, ho öraha nënanga inihibebasi deka poparahajaoli.

⁴Mahira ngini nioiki o Mesirika deʼ nigogere dokengoka hokä o nyawa maporetino. Ipaha o Asyur initeo ngini koiwa mahohole.

⁵ O öraha nënanga okia Ahihidailako nenangokadau? O Babel manyawa inïtagoko ngini de hoko gënangadika. Onanga inïtuku ngini imaedenge deʼ hoko genangika ihihikauku Ngohi.

⁶Hababu gënanga ngini ahanimangaku Ngohi ma Jou Madutu, deʼ ma orahoka gënanga ngini ahanihiöriki Ngohi totö temo-temo nginika.”

⁷ Hokokia masanangi himake ohuhuloko woboa; ünanga wodagi watilakuru il̄öl̄oku-l̄oku deʼ woao o abari maoa, olola maabari, o halamati maabari mangale o Sion; wato, ”Ani Jou Madutu o Koano!”

⁸Noihene okota magogoana manga morene maböaka, önanga ima uli-ulili kamamoil̄e! Hababu de manga häeke malako mahirete önanga yamake ma Jou wolio o Sionika.

⁹Noma uli-ulili, hei Yerusalem madodoropaha, hababu ma Jou wälaru Aiumati deʼ wohi bebasi o Yerusalem.

¹⁰Ma Jou wohidumutu Aikuaha hagala o hoana mangalako mahimangoka. Done odunia ingodumu ahayahakihi ohalamati tongone nanga Jou Madutuino.

¹¹ Nioiki! Niamal̄a o Babel makota, hei ngini niao-ao ma Jou Madutu aitau mapakakaha! Uha niapeke okianaga ipese-peseke: nimagorakuwahi niatebinokahi niadiri.

¹²Ngini aha nimatai-taitua nioiki, deʼ hokä o nyawaua ihi oara manga diri. Hababu ma Jou ahawinituda ngini; o Israeloka manga Jou Madutu winihohongino ngini hagala o libuku.

¹³Ma Jou wotemo, ”Igou-goungu, Ahigilaongo ahawohasili; Unanga ahaiwi higiriri deʼ iwihikurutil̄e.

¹⁴Mahira manga ngöe o nyawa yatodokana iwimake Unanga, Airupa yatorou hiädono hokä o nyawaokaua

¹⁵ Mä öraha nënanga ohoana manga ngöe wadiai yoheranga, okokoano imamou karana yoheranga. Onanga ahayamake deʼ imangarati, kowahiohi de gënanga önanga ihiorikua.”