Read Tobelo O YESAYA 53 Bible Online

O YESAYA 53 - Tobelo bible

O YESAYA 53

¹ O hoana de oberera gënanga yohaluhu, ”O nagona yongaku aha okia ngomi miöihe-ihenoka? O nagonaika ihinyataoka ma Jou Aikuaha?

²Ma Jou womau Aigilaongo gënanga hokä o dori iwango o tonaka matore-toreil̄e. Koiwa naga mahohailoa Unangoka mangale ngone hipulono; koiwa yasanangi mangale ngone hï igo.

³Ngone hihikauku deʼ hihikurutika Unanga, o nyawa iwi omanga o hangihara deʼ biaha watagongo o hiri. Moiuaö yomau iwipulono Unanga, deʼ ngoneö hilegaikaua Unanga.

⁴ De madiai tongone nangapanyake watagongo, tongone nangahangihara watagongo mahangihara, ena hioko ngone hatobote Aihangihara gënanga ma Jou Madutu Aihukumanga Unangika.

⁵ Mä Unanga iwituduku karana tongone nanga baradoha, deʼ iwigohara karana tongone nangadorou. Unanga iwihukumu hupaya ngone inahihalamati, karana ai dinirihi ngone inahitogumu.

⁶ Ngone mata-mata hohihangika hokä o duba, moi-moi imalingiri mangekomo mahirete. Ma Jou wihitapal̄uoka Unangika tongone mata-mata nanga dorou.

⁷ Unanga iwihidiai de mahayanga koiwa, mä watagongo de aisabari. Unanga wahelengaua aiuru hokä o duba mangohaka yao ya toa-toakika ekola o duba maayo yakori magogo.

⁸Unanga iwitumunguku deʼ iwihukumu iwihohonenge. Aha moiua iwihaduli aiwowango; ünanga wohonenge karana tongone nanga hoana de nanga berera manga baradoha.

⁹ Unanga iwilungunu imakinïki o nyawa madorou; aijere onyawa kaya manga hidodogoronaka, ngaroka ünanga komaiwahi wodiai odorou, deʼ komaiwahi wotipu.”

¹⁰Ma Jou womau Unanga watagongo ohangihara, deʼ woma hilapahi aidiri hokä ohuhuba obaradoha magegehe. Done Unanga Aiumuru ikurutu deʼ wamake Aidifauku itilakuru Unanga ma Jou Aimau ahaidadi.

¹¹Karana gënanga ma Jou wotemo, ”Watagongo o huha de o hangihara ipahaino, Unanga aha woutumu deʼ wamao wosanangi. Ahigilaongo gënanga, wasanangi Ahihininga, watagongoka manga hukumanga onyawa manga ngöe; mangale Unanga Ngohi ahatahi apongo önanga.

¹² De Ai hininga mamau Unanga wohilapahi Aiwowango deʼ i wohama o gegetongo onyawa madorou. Unanga wamoku onyawa manga ngöe mangabaradoha deʼ womäniata önanga yahi apongo. Done tihidöaka Unanga onyawa mangöe hokä o hadia, deʼ Unanga wamake ohidoku kamamoi hagala onyawa yototiai.”