Read Tobelo O YESAYA 54 Bible Online

O YESAYA 54 - Tobelo bible

O YESAYA 54

¹ Yerusalem, mahira ngona hokä ongoheka mofaotua makunua mongohaka. Mä o öraha nënanga nomä uli-ulili, deʼ nonyanyi de ani morene! Hababu aningoha-ngohaka durukomanga ngöe, iholoi o ngoheka amingohaka womimal̄a-mal̄aua amirokata.

²Na amokika otau-tau nogogogere; nakurutu magumi-gumini deʼ nakuata mabebeloho-bebeloho!

³Ngona ahaidogo ilamokika onirakika deʼ ohigili, ani nyawa ahayogogere ohoana de oberera maago-agomo manga tonaka deʼ yoridi hagala okota oraha nënanga duru koha miridi.

⁴Uha nohawana, ngona ahainihimal̄ekua; ahainihikaukuua deʼ duru inimal̄eke. Ngona ahanawohanga anisatiaua maöraha nomä goikahi; nohininga okaua kanorïdika hokä obobao.

⁵Ani dodadi hokä orokata ngonaika, o Israeloka manga Jou Madutu wotebi-tebini ganga wonihihohalamati. Ma Jou Duru woKokuaha, gënanga Airomanga, Unanga ma Jou Madutu wäKokuaha odunia ingodumu.

⁶Israel, ngona hokä momatengo o hekatamagö amihininga ihuha karana womimal̄aika amirokata. Mä ma Jou woniahokokali ngona deʼ wotemo,

⁷”Duga-duga oöraha moi madekana ngohitonimal̄a ngona; de ahidora de ahihayanga itötotomo ngona tonil̄eokali.

⁸Kajai-jai dika ngohingonaoka de tomaidulu karana ahigangamo ihebu-hebulu. Mä de Ahidora ikokakali Ngohi tonïdora ngona.” Hoko gënanga wotemo ma Jou Madutu wonihihohalamati.

⁹ ”Hokä o Nuh aiorahoka Ngohi tojaji o taufani ahayaoluokauaoli o dunia hoko genangö öraha nënanga Ngohi tojaji Ngohi aha tongamoua ekola tinihiboditoli ngini.

¹⁰Ngaroka hagala ol̄oku deʼ hagala odoporono igiwi, Ngohi aha tomatogumua Tonïdora ngona. Ahidame majaji ahatasö salalu,” ma Jou wonidora-dora Aidemo.

¹¹ Ma Jou wotemo, ”Hei Yerusalem, o kota ibobodito, ngona nomasikaua deʼ koiwa anilolaru. Hagala anihohole ahatogelengaokali, de hagala ohelewo maija-ijaoka.

¹²Hagala obebeno omehele tohigoko odelima mahelewoino, hagala aningorana maago-agomo ogurasi de ohaaka ma helewoino, hagala anibebeno omehele oparamataino.

¹³ Mata-mata ahinyawa yodadi Ahimuri, önanga ahaolola mata-mata dema ënanga.

¹⁴Ngona inihigoko oadili mahohol̄e mal̄okuoka, inihikurutika de oborohono deʼ inituku.

¹⁵Nako ngona iniparangi, koigoungua Ngohitahuloko, nagona dika iniparangi ngona aha yäotaka.

¹⁶Ngohi tahidadi obehi yotututuku yodal̄o-dal̄oko ouku mangale yotutuku odae. Ngohiö tahidadi otentara, yapake odae gënanga mangale yotoma.

¹⁷Mä odae magetongo yatü tutuku mangale inihilawani ngona, ahaihasilua. Deʼ ogalaki magetongo ojuruhakimi magoronaka aha nohinyata ihowono. Ngohi aha tonihihadia outumu Ahigogilaongika,” hoko gënanga ma Jou wato.