Read Tobelo O YESAYA 55 Bible Online

O YESAYA 55 - Tobelo bible

O YESAYA 55

¹ Ma Jou wotemo, ”Niaino ngini mata-mata niakiriti madö dududungu, niokere o akere isadiaka. Niaino ngini koö iwa-iwa tingini niatiwi, niatarima o gandum koiwa mabobangu, deʼ niol̄omo! Oangguru deʼ osusu isadiaka, niatarima de mabobangu koiwa.

²Mangale okia niaija okianagamoi iniwedonua, deʼ nikarajanga mangale okia inihipunuhua? Niamoteke Ahipareta, done ngini ahaniol̄omo maoa-oa, deʼ niajame o hidiai mahemo-hemoro.

³ Ni ihene hei Ahihoana de ahi berera, niboa Ngohino, ngini aha Ngohi tinihidöaka ongango madutu. De o dora deʼ o satia Tohijajioka o Daudika, Ngohi taliko ojaji ikokakali dede ngini.

⁴I gou-goungu, ünanga Tihidadi otutuda deʼ okapita, Ahikuahaino mahakihi mangale ohoana de oberera maago-agomo.

⁵Ngini ahania ahoko ohoana deo berera maago-agomo maporetino, deʼ önanga de mangajapati yoboa nginika, de mangale Ngohi, o Jou nia Jou Madutu, o Israeloka manga Jou Madutu wotebi-tebini, hababu Ngohi tinïhimuliaoka ngini.”

⁶Nimaidulu ma Jouika maöraha kaniwi makeohi; nimahiböaka Unangika maöraha Unanga kawomahi tigi-tigi inohi.

⁷Kokiani onyawa madorou watiai aiwowango, deʼ wangali aipikiranga mangekomo. Mal̄aika ünanga womaidulu ma Jouika, hupaya wamake Ai dora de aihayanga. Kokiani ünanga woma idulu tongone nanga Jou Madutuika, hababu ma Jou wihiapongo de aihininga mamura.

⁸Ma Jou wotemo, ”Ahipikiranga tinginiua niapikiranga, deʼ Ahingekomo tinginiua niangekomo.

⁹Hoka magurutil̄e o dihanga de o dunia, hoko gënanga magurutil̄e Ahi pikiranga de nia pikiranga, deʼ Ahi ngekomo de nia ngekomo.

¹⁰ Hokä oawana iuti o dihangoka de yauku, deʼ ilio okaua, mä yapehaka odunia, yaburere de yawango idö dato-datomo, ihidöaka ohasili mangale ihibari-barihi deʼ iol̄o-ol̄omo,

¹¹hoko genangö o demo tahö heto-hetongo ilio okaua Ngohino de kaparahaja, mä ihasili imanarama okia tomau-mau, deʼ imämake hagala todungu-dungutu.

¹²Ngini ahaniamal̄a o Babel de niamorene, deʼ iningotaka nihupu de niahalamati. Ol̄oku deʼ odoporono aha imagarago deʼ imauli-ulili, hagala ogota odumuleoka ipopoka.

¹³O liwewuru mautu ahayatagali omomo irubu-rubu de ohihika, obunga madumule yatagali ohongana idoderemi. Genanga idadi hupaya Ngohi kaihi heto-hetongo; hokä ononako ikokakali ahaihihangua.”