Read Tobelo O YESAYA 56 Bible Online

O YESAYA 56 - Tobelo bible

O YESAYA 56

¹Ma Jou watemo Aiumatika, ”Nia manarama okia iadi-adili de imadaene de Ahitita. Hababu kabotino okahi Ngohi toboa tinihihalamati ngini de Ahiadili tohi nyata.

²Tahibarakati o nyawa yaganapu o Sabat mawange de yapesekua o wange gënanga. O nyawa yododiaiua o dorou aha Tahidiai de kaya oa-oa.”

³O nyawa maporetino imahi dogo-dogo de ma Jou Aiumati yakunua yotemo, ”Ma Jou wohihigumal̄aua ngohi tihuba Unanga mimakinïki Aiumati.” O nyawa imakokabiri yakunua yapikiri ”Ngohi takunua todadi ma Jou Ai umati manyawa, hababu ngohi takunua tamake odifauku.”

⁴Ma Jou watemo onangika, ”Nako ngini niohohininga o Sabat mawange, nako ngini nisetia Ahijajika de niadiai okia Ahihininga yasanangi,

⁵done niaromanga ahatohininga ahi Tau magoronaka de ahihoana de ahiberera manga hidogoronaka. Genanga iholoi yaoa ngaro de niangoha-ngohaka onau-nauru de ongongoheka. Ngini Tinihidöaka oromanga ikokakali aha Tawohangua.”

⁶Ma Jou watemo hagala onyawa maporetinoika yowö woha-wohamoka ogegetongo ma Jou Aiumati, iwihohininga ma Jou de iwipuji-puji Unangika, yahohoromati o Sabat mawange de yosetia Aijajika,

⁷ ”Ngini aha Tiniao o Sionika, Ahidoporono itebi-tebini, de tinihidöaka omorene Ahipuji matauoka. Hagala ohuhuba ngini nihihö huba-huba Ahihuhuba mangïoka aha Tatarima. Ahitau ahayahetongo oniata matau mangale hagala ohoana de oberera.”

⁸Hoko nënanga wato ma Jou Duru woko Kurutil̄e wängotaka o Israel wahigilio otabuangino, ”Ngohi ahataao hagala onyawa mahomoa mangale imahidogo dede önanga imatotoomuinoka.”

⁹Ma Jou wahuloko ohoana de oberera maago-agomo maporetino yoboa hokä o aiwani ihohatera mangale yakaboto Aiumati.

¹⁰Ma Jou wato, ”Ahihoana manga tutuda-tutuda ganga onyawa yopilo-piloko! Onanga okia-kiaua ihiöriki. Onanga hokä okaho imou ilaupa, mä imaidu dika de inanere. Onanga duru yosanangi imaidu!

¹¹Onanga hokä o kaho ikokal̄il̄u komaiwa yapunuhu. Hagala otutuda gënanga yakunua imangarati. Moi-moi yodiai manga hininga mahuka de yolingiri manga utumu mahirete.

¹²Yadö dalu-daluku gënanga yotamo, ’Niaino ngone hokere oangguru de hokere homahi gogihounika! I yarehe aha iholoi yaoa ngaro de owange nënanga!ʼ ”