Read Tobelo O YESAYA 57 Bible Online

O YESAYA 57 - Tobelo bible

O YESAYA 57

¹Onyawa maoa de manga wowango itebi-tebini yohonenge, de koiwa imangarati ekola yohohininga. Yohonengoka, önanga yootana de obodito de imahi batongo de madame.

³Mä ngini, ohoana de oberera nibobaradoha, niboa mangale ini juru hakimi! Ngini iholoiua yaoa ngaro de yogogumatere, yo howo-howonö de manga diri yahuku-hukunu!

⁴O nagona ngini niagogiete? O nagona ngini niahohedu? Koigoungua ngini yototengeluku manga difauku de yototalawani?

⁵Ngini niahuba hagala iboburere magikiri de niamal̄aika niadiri ihidatao onahihu nia puji mangï madebi-debini magota-gota matimiuku. Ngini niajere niangoha-ngohaka ongairi mawaioka, ohelewo madonga-dongaka.

⁶Hoʼ i patutu ngini niatoomu hagala ohelewo manou-nouhu genangino. Genanga niahidoku! Hagala ohelewoika gënanga ongini nioguhe o angguru de nihihuba ogandum. Niatobote Ngohi tosanangi de mata-mata gënanga?

⁷Ngini nioiki ol̄oku ma tubu-tubuika mangale nihi huba ohuhuba de nihiaiki nianahihu ikokiria.

⁸Ngini nihi pake niadulada-dulada ipese-peseke niatau mangorana madudukuroka. Ngini nihimal̄aoka Ngohi. Ngini nima ngaiki nia pakeanga de nidoa niadangiril̄e yawö woa-woata onyawa nia igo-igo ngini nia hewa mangale himahikidu, daha nihiaiki nianahihu.

⁹Ngini niapake ominya de mabounu ihemo-hemoro, daha nioiki niahuba o gikiri oMolokh. Ngini niahidingoto niahuhuloko-huhuloko hagala o berera magogurutika, hiädono onyawa yohone-honenge manga duniaika.

¹⁰Nianganono itoakua ngininimahikokangela nialingiri hagala ogikiri. Ngini niatobote önanga yakunu inihi döaka ngini obuturungu mahungi, hiädono ngini idadiua inï bole.

¹¹Ma Jou wotemo, ”Onagona hagala ogikiri gënanga inïdiai ngini nihawana, hiädono ngini ni eluku de nihihiningaua Ngohino? Boteka ngini nihi hubaokauaoli Ngohi karana Ngohi duru madekana Tomariridoka?

¹²Mä Ngohi tinihingahu nginika; nia wowango madebi-debini gënanga madutua, de mata-mata niamanarama ibaragunaua nginika.

¹³Nako ngini nimahi boaka, mal̄aika odulada-dulada gënanga inihihalamati ngini! Onanga ahayohihanga yahi haili ohidal̄oko de yobinaha de moi owomaha mawuwu! Mä o nyawa ima hohohongo Ngohino ahayapuhaka oberera gënanga de ihihuba Ngohi ahiTauoka.”

¹⁴Naga yotemo, ”Niadiai de nihidiai ongekomo mangale Ahiumati, nihititoko hagala odagahanga.”

¹⁵Hababu hoko nënanga wato ma Jou Madutu Duru woko Kurutil̄e de wotebi-tebini, wokuaha mangale kahi ado-adonika, ”Ngohi togogere ongï magö gurutil̄e de madebi-debinoka, mä mangahidogoronaka öhagala onyawa mangahininga itotipokouku, de imatoduba hagala mangabaradoha, mangale ihigilioli mangabuturungu de toonanga manga nganono.

¹⁶Mangale kahi ado-adonikaua Ngohi tahihowono Ahiumati; mangale hokogenangikaua Ngohitängamo, hupaya önanga uha mangabuturungu itobiki, enahioko Ngohi tahiwango önanga.

¹⁷Toönanga manga baradoha kal̄il̄u ihidiai Ngohitongamo, hababu gënanga önanga yähukumu de Tamal̄aika. Mä önanga mangahaeke yatogowini de kahirahi imängiriki mangangekomo mahirete.

¹⁸Ngohi tamakeoka toonanga manga kalakuanga, mä önanga ahao tahitogumuaika. Ngohi ahatätuda de täriwo önanga de tälaru onyawa manga hininga ihuhuha.

¹⁹ Ngohi ahatahi döaka odame onyawa mata-mataika, yaoa itigi-tigino yaoa ikokurutika. Ngohi ahatahi togumu Ahiumati.

²⁰Mä onyawa madorou ganga hokä ongöto yomoku-moku de komaiwa la irïdi. Mabauhu yao owal̄e de opeseke.

²¹ Koiwa odame mangale onyawa yobobaradoha,” ma Jou wato.