Read Tobelo O YESAYA 58 Bible Online

O YESAYA 58 - Tobelo bible

O YESAYA 58

¹Ma Jou wotemo ”Nopöaka noma kua-kuatil̄e! Nahi ngahu Ahiumatika hagala toönanga manga baradoha.

²Onanga ihihuba owange ihigetongo, deʼ yoigo ihiöriki Ahimau, matero-tero önanga yodiai maoa-oa, deʼ yosatia Ahititaika. Onanga yotemo önanga yosanangi ihihuba Ngohi deʼ yoigo Ahitita iadi-adili.”

³Ohoana de oberera gënanga yoleha, ”Okia mabaraguna hopuaha nako ma Jou wonamakeua? Okia mabaraguna ngone homahi poluluku nangadiri nako Unanga wonahiningaikaua?” Ma Jou wotemo, ”Igou-goungu, magogiriaka ngininipuaha, ngini nilingiri niautumu mahirete deʼ niateo hagala niahewa manyawa.

⁴Nipuaha magogiriaka, ngininimateke ributu deʼ nimakangamo deʼ nidiai de mabuturungoka. Niatobote madodagi ngininipuaha ihikelu Ngohi tohigihene hagala nianiata?

⁵Nako ngininipuaha; ngini niahangihara niadiri; ngininiaponuku niahäeke hokä omomo mahoka. Ngini niahoheika ongoere okarongo deʼ niaburarahika o kafo, deʼ nimarubaiha mal̄okuoka. Genanga ngininiahetongo niapuaha? Niatobote Ngohitosanangi de niamanarama gënanga?

⁶Nenanga o puaha tomö mau-mau. Niapidili oliliko orante niatuku deʼ niamomoku iadi-adili, deʼ niahibebasi hagala onyawa niatö tuku-tuku.

⁷ Nihikodoku niainomo de onyawa yahahahini, niatarima o nyawa yohuhuha niatauoka. Niahidöaka opakeanga o nyawa kamanga heko-hekonoka, deʼ uhaniatila niariadodoto yopoparalu ororiwo.

⁸Done odararono aha imulaenge inidararono nginika hokä ibatingoka, deʼ nianabo-nabo ahamajapati itogumu. Ngohi ahatinitomoteke mangale Tinihihalamati ngini. Ngohi naga ahatini hohongino ngini hagala olibuku.

⁹Nako ngininimahi böaka Ngohino, Ngohi aha tinibaluhu. Uhali niatuku nimahi kokanyawa, niamal̄a nimätekehaturu deʼ o romanga madorou nidodiai.

¹⁰Nia hidöaka oinomo o nyawa yahahahinika deʼ niariwo hagala onyawa yatö tuku-tuku. Nako ngini nidiai hoko gënanga, done ohuhutu inihigogilolitino ahaidadi kaimatero madararono owangeoka.

¹¹Ngohi aha salalu tinituda ngini deʼ tinipunuhu ngini otonaka madudungoka; Ngohi ahatinigoana ngini hupaya kahirahi nitumuloa deʼ nikuata. Ngini aha hokä o dumule iyaoaka maakere malako komamoiuahi iowaha.

¹²Okota madekanoka idadi magilianga ahangini nihigokookali mahohole ihira-hira mal̄okuoka. Ngini aha inihetongo ’O hoana de oberera ihigö goko-gokookali hagala obebeno omehele deʼ ihidiai hagala otau iwo wede-wedere.’ ”

¹³Ma Jou wotemo, ”Niahoromati o Sabat mawange hoka o wange mangale ma Jou. Uha nihidailako niaparalu mahirete mawangeoka gënanga. Nihimulia owange gënanga hokä outumu mawange; niahoromati ma Jou Aiwange de nitatagiua; uhaö nikarajanga ekola nitemo ipoparahaja.

¹⁴Done ngini ahanimorene karana nima higilaongo Ngohino. Ngohi ahatinidiai ngini de niahoromati odunia yamode-modekika. Ngini ahaniwango nisanangi de o Yakub ai puhaka matonaka mahasili, niaete de niatohora. Ngohi, o Jou totö temo-temoka.”