Read Tobelo O YESAYA 6 Bible Online

O YESAYA 6 - Tobelo bible

O YESAYA 6

¹ Ma koano Uzia wohonenge mataongo magoronaka, ngohi timake ma Jou. Unanga wogogeruku Ai pareta makuruhi ikokurutil̄e deʼ imomulia mal̄okuoka. Ai juba yatamunuku ma Jou Ai Tau i ngodumu.

²Yakilolitino imaokoino o dodadi-dodadi mamodokara hokä o uku, moi-moi toënanga magahuhu butanga. Magahuhu hinoto ihi tamunu mabiono, hinoto ihitamunu maröehe, deʼ magahuhu hinotoli yapake mangale ihoho.

³Onanga imakoböaka moi de moika: ”Wotebini, wotebini, wotebini. Wotebini o Jou Wokokuaha. O dunia iomanga Ai boa imomulia.”

⁴Toönanga manga ilingi yadiai ma Jou Ai Tau mahohole i hahara, deʼ ma Jou Ai Tau gënanga mahirete iomanga o nofo.

⁵Daha ngohi totemo, ”Tobodito! Koiwaka o nganono ngohioka, hababu ahiuru ipeseke karana o baradoha, deʼ ngohi togogere o nyawa hokogenangoli manga hidogoronaka. Ngaro hokogënanga, de ahihäeke malako mahirete ngohitimakeoka ma Koano, o Jou Duru Woko kuaha!”

⁶Ipaha imatengoani o dodadi gënanga ihoho ngohino iao o uku mangaboho yal̄öl̄el̄e deo kakatama o huba mangïino.

⁷Ihitigi tongohi ahiuru makai deo uku mangaboho gënanga deʼ itemo, ”O ngaboho nënanga yatigioka aniuru makai. Oraha nënanga anihowono ieheoka deʼ anibaradoha ma Jou wohiapongoka.”

⁸Daha ngohi toihene ma Jou Ai ilingi wotemo, ”O nagona aha tahuloko? O nagona aha yodadi yoö ao-ao tongone nanga abari?” Ngohi tohaluhu, ”Nenanga ngohi. Nohihuloko ngohi!”

⁹Daha Unanga wohihuloko ngohi toiki tao obehehongo nënanga o umatika: ”Ngini aha hokogenangika niihene, mä nimangaratiua. Ngini aha hokogenangika niohohininga, mä nihi örikua okia i dödadadi.”

¹⁰Daha Unanga wohitemo ngohino, ”Nabongono hagala o nyawa gënanga manga dibanga, natopongono manga ngauku deʼ napiloko manga lako, hupaya önanga uha imahioriki, imahihene ekola imangarati, daha imaidulu Ngohino deʼ idadi yotogumu.”

¹¹Ngohi toleha, ”Hokokia madekana o hali nënanga aha i gila-gila Jou?” Wohaluhu, ”Hiädono hagala o kota idadi kamagilianga koiwa madol̄a, hagala o tau koiwa yogogeroli, deʼ o tonaka idadi ihomoa deʼ itoongoro,

¹²hagala o kota manyawa gënanga aha Taduhu o ngï ma gogurutika, hiädono o tonaka yomode-modekika kairïdika.

¹³Ikali nako o nyawa yangimoi manga hidogoronaka nagaohi womatengo wogogere o bereraka gënanga, ünanga aha iwibinaha. Mä hokä o waringi mautu nako yatol̄anga kanagahi maagere, hokogenangö aha kanagahi mahou o hoana deo bereraino gënanga idadi mamulaenge umati itebi-tebini.”