Read Tobelo O YESAYA 60 Bible Online

O YESAYA 60 - Tobelo bible

O YESAYA 60

¹Nomomiki deʼ nodadi o dararono, hei Yerusalem, hababu anihalamati madararono iboaka; ma Jou Madutu wonitararono ngona de Aimulia.

²O dunia yakilolitino ohuhutu, o hoana de o berera maago-agomo yatamunuku ohuhutu; mä ma Jou Aidararono ipotoka nginil̄e, Aiboa masahaya idadi inyata nginioka.

³O hoana de o berera maago-agomo yoboa yotuo-tuono nia dararonika, o kokoano yatauru mangale osahaya ipopotoka nginioka.

⁴Niolega okia idödadadi inïhigilolitino; okawaha imatoomu mangale yolio nginika. Niangoha-ngohaka onauru magurutoka de yaino, niangoha-ngohaka ongoheka yätai.

⁵Namake gënanga ngona noheranga deʼ anibiono imore-morene; ngona initora deʼ anihininga ilamoko. O hoana de oberera maago-agomo manga arata yao ngonaika, okaya ongöto mahonongaka deyaino de maboboloi ngonaika.

⁶Ani berera ihidoomuino mangöe o unta, ënanga iboa o Midianino deʼ o Efaino. O Syebaino o nyawa yoao o gurasi deʼ o manyanyi, ikali ihigiriri ma Jou Aimanarama.

⁷O Kedar makabingi de maduba yaongonaika o duba manauru o Nebayotino isadia mangale nia puji. O huba gënanga yasanangi ma Jou Aihininga Unanga wakaramata ai Tau iomanga omulia.

⁸Boteka gënanga ihaili hokä o lobi hokä onamodara magogiria ihoho ilio?

⁹Genanga hagala o kapa iboa imatapu yaoa ma Jou Madutu Ai umati yolio, o berera magogurutoka de yaino. O haaka deʼ gurasi ihikinïki yaomangale iwihigiriri ma Jou ani Jou Madutu; mangale o Israeloka manga Jou Madutu Duru Wo Tebi-tebini, yadiai Aiumati iwihoromati.

¹⁰Ma Jou watemo o Yerusalemika, ”O nyawa maporetino ahaihigoko okali anibebeno omehele, deʼ okokoano ahainïleleani. Mahira Ngohi tonihukumu ngona Ahidohata magoronaka, maöraha nënanga Ngohitoigo tonïdora.

¹¹ O hutu de owange aningorana maamo-amoko ahaihelengaika, hupaya o hoana de o berera maago-agomo mangakaya yakunu inidohata ngonaika, de toönanga mangakokoano hokä odagokino.

¹²O hoana de oberera deʼ opopareta yoluku imahigilaongo ngonaika, ahayobinaha deʼ yohihanga kamamoiuku.

¹³O Libanon mahongana imahi amo-amoko ahayao ngonaika oberangan magota mautu, oliwewuru deʼ o eru mangale ihidadi ahi Tau ikaramati deʼ yahailoa ongï Ngohi tomahi doko-doko.

¹⁴ Ini tuku-tuku manga ngoha-ngohaka yoboa yatilakuru, mamoi iböto inihikauku ngona ahaimaponu, ngona ahainihetongo ma ’Jou Ai Kota’, ’o Sion, o Israeloka manga Jou Madutu wo Tebi-tebini ai Kota’.

¹⁵Ngona ahainimal̄aikaua deʼ inï dohata, deʼ inimal̄aikaua idadi duru kanoridika, Ngona Tohidadi ani hininga elamoko ikokakali omorene mangï mangale kahiado-adonika.

¹⁶Ngona ahainipaliara ohoana de oberera maago-agomo deʼ o kokoano, hokä momatengo oayo mapaliara amingohaka. Done ngona nohiöriki, Ngohi ma Jou, tonihi hohalamati deʼ o Israeloka manga Jou Madutu wokua-kuata wonihibebebasi.

¹⁷Ngohi toao ogurasi hokä madagali otabaga, deʼ ohaaka hokä madagali o behi. Tohidoaka otobaga hokä madururu o gota, de obehi hokä madagali ogota. Ani berera aha Tadiai idame deʼ irïdi, deʼ yapareta dema adili.

¹⁸Aha koiwakaoli oabari mangale inidödobuturungu anibereraka, mangale iwedere deʼ ikilianga anidaeraka. Hokä obebeno omehele Ngohi aha tonigoana ngona, deʼ ngona ahanohihigiriri Ngohi hokä tonihihohalamati.

¹⁹ Ngona iparalua inidihiwara owange malako maöraha o wangeoka, deʼ iparalua inidararono omede maöraha ohutu-hutu. Hababu Ngohi ma Jou todadi odararono ikokakali ngonaika, Ngohi tonidihiwara ngona de Ahimulia.

²⁰Ngonaika ahanaga o wange malako komaiwahi itumunu deʼ o mede komaiwahi madararono ikuranga. Hababu Ngohi ma Jou todadi odararono ikokakali ngonaika, aniöraha nomahipake o duka manonako ahaipaha.

²¹Ani nyawa ahayodiai demadiai, önanga ahaimahitoönanga oberera mangale kahiado-adonika. Onanga hokä o jaga yatorika Tadatomo mahirete, mangale ihinyata Ahimulia.

²²Ikali otau manyawa maiteteke deʼ okiaua yadaene aha yodadi o hoana de oberera maago-agomo deʼ ikua-kuata. Ngohi ma Jou aha de majapati Tadiai, maöraha yakokorona.”