Read Tobelo O YESAYA 61 Bible Online

O YESAYA 61 - Tobelo bible

O YESAYA 61

¹ Ma Jou Duru woko Kurutil̄e ai kuaha naga ngohioka; Unanga wohiiriki deʼ wohihuloko ngohi mangale tao oabari maoa onyawa mihikinika deʼ tahitogumu onyawa mangahininga iwöwede-wedere; mangale ihingahu onyawa yatumu-tumungukuika önanga de majapati yahibebasi, deʼ hagala onyawaika obui magoronaka önanga aha yalapahi.

² Unanga wohihuloko ngohi mangale tohi abari maöraha iboaoka ma Jou wohihalamati; mangale walaru mata-mata yodö duka-duka, deʼ wabalahi hagala toönanga mangahaturu;

³mangale wahidöaka osanangi deʼ omorene onyawa manga hininga ihuhuhaika deʼ yapake-pake oduka manonako; mangale yangali toönanga mangahininga mahuha idadi o higiriri manyanyi. Onanga ahahokä ogota mautu wadatomo ma Jou mahirete. Onanga ahayadiai maoa-oa itotiai, hiädono ma Jou iwihimulia.

⁴Onanga ahaihigoko hagala okota madekanoka ikokilianga deʼ ihigoko hagala ongï madekanoka kai rïdika.

⁵Hei, Ahihoana, o nyawa maporetino ahainileleani ngini; önanga ahayogoana niaaiwani ogigini, deʼ yakarajanga niadumule ikali niaangguru madumule.

⁶Ngini ahainihetongo ma Jou Madutu Aigilaongo deʼ inihi romanga tongone nanga Jou Aiimam. Ngini ahaniajame ohoana de oberera maago-agomo manyawa manga kaya deʼ niamao niahininga ilamoko karana toönanga manga arata.

⁷Karana ngini niamakeoka omal̄eke higali mahinoto, deʼ ninoda ikali ohikauku idadioka niahidoku, done ngini niamake opuhaka ohigali mahinoto nia bereraka deʼ nimahitingini omorene ikokakali.

⁸Ma Jou wotemo, ”Ngohi duru toigo oadili deʼ todohata nima kutüku ikali odorou. Ngophi ahatohidöaka niahewa de osatia, deʼ tohiliko ojaji ikakali dede ngini.

⁹Niadifauku yanako okiaka honanga, de kaya heto-hetongo hagala ohoana de oberera manga hidogoronaka. Done mata-mata onyawa yamake ahaihigoungu, ohoana de o berera nënanga Tahibarakati.”

¹⁰ O Yerusalem yotemo, ”Ngohi tomorene karana ma Jou, ahi hininga imorene imagarago karana ma Jou Madutu. Hokä omol̄oka onauru deʼ ongoheka yapake oporomu i rupa-rupa mahohailoa, hoko gënanga ma Jou wohihinoa ngohino ohalamati deʼ outumu mabaju.

¹¹Hokä ogihihi ihi bari-barihi ahaiwango idadi idö dato-datomo, hoko gënanga oJou ma Jou Madutu wohiwango ohalamati deʼ mata-mata ohoana de oberera aha iwihigiriri Unanga.”