Read Tobelo O YESAYA 62 Bible Online

O YESAYA 62 - Tobelo bible

O YESAYA 62

¹Mangale o Yerusalem ngohi aha totemo, mangale o Sion ngohi aha tomariridua, hiädono ünanga wohihalamati deʼ aiutumu itararono hokä o oboro maöraha ohutu-hutu.

²Hei Yerusalem, ohoana de oberera maago-agomo yamake ani utumu, okokoano yapulono anikabaharanga. Ngona ahainihetongo de oromanga mahungi, ma Jou mahirete wohidöaka oromanga gënanga.

³Ngona nodadi hokä omakota mahohailoa ma Jou Aigiamoka, opopareta mamakota ani Jou Madutu Aigiamoka.

⁴Aniromanga koigounguaoli ini ’Dodogumal̄aika’, aniberera koigounguaoli ’Kai Rorïdika’, Ngona ahainihetongo, ’ma Jou Madutu woni Hö haya-hayanga’, deʼ ani berera wohiromanga, ’No Ko Kawi-kawingoka’, hababu ma Jou Aihininga yadaene ngonaika, Unanga hokä orokata mangale ani bereraika.

⁵Hokä womatengo ogoduru womä hekata o moholehe maboro, hoko gënanga anidodadi womahekata ngona. Hokä womatengo onauru omol̄oka womorene womimake ngoi hekata, hoko gënanga ma Jou Madutu ahawonisanangi ngona.

⁶O Yerusalem mabebeno omeheloka ngohi tahigogere yogö goana; ohutu deʼ owange önanga yakunua imarirïdi, mä kiani hokogenangika iwihininga ma Jou Madutu aijaji wadodiaiokaika.

⁷Onanga yakunua iwimal̄aika ünanga womarirïdoka wohigokoua o Yerusalem, deʼ iwihidadi kaiwi heto-hetongo odunia yamode-modekika.

⁸Ma Jou wajajioka de makoboto deʼ ahawadiai de Aikuaha: ”Ngohi ahatahidöakokaua nia gandum ohaturuika; onyawa maporetino aha yaokerokaua nia angguru ngini nihi hasi-hasili de niahuha de niakangela.

⁹Mä ngini niatotoomu iö utu-utuku aha nia ol̄omo mahasili deʼ niwi higiriri ma Jou; deʼ ngini niapö page-pagele oangguru mahohoko, ahaniaokere mateongo ahi Tau maloaoka.”

¹⁰O Yerusalem manyawa, yohupu yatilakuru ongorana ma amo-amoko, ihidiai ongekomo mangale hagala onyawa yolölio-lio. Niadiai ongekomo maago-agomo, nihititoko mahelewo, nihigoko opaji-paji mangale ohoana de oberera manyawa ma ago-agomo.

¹¹ Ma Jou wohidöaka obehehongo nënanga hagala o dunia malibukuika, ”Natemo o Sion manyawaika, ’Niwilega, ma Jou wohihohalamati woboa! Unanga iwinikino hagala onyawa wohi bebebasoka.’ ”

¹²Onanga aha yahi romanga: ’O Umati madebi-debini’; ’O Umati wahihohalamati ma Jou’. O Yerusalem aha yahetongo ’O Kota yasosanangi ma Jou Ai hininga’ ’O Kota kowa mal̄aikauaoli ma Jou’.