Read Tobelo O YESAYA 63 Bible Online

O YESAYA 63 - Tobelo bible

O YESAYA 63

¹ ”O nagona ünanga Wobö boa-boa o Bozraino o Edom matonakoka? aibaju madoka-dokara, aipakeanga mamokaramata; ünanga womadagi de aijako ipoputurungu.” ”Ngohi ma Jou takunu tohihalamati deʼ toboa toao o utumu ma abari.”

²”Yadodoa anipakeanga mamodokara gënanga, hokä oangguru mahohoko yohido-hidoro manga baju?”

³ ”Katomatengo Ngohi towohama oangguru yobido-bidoro mangï ika Ahiumati manga hidogoronaka koiwa ihiriwo Ngohi. O hoana de oberera maago-agomo manyawa Tadoko-doko Ahi gangamo magoronaka, hokä tadoko-doko oangguru mahohoko. Toönanga manga awunu ihoropu yapehaka Ahibaju, yapeseke Ahibaju yamata-mataika.

⁴Ngohi tohidatoroka mawange tabalahi, deʼ maöraha tahibebasi mangale Ahiumati.

⁵ Ngohitolingiri, mä koiwa ihïriwo, Ngohitoheranga koiwa ihibatumu. Daha Ahikuata mahirete ihiriwo Ngohi, Ahigangamo ihibatumu Ngohi.

⁶Ahi gangamo ihiru-hiru magoronaka, Tadoko-doko ohoana de oberera maago-agomo manyawa; Tabinaha önanga, deʼ toönanga manga awunu Takopoa otonakika.”

⁷Ngohi tomau tohiabari ma Jou Aidora deʼ tihigiriri Unanga karana hagala Aimanarama. De maboboloi Unanga wahibarakati Aiumati, karana Unanga aidora de aihayanga deʼ Aidora koipahaua.

⁸Ma Jou wotemo, ”Igoungu, önanga ganga Ahiumati, ongoha-ngohaka nanga mamao yahuhaua.” Done Unanga wodadi wahi Hohalamati önanga,

⁹Unanga mahirete iwibänga toönanga manga huha. Ma Jou wahidingotua Aihuhuloko ekola aiwakili; Unanga mahirete wahibebasi önanga karana aidora deʼ Ai hayanga. Unanga salalu wapaliara önanga maöraha kahuruonikahi.

¹⁰Mä önanga imalawani deʼ ma Jou Aihininga yahuha. Done Unanga womaidulu idadi toönanga manga haturu Unanga mahirete waparangi walawani önanga.

¹¹Daha önanga imahininga öraha mahira, maöraha o Musa, ma Jou Aigilaongo. Onanga yoleha, ”Kiaka ma Jou watuda Aiumati matutuda-tutuda yanonu ongöto? Kiaka ma Jou wohi doa-döaka Aikuaha onangika?

¹² Kiaka ma Jou widatekuku o Musa de Aigiama ikua-kuata de ipoputurungu, deʼ wabelaka oakere toönanga manga himangoka hupaya Airomanga kaya heto-hetongo kahiado-adonika?

¹³Kiaka ma Jou watö tuda-tuda önanga imadagi yanonu oakere ilö luku-luku? Hokä o kuda yanonu o tonaka makokakaha, önanga komaiwahi yopeleke.”

¹⁴Ma Jou wa ao önanga o dodogumu mangï ika, hokä o aiwani o gigini yao mangale ihi ol̄omo o tonaka malua-luasoka. Hoko gënanga watuda Aiumati, hupaya Airomanga ihimulia.

¹⁵Ya Jou, napulono ohorogaka de nauku, Anigogere itebi-tebini deʼ imomuliaino. Kiaka anidora deʼ Anibuturungu? Kiaka anihayanga deʼ Anidora? Uha natumungu gënanga ngomino.

¹⁶Koigoungu Ngona tongomi mia Ama? O Abraham deʼ o Yakub iminakoua ngomi. Mä Ngona ya Jou, ganga tongomi mia Ama, Nomihi hohalamati ngomi maöraha kahuruninohi.

¹⁷Ya Jou, yadodoa nomi mal̄aika ngomi mirehene? Yadodoa Ngona natogowini tongomi miahininga hiädono ngomi minï modongua Ngonaika? Noma idulu mangale karana anigogilaongo de mangale Aniumati, Anipuhaka madutu.

¹⁸Yadodoa namal̄aika ohaturu yapito-pitoko Ani Tau, deʼ hagala onyawa yapeseke Anidoporono itebi-tebini?

¹⁹Ngona nomihidiai ngomi matero-tero Ngona komaiwahi nomi kuaha mangale ngomi; matero-tero ngomi komaiwahi midadi Aniumati.