Read Tobelo O YESAYA 64 Bible Online

O YESAYA 64 - Tobelo bible

O YESAYA 64

¹Nakakihi o dihanga deʼ nouti, ya Jou, nadiai hagala ol̄oku igiwi Ani himangoka,

²hokä ouku yawango ogota deʼ yadiai oakere ituhara. Nohi nyata Anikuaha Anihaturu-haturuika, hiädono ohoana de oberera maago-agomo manyawa yohahara Ani himangoka.

³Mamoi iböto Ngona nadiai omanarama homodo-modongo, ngomi miahininga koyodagi ikaua. Ngona nouti, deʼ Anihimangoka hagala ol̄oku igiwi.

⁴ Komaiwahi naga yoihene, deʼ komaiwahi naga yamake mahomoa de Ngona, naga ogikiri idiai, mangale o nyawa iwingano-nganono unangika.

⁵Ngona nabuhuku o nyawa manga hininga iriko-rikoto deʼ yowango imamoteke Animau. Ngona nomingamo ngomino, mä ngomi kahirahi mibaradoha igoungu maöraha kahurunikahi ngomi miahowono.

⁶Ngomi mata-mata ganga o nyawa mipese-peseke, kayaoaoli tongomi miamanarama ma oa-oa ma kaitorou deʼ i peseke. Ngomi ahamihihanga karana tongomi miadorou hokä ogota ma hoka imaai ihihaili ohidal̄oko.

⁷Koiwa imaniata Ngonaika, ekola yogahoko Aniroriwo, hababu Ngona nomï ngiunu Anibiono ngomino, deʼ nomi mal̄aika ngomi imibinaha mangale tongomi mia baradoha.

⁸Mä Ngona, ya Jou, ganga tongomi mia Ama, ngomi otonaka matau-taulu, deʼ Ngona nomituku ngomi; ngomi mata-mata ganga Anigiama mamanarama.

⁹Hoʼ uha nomingamo de magiria, ya Jou, uhaoli nohohininga tongomi miabaradoha; nölega, ngomi nënanga Aniumati.

¹⁰Hagala Anikota madebi-debini imahi rupa otonaka makokakaha, o Yerusalem idadi otonaka malua-luasi koiwa mamomo dekai rïdika.

¹¹Ma Jou Madutu Ai Tau itebi-tebini deʼ imomulia manga ngï tongomi miaete de miatohora inihigö gogiriri Ngona, yabinahaka ouku; mata-mata ongï ngomi mio igo-igo idadioka magilianga.

¹²Ngona namake mata-mata gënanga, ya Jou, kaiyakunu Ngona nomarirïdoka? Boteka Ngona ahanomi mal̄aika ngomi miatagongo ohangihara de duru kohagiria?