Read Tobelo O YESAYA 66 Bible Online

O YESAYA 66 - Tobelo bible

O YESAYA 66

¹Ma Jou wotemo, ”O dihanga ganga Ahipareta makuruhi, deʼ o dunia Ahil̄ou mahohole. Hoʼ otau marupa okia nomau nohigoko mangale Ngohi, deʼ ongï okia nomau nodiai Togogere?

²Oalami magilolitino ganga Ahigiama mamanarama, done mata-mata gënanga tohidadi. Mä Ahiigo enagënanga o nyawa manga hininga ipoluluku, imatoduba hagala manga baradoha, manga modongo deʼ ihihi ngounu Ngohino.

³Mä ohoana de oberera gënanga yodiai yamoteke toönanga manga mau; önanga yosanangi yopuji de madodagi haemo-emono. Mangale önanga koiwa imahowono: Ihihuba o hapi manauru deʼ ihihuba onyawa, ihihuba o duba mangohaka deʼ yatobiki okaho matomara; ihihuba o gandum deʼ ihihuba oode maawunu, yotuhuku o manyanyi deʼ yahuba odulada.

⁴Hababu gënanga Ngohi o aha Tadiai tamoteke Ahimau deʼ tahitapal̄u onanguku hagala oboditoönanga yomodo-modongo. Hababu maöraha Ngohi taahoko, koiwa yohaluhu; maöraha Ngohi tatemo-temo, koiwa ihigihenika. Onanga iholoi yoigo ihilawani Ngohi deʼ yadiai itotorou.”

⁵Ni ihene okia wotö temo-temo ma Jou, hei ngini niwi modo-modongo deʼ niwihi ngou-ngounu Unangika, ”Karana ngini nisatia Ngohino, naga niahoana mahidogoronaka inidohata ngini, deʼ yoluku imahiganu dede ngini. Onanga inihohedu ngini de yotemo, ’Mal̄aika ma Jou wohidumutu Aimulia, hupaya ngomi miamake niamorene.’ Mä önanga mahirete yamake omal̄eke.

⁶Ni ihene! Naga mailingi maruruhu okotaka; naga oilingi Ahi Tauino; gënanga Ahiilingi magogiria tabalahi ahihaturuika!

⁷Ahikota itebi-tebini hokä momatengo oayo mongohaka mohirikituahi mahiri; mohingohaka ongohaka onauru mamaouwahi mahiri mongohaka.

⁸Onagona mamoi iböto yoihene ohali hoka hoko gënanga? Onagona mamoi iböto yamake idadi marupa hoko gënanga? Mä o Israel manga hoana imakil̄auoka maöraha o Sion mulaenge yamao mahiri ingohaka.

⁹Uha niatobote Ngohi taao Ahiumati hiädono maöraha imakil̄au deʼ tamal̄aikaua önanga yahingohaka.” Hoko gënanga ma Jou wato.

¹⁰Nimore-morene kamamoi o Yerusalem, hei mata-mata onyawa niwïhöhohininga. Ngini niduka karana Unanga, oraha nënanga yakunu nimorene.

¹¹Ngini aha nia jame mata-mata kadema ënanga, hokä imatengo o ngohaka ihuhu ma ayoika.

¹²Hababu ma Jou wotemo, ”Ngini ahaTini hidöaka olola hokä ongairi ihahahuru; o hoana de oberera maago-agomo manyawa manga kaya aha yao nginika hokä ongairi ihebu-hebulu. Ngini hokä ongohaka mahuhu deʼ matai ma ayo, ikali mohi böbö ami daparionoka.

¹³Ngohi ahatinilaru o Yerusalemoka, hokä oayo momatengo malaru amingohaka.

¹⁴Niamake gënanga, ngini ahanimorene, deʼ idadi nikuata deʼ nitumuloa hokä omomo madibu-diburu. Done Ahigogilaongo ahayamao Ahikuaha deʼ hagala Ahihaturu ahayamao Ahigangamo.”

¹⁵Igoungu, ma Jou ahawoboa de ouku; Unanga ahawobarene Ai kereta hokä orato, mangale wohiaiki Aigangamo, deʼ wabanarata de makuatil̄e.

¹⁶Hababu mata-mata onyawa yamake yahowono ahawähukumu de ouku deʼ ooworo, deʼ manga ngöe yahukumu yahohonenge.

¹⁷Ma Jou wotemo, ”Mata-mata onyawa imahi tebi-tebini manga diri mangale imatuduono odumule-dumuleika mangale ogiki-gikiri deʼ yopuji enangika, ahayohihanga imakinïki hagala onyawa yo ol̄o-ol̄omo oode ma akeme okarahe, ikali oinomo mahomoa ha emo-emono.

¹⁸Ngohi tohioriki toönanga manga pikiranga deʼ manga manarama. Ngohi toboa mangale tatoomu hagala onyawa hagala o hoana de obereraino. Maöraha önanga imatoomu, önanga aha ya make Ahikuaha.

¹⁹Ngohi ahatohigogere moi ononako toönanga manga hidödogoronaka. O hidoku maiteteke toönanga mangahidogoronaka aha Tahihalamati. Onanga aha Tahuloko ohoana de oberera maago-agomika hagala obereraka magogurutika komaiwahi yoihene mangale Ngohi ekola yamake Ahimulia deʼ Ahikuaha: o Tarsisika, o Libia, deʼ Lidia de yotoi-toimi yososawaro, o Tubalika deʼ o Yunani. Onanga aha ihiabari Ahimulia hagala o hoana de oberera maago-agomo mangahidogoronaka gënanga.

²⁰Hagala obereraino gënanga önanga aha yaaooli niaroriadodoto ohoana moi hokä ohadia mangale Ngohi. Onanga ahayaoa hagala onyawa gënanga ahidoporonoka itebi-tebinika o Yerusalemoka de yobarene o kuda, o keledai deʼ o unta deʼ de o kereta o goroba, hokä biaha o Israeloka manyawa yao ma Jou Ai Tauika ohuhuba ogandum ongï itebi-tebini magoronaka.

²¹Ohidoku moi önanga mangahidogoronaka aha Tahidadi o imam deʼ o Lewi manyawa.

²² Hokä odihanga mahungi deʼ o dunia mahungi ahaitedekana karana Ahikuaha, hoko gënanga niadifauku deʼ niaromanga ahaigogogere kahirahi.

²³O Mede ma Hungi magetongo deʼ o Sabat mawange magetongo o umati o nyawa yongodumu aha yoboa mangale ihihuba Ngohi o Yerusalemoka.

²⁴ Maöraha imajobo, önanga aha yamake mangamaiyeti hagala onyawa ihi lawa-lawanoka Ngohino. Ogaili yaol̄o-ol̄omo toönanga manga maiyeti ahaihonengua, deʼ ouku yätuhu-tuhuku önanga aha ihonengua; moi ololega yoborohono mangale mata-mata o nyawa.”