Read Tobelo O YESAYA 7 Bible Online

O YESAYA 7 - Tobelo bible

O YESAYA 7

¹ Ma koano Ahas ganga o Yotam aingohaka o nauru deʼ o Uzia aidanongo. Maöraha ünanga wapareta o Yehuda, idadi o parangi. O Rezin ma koano Siria, deʼ o Pekah o Remalya o Israeloka manga koano aingohaka o nauru, yoboa yaparangi o Yerusalem. Mä önanga yakunua yaora o kota gënanga.

²Maöraha ma koano Yehuda woihene o Siria manga tentara ma duduono yowohamoka o Israel madaeraika hokä imahi koboa, ünanga deʼ ainyawa duru yohawana, hiädono önanga yohahara hokä o gota yagiwi o hidal̄oko.

³Ma Jou witemo o Yesayaika, ”Niao ani ngohaka o Syear-Yasyub deʼ nioiki nimaka make ma Koano Ahas. Ngona aha nimake ünanga o guhu mabaiti mabarenoka mal̄okuil̄e idaduoka, manga manarama yofoka-foka manga ngï.

⁴Nahetongo ma koanoika ünanga kiani womagoana womahi dodiai mä kahirahi womarirïdi. Unanga ngarouha wohawana ekola wobingu. Manga dohata ma Koano Pekah deʼ ma Koano Rezin de aitentara hagala o Siria manyawa gënanga iholoiua ibahaya o uku magota madino hinotoino il̄ofo-l̄ofo.

⁵O Siria yorimoi yodiaioka o doomu madorou de o Israeloka deʼ manga koano.

⁶Onanga yomau yaparangi o Yehuda deʼ yahawa-hawana manyawa, hupaya yahiboa onangino daha iwigoraka o Tabeel aingohaka o nauru wodadi o koano.

⁷Mä Ngohi, o Jou, tohimatoko o hali gënanga aha idadiua,

⁸karana o Siria iholoiua ikuata de o Damsyik makota ma titi, deʼ o Damsyik iholoiua ikuata de ma Koano Rezin. Enahioko maöraha o taongo moributanga de motoa magoronaka, o Israeloka aha yokoki kerewoto hiädono yakunua imatumungu hokä o hoana deo berera manyawa.

⁹O Israeloka iholoiua yokuata de manga kota matiti, o Samaria, deʼ o Samaria iholoiua ikuata de ma Koano Pekah. Nako ngini niagou-goungu ningaku Ngohino, maraioka ngini niakunu nimatumungu.”

¹⁰Ma Jou wohiadono o behehongo mahomoa o Ahasika:

¹¹”Nogahoko hupaya ma Jou ani Jou Madutu wohidöaka o nonako ngonaika, boteka o nyawa yohone-honenge manga duniaino matimioka ekola daku o dihanguku.”

¹²O Ahas wohaluhu, ”Ngohi toluku togahoko o nonako. Ngohi toluku titaili ma Jou.”

¹³Daha ma nabi Yesaya wotemo, ”Nako hoko gënanga, noihene hei Koano Daud aidifauku! Iyaoauahi ngini niauji o nyawa manga sabari, hiädono ngini nia uji ahi Jou Madutu o aisabari?

¹⁴ O öraha nënanga, ma Jou mahirete aha wohidöaka o nonako ngonaika: Momatengo o moholehe o ngoheka mohiao o nyawa, aha mihingohaka womatengo o ngohaka o nauru iwihiromanga o Imanuel.

¹⁵Maöraha ünanga yaoaka wolamoko, mangale wakunu wal̄ë maputuhu mahirete, o bereraka gënanga aha mata-mata kadema ënanga.

¹⁶Hababu ma orahauahi gënanga iboa, o berera hinoto yapöpareta o kokoano namodo-modongo gënanga aha yamal̄aika ihomoa.

¹⁷Ma Jou aha wihiboaino ma Koano Asyur, daha ngona deʼ ani tau manyawa ingodumu ikali anikawaha aha niamao hagala o wange iomanga o dehehoto iholoi hoborohono ngaro de okia mamoi iböto ngini niamao mamulaenge o Israel deʼ o Yehuda mapareta iregu.

¹⁸O oraha gënanga ma Jou aha wäahoko o Mesir manyawa de o Asyur manyawa, daha o hoana deo berera hinoto gënanga yoboa hokä o guhuru de matika deo hungu ihidoomuino hagala o wai ibako-bakoro deo helewo madonga-dongaika. Onanga aha yätamunu o momo mahohihika yogetongo deʼ o ngï mamomomoka yogetongo.

²⁰Ma Jou aha wihewa ma koano Asyur mangale wahidiai o Israeloka hokä womatengo wokori-kori wamata wakori mata-mata manga tadauru deʼ manga gogo mangaröehoka.

²¹O öraha gënanga, nako womatengoani wopaliara o hapi magö o dutu moi deʼ o kabingi o dutu hinoto dika,

²²o aiwani o gigini gënanga ihihasili o susu ihoholoiuku mangale hagala o nyawa mahou o bereraka gënanga. I goungu, önanga aha yokere o susu deʼ o madu.

²³Maöraha gënanga hagala o angguru madumule moi-moi yodatomo o angguru mautu o ribuhu moi de maija o tiwi o haaka o ribuhu moi, aha yongango o momo irubu-rubu mahohihika.

²⁴O nyawa yoi-oiki dokengika kiani imagao o toimi mal̄eha de madoto, hababu o berera yamode-modekika gënanga i omanga o momo marubu-rubu mahohihika.

²⁵Deʼ madaera de mal̄oku mabuturungoka biaha yatumule deʼ yodatomo, iomanga o momo irubu-rubu de mahohihika, hiädono o nyawa yobaraniua dokengika. O tonaka gënanga duga-duga mabaraguna hokä o ngï o hapi deʼ o duba mangale o momo i ol̄omo.”