Read Tobelo O YESAYA 8 Bible Online

O YESAYA 8 - Tobelo bible

O YESAYA 8

¹Ma Jou wohitemo ngohino, ”Na l̄e moi o helewo mapako-pako, daha natulihi de madulihi nohitotararonuku: ’Yo ora-ora yohohi apoto, yotohi-tohiki Yotai-taiti.’

²Na ahoko o nyawa yahinoto yakunu hangaku hokä o hakihi, enagënanga ma Imam Uria deʼ o Zakharia, o Yeberekhya aingohaka.”

³O öraha muruono naga ipaha ngohi hekata o ngohaka mohiao. Maöraha miangohaka imakil̄au, ma Jou wohitemo ngohino, ”Nihiromanga ünanga ’Yoora-ora yohohi apoto, Yoora-ora Yotai-taiti.’

⁴Hababu o ngohaka gënanga wolamokuahi mangale wotemo wanakouahi ’Baba’ deʼ ’Meme’, o Damsyik makaya ingodumu de mata-mata o Samaria makiahononga i ora-oraino aha yatoraka ma koano Asyurika.”

⁵Ma Jou wohi temoli ngohino, wato,

⁶”O hoana nënanga yaoluku o akere irirïdi o Syiloah ma Ngairi maiti ino, deʼ yosanangi de ma Koano Rezin deʼ ma Koano Pekah.

⁷Hababu gënanga Ngohi, ma Jou, aha tihiboaino ma koano Asyur deʼ aitentara yongodumu mangale yaparangi o Yehuda. Onanga aha yangika hokä o Efrat ma Ngairi ihebu-hebulu deʼ yo nguihi magoko-gokoko.

⁸Onanga aha yaolu o Yehuda hokä o nguihi hiädono magurutil̄e manga tomarino deʼ imahi lepa hagala okiaka honanga.” Ma Jou Madutu wonatomoteke ngone! Aigahuhu ihöhoheika tongone nanga berera yahohongino.

⁹Nimatoomu de nimahidahaharuku, hei hagala o hoana deo berera! Ni ihene hei dunia mabati-batingika! Nimahidiai mangale niparangi, mä de niahininga imahidahaharuku! Ya, nimahidiaioka, mä de niamao nimahidahaharuku!

¹⁰Niadiai o datoro, mä mata-mata aha iturobaha. Nia l̄ë o putuhu, mä koiwa mabaraguna, hababu ma Jou Madutu womitomoteke ngomi.

¹¹Ngohi ma Jou wohikuaha deʼ wohihidöaka o hohininga hupaya uha taniki o ngekomo yanönonu o hoana deo berera gënanga. Wato,

¹² ”Uha napulono o doomu itotorou okia önanga yapulono o doomu iroruae, deʼ uha nömodongo aha hagala o hali önanga yomodo-modongo.

¹³Nohihininga Ngohi o Jou Duru to Kokuaha ganga totebini. Duga-duga Ngohi kokiani nohïmodongo.

¹⁴ Karana Ngohi duru totebini, Ngohi todadi o helewo yapele-peleke o Yehuda deʼ o Israeloka makawaha, deʼ o dadagoko yamomodoi o Yerusalem manyawa.

¹⁵O nyawa manga ngöe aha yopeleke yoruba deʼ yal̄abo. Onanga aha yodohodoa o dadagoko magoronauku.”

¹⁶Ngini, ahimuri-muri kiani niagogono deʼ niapaliara hagala o behehongo ma Jou Madutu wohidödoa-doakoka ngohino.

¹⁷ Ma Jou wangiunoka Ai diri o Yakub aidifaukuino, Ai umati, mä ngohi tingaku deʼ tinganono Unangika.

¹⁸ Nenanga ngohi deʼ o ngoha-ngohaka ma Jou wohidö doa-doaka ngohino. Ma Jou Duru woKokuaha wopareta o Sion ma Doporono, womïhuloko ngomi midadi o nonako mangale o Israeloka maumati.

¹⁹Mä hagala o nyawa aha inihuloko ngini nigahoko o hidumutu yohou-hourino yohöhudu-hudu deʼ manga urumakai ikökelu-kelu. Hagala o nyawa gënanga ahayotemo, ”Koigoungua ngone kiani hogahoko o hidumutu o nyawa yohone-honenge manga womahino mangale manga paralu o nyawa yowango-wango?”

²⁰Nihaluhu hoko nënanga, ”Nihigihene ma Jou Aidodotoko! O nyawa yotemo imamotekua deo dodotoko gënanga, koiwa toönanga manga nganono.”

²¹Hagala o nyawa yobobodito deʼ yahahahini aha imahikokabarihika o bereraka gënanga. Karana o hahini, önanga kayongamo-ngamo hiädono iwihilai ma kaono deʼ toönanga manga Jou Madutu. Kiaikaö önanga yapulono, yakail̄e

²²ekola yakauku, önanga aha okia-kiaua yamake mahomoa de o dehehoto deʼ o huhutu ikali yadiai kaihohonguku. Onanga aha yäumo o ngï mahohuhutuika gënanga.

²³Mä mangale kahiado-adonikaua o berera gënanga yamao o dehehoto. O daera yogogogere o Zebulon deʼ Naftali manga hoana mamoi i böto ma Jou wapulono okia-kiaua yadaene. Mä maöraha iboa, Unanga aha wohidöaka o horomati o daera mata-mataika o Ngöto Korona de yaino o wange mahiwaroko hiädono o Yordan ma Ngairi mahononga, ikali hiädono o Galilea yogogogere o nyawa maporetino.