Read Tobelo O YESAYA 9 Bible Online

O YESAYA 9 - Tobelo bible

O YESAYA 9

¹ O hoana deo berera yowango o huhutu magoronaka yamake o dararono ikokiria madararono. Yogogogere o honenge magurumini magoronaka yadihiwara o dararono il̄oleto-letongo.

² Jou, nahidöaka önanga o morene ma amoko, nädiai önanga imä uli-ulili. Onanga yomorene karana Ani oa, hokä o nyawa yomorene maöraha yatoomu yautu-utukino, ekola imahikodoku o banakonino.

³Ngona nal̄eoka aigina itotubuho deʼ aimomoku magota ai belekaka. Ngona nahohihanga o hoana deo berera yotö tuku-tuku gënanga yateo Ani umati. Kaimatero hokä öraha ipaha-paha maöraha Nahohihanga o Midian manga tentara.

⁴O tentara manga hapato kai totibingi deʼ manga baju imahi ramohika o awunu, aha yäol̄omo o uku yämata.

⁵O ngohaka o nauru womatengo womakil̄auoka mangale ngone; ngone inahidöaka o ngohaka o nauru womatengo. Unanga aha wodadi tongone nanga tutuda. Unanga iwihi romanga: ”Wonasihati Wobobarija” ”O Jou Madutu Wopoputurungu” ”O Ama woko Kakali”, ”O Dame ma Koano”.

⁶Unanga wopareta hokä o koano o Daud aidifauku, aikuaha duru ilamoko. Ai berera hokogenangika idame de ilola; Ai pareta wohihol̄e o hukumu deʼ o adili mal̄okuoka örahanënanga deʼ kahiado-adonika. O Jou Duru Wokokuaha maraioka wadiai.

⁷ Ma Jou wogelengaka o hukumanga o Israel maparetauku.

⁸O Israeloka manyawa yongodumu deʼ o Samaria madol̄a aha ihiöriki ma Jou wadiai. O öraha nënanga önanga yoedenge deʼ manga hininga magurutil̄e. Onanga yato,

⁹”Hagala o tau maago-agomo o tela i rubaka, mä ngomi aha midiai o tau ma ago-agomo mahungi o helewoino. Hagala o ara mautu yatolangoka, mä ngomi aha miatagali de o Libanon maliwewuru magota duru marorahai.”

¹⁰Ma Jou wagarakioka toönanga manga haturu mangale yälawani önanga.

¹¹O Siria manyawa o wange mahiwaroko deʼ o Filistin ma nyawa o wange madumuniha yal̄e o Israel manga daera. Mä ma Jou kawa ngamohi deʼ kahirahi wahukumu.

¹²O Israeloka manyawa koima manyasaluaoli, ngaroka ma Jou Duru Wokokuaha wahukumoka; önanga imatobaua dika Unangika.

¹³Karana gënanga o wange moi dika magoronaka ma Jou wähukumu o Israeloka manga tutuda-tutuda deʼ manga kawaha. Unanga watobiki deʼ waumo mahäeke deʼ mabikini.

¹⁴Mahaeke enagënanga o nyawa yobalu-baluhu deʼ o nyawa yahö horomati, mabikini enagënanga o nabi-nabi ihidöaka hagala o dodotoko irörehe-rehene.

¹⁵O nyawa gënanga manga tutuda-tutuda yahi rehenoka deʼ yaruae o kawaha.

¹⁶O hoana gënanga yosatiaokaua deʼ yatorou deʼ mata-mata toönanga manga demo itorou. Hababu gënanga o gögö manga hidogoronaka kaima tengo mä ma Jou waotanua. Unanga wadoraua o bobao-bobao deʼ o ngohaka o gohihi. Mä ma Jou kawongamo deʼ kahirahi wahukumu.

¹⁷O hoana gënanga manga dorou yatuhuku hokä o uku yahohihanga o momo marubu-rubu mahohihika. Madokara hokä o hongana youku ikokapupu manofo.

¹⁸Ma Jou Duru Wokokuaha duru wongamo, deʼ Ai hukumanga hokä o uku ihiru-hiru deʼ o hoana gënanga ganga gota ihidofo-dofo youku yamata. Kaima tengo mä yädoraua manga riadodoto.

¹⁹O berera gënanga ingodumu o nyawa imateke dohigoraka deʼ yaol̄omo okiadika yakunu yaol̄omo, mä yamaoua yapunuhu. Koaholi önanga yäol̄omo toönanga manga dodiawo mahirete.

²⁰O Manasye manyawa deʼ o Efraim manyawa imateke parangi, daha imakiniki yälawani o Yehuda. Mä ma Jou kawongamohi deʼ kahirahi wähukumu.