Read Tobelo O IMAMAT 12 Bible Online

O IMAMAT 12 - Tobelo bible

O IMAMAT 12

¹Ma Jou wohidöaka o Musaika o datoro-o datoro nënanga

²mangale o Israel manyawa. Nako o ngoheka momatengo ami ngohaka imakil̄au o ngohaka o nauru, done madekana o wange tumidi o ngoheka gënanga mopeseke, imatero hokä maöraha munanga magogiria o mede imi daëne.

³ O wange tufangeoka ami ngohaka kokiani iwi huna.

⁴Ipahaika o wange moruange deʼ hangeoli o ngoheka gënanga kamo pesekohi karana o awunu ihupu. Munanga yakunua mapeke okia honanga yapake-pake mangale o puji deʼ yakunua möngohama ma Jou Ai Tau hiädono momatebini ipaha.

⁵Nako o ngoheka momatengo ami ngohaka imakil̄au o ngohaka o ngoheka, done madekana o wange ngimoi deʼ iatino o ngoheka gënanga mopeseke, imatero hokä maöraha münanga o mede imi daene. Ipahaika o wange mori butanga deʼ butangaoli o ngoheka gënanga kamopesekohi karana o awunu ihupu.

⁶Iböto maöraha momatebini deʼ ipahaka yaoa karana ami ngohaka imakil̄auoka o ngohaka o nauru ekola o ngohaka o ngoheka o ngoheka gënanga kokiani moao ihi huba-huba ma imamika ma Jou Ai Tau ma ngorana ma himangoka. Ihi huba-huba gënanga marupa o duba mangohaka o dutu moi maumuru o taongo moi o huhuba yatö tuhu-tuhuku, deʼ o namodara magö o dutu moi ekola o pombo furu magö mangale o baradoha ma apongo mahuhuba.

⁷Ma imam kokiani wohidöaka mohihö huba-huba ma Jouika deʼ wadiai upacara mangale yaehe o ngoheka gënanga ami peseke, hiädono munanga idadi motebini. Hoʼ gënanga doka kokiani madiai o ngoheka momatengo ami ngohaka ima kil̄au ipahaino.

⁸ Nako o ngoheka gënanga momä gakunua masadia o duba ma ngohaka o dutu moi, münanga kokiani moao o namodara magö o dutu hinoto ekola o pombo furu magö: o dutu moi mangale o hu huba yatö tuhu-tuhuku deʼ o dutu moioli mangale yaehe o ngoheka gënanga ami peseke, done münanga idadi motebini.