Read Tobelo O IMAMAT 13 Bible Online

O IMAMAT 13 - Tobelo bible

O IMAMAT 13

¹Ma Jou wohidöaka o Musa deʼ o Harunika hagala o datoro nënanga;

²Nako womatengo wopoda-poda ekola iwi ako-ako ipoda-poda magare-garehe ai kaioka yakunu idadi o panyake o pado, ünanga kokiani iwiao ma imamika o Harun aidifauku.

³Ma imam kokiani watailako ai kai ipopanyake o nyawa gënanga. Nako ai gogo ipopanyakeika gënanga idadi magare-garehe, deʼ ipopanyakeika wamake iholoi iluku deʼ ai kai ma gilolitino, o nyawa gënanga wopanyake iwi pado. Ma imam ko kiani wohinyata o nyawa gënanga wopeseke.

⁴Mä nako ai kai ipopanyake magare-garehe deʼ iholoiua i luku deʼ ai kai magilolitino, deʼ ai gogo ipopanyakeö gënanga koma gare-garehua, o nyawa gënanga kokiani iwi tingaka o wange tumidi madekana.

⁵O wange matumidoka, ma imam kokiani wogilioli wïtailako. deʼ nako imoteke ai damake o panyake gënanga madodagi kahirahi deʼ iheroua, o nyawa gënanga kokiani iwi tingaka madekana o-wange tumidoli.

⁶O wange ma tumidoka ma imam kokiani wogilioli wïtailako, deʼ nako ai kai ipopanyake ihihangoka deʼ koi heroua, ma imam kokiani wohinyata o nyawa gënanga wotebini. Genanga o kai mapanyake ibohagaua. O nyawa genanga holingohu wafoka ai pakeanga de unanga wodadi wotebini.

⁷Mä nako ma imam wohi nyata wotebini ipahaino o nyawa gënanga ai panyake ihero, ünanga kokiani wogilioli wï himanga ma imam.

⁸Ma imam kokiani wï tailakoli deʼ nako ai panyake igoungu iheroka, o nyawa gënanga kokiani ihi nyata wopeseke; ünanga wopanyake iwi pado ibobahaya.

⁹Womatengo iwi pado ibobahaya kokiano iwiao ma imamoika.

¹⁰Nako iwi tailako deʼ imoteke ma imam o nyawa gënanga ai kaioka naga o nabo magare-garehe,

¹¹o nyawa gënanga iwi pado. Ma imam kokiani wohi nyata o nyawa gënanga wopeseke. Iparalua ünanga iwi tingaka, karana yanako-nako de madiaioka ünanga wopeseke.

¹²Nako ma imam wamake ipoda-poda magare-garehe gënanga iheroka ai haëkoka hiädono ai l̄ouku,

¹³deʼ imoteke ma imam wï tailako o panyake gënanga i heroka yamode-modekika ai roëhe de ai kai idadioka magare-garehe, o nyawa gënanga ihi nyata wotebini.

¹⁴Mä nako iako-ako ipuda, ma imam kokiani watailakoli.

¹⁵Nako gënanga itiai iako-ako, o nyawa gënanga kokiani ihi nyata wopeseke, karana ünanga wopanyake iwi pado ibobahaya.

¹⁶Mä nako iako-ako gënanga itogumu deʼ idadioli magare-garehe, o nyawa gënanga kokiani wï himanga ma imam,

¹⁷hupaya wï tailakoli. Nako iako-ako gënanga igoungu i dadioka magare-garehe, ma imam wohi nyata o nyawa gënanga wo tebini.

¹⁸Nako womatengo ai boroho itogumoka,

¹⁹mä mabokekika ipuda manabo magare-garehe ekola ipoda-poda ma gare-garehe deʼ itokara, o nyawa gënanga kokiani wï himanga ma imam,

²⁰hupaya wï tailako. Nako ipoda-poda gënanga yolega-lega iholoi iluku deʼ ai kai yakilolitino deʼ ai gogo genangokadau idadiokali magare-garehe, ma imam kokiani wohi nyata o nyawa gënanga wopeseke. O boroho gënanga o panyake o pado matiti.

²¹Mä nako iwi tailako deʼ imoteke ma imam ai gogo genangokadau koma gare-garehua, deʼ genangokadau ai kai i holoiua iluku deʼ ai kai magilolitino, duga-duga kama kafo-kafo, o nyawa gënanga kokiani iwi tingaka o wange tumidi ma dekana.

²²Nako o tugal̄a gënanga ingaliua deʼ koi heroua, gënanga duga-duga o boroho mabokeke, hoʼ o nyawa gënanga ihi nyata wotebini.

²³Mä nako o tugal̄a gënanga ingaliua deʼ iheroua, gënanga duga-duga o boroho mabokeke, hoʼ o nyawa gënanga ihi nyata wotebini.

²⁴Nako wotengo iwï uku deʼ ai kai manaboika gënanga imadadi magare-garehe ekola iarehe deʼ itokara,

²⁵ma imam kokiani wï tailako. Nako ai gogo genangokadau idadi magare-garehe deʼ manabo iholoi iluku deʼ makai ma gilolitino, done o panyake pado yö horaka youku-uku gënanga deʼ ma imam kokiani wohi nyata o nyawa gënanga wopeseke.

²⁶Mä nako ai gogo genangokadau koi arehua deʼ genangoka dau iholoiua iluku deʼ ai kai magilolitino, duga-duga kama kafo-kafo, done o nyawa gënanga kokiani iwi tingaka o wange tumidi madekana.

²⁷O wange matumidoka ma imam kokiani wö gilioli wï tailako. Nako o tugal̄a gënanga ihero done o nyawa gënanga wo panyake iwi pado ibobahaya deʼ kokiani ihi nyata wopeseke.

²⁸Mä nako tugal̄a gënanga ingaliua deʼ koi heroua, duga-duga iholoi iarehe, gënanga o padoua. Ma imam kokiani wohi nyata o nyawa gënanga wotebini, hababu magare-garehe gënanga duga-duga o nguku manabo mabokeke.

²⁹Nako womatengo o nauru ekola momatengo o ngoheka yo panyake yä pado manga haëkika ekola manga okokika,

³⁰kokiani ma imam wä tailako önanga. Nako ipopanyakeika gënanga yolega-lega iholoi iluku de manga kai magilolitino, deʼ manga tadauru ekola manga parahi kamagogurati daha iturono, done o nyawa geönanga yopanyake yä pado deʼ kokiani ihi nyata yopeseke.

³¹Nako yä tailako deʼ imoteke ma imam ipopanyakeika ya makeua iholoi iluku deʼ manga kai magilolitino, mä ya makeua manga tadauru ekola ai parahi genangokadau itumuloa, o nyawa geönanga kokiani yätingakika o wange tumidi madekana.

³²O wange matumidoka, ma imam kokiani wogilioli watailako ipopanyakeika deʼ nako o panyake gënanga iheroua inoli yamakeua manga tadauru ekola ai parahi genangokadau kama gogurati, ikali yolega-lega iholoiua iluku deʼ ai kai magilolitino,

³³o nyawa gënanga kokiani yakori manga tadauru ekola ai parahi ipopanyake magilolitino. Daha önanga kokiani yä tingakoli o wange tumidi madekana.

³⁴O wange matumidoka, ma imam kokiani wö gilioli watailako. Nako manga panyake iheroua deʼ genangika dau yolega-lega ihi gurimua, o nyawa geönanga ihi nyata yotebini deʼ kokiani manga pakeanga yafoka.

³⁵Mä nako ihi nyata yotebini ipahaika deʼ manga panyake ihero,

³⁶ma imam kokiani wogilioli wätailako. Nako o panyake gënanga igoungu ihero, iparaluokaua ma imam wätailako boteka manga tadauru ekola ai parahi kama gogurati hababu ya nako madiaioka önanga yopeseke.

³⁷Mä nako imoteke ma imam ai damake manga panyake iheroua deʼ manga tadauru ekola ai parahi iwango irahai genangokadau, o panyake gënanga itogumoka, deʼ ma imam kokiani wohi nyata önanga yotebini.

³⁸Nako womatengo o nauru ekola momatengo o ngoheka deʼ manga tugal̄a manga kai ika,

³⁹ma imam kokiani wätailako o nyawa geönanga. Nako o tugal̄a yolega-lega kama kafo-kafo, önanga duga-duga yä hora o hehega, de ihi nyata yotebini.

⁴⁰Nako womatengo o nauru ai häeke maporetika ekola ma himangino ipalaloka, o palala gënanga yadiaiua ünanga wo peseke.

⁴¹

⁴²Mä nako ipuda o noboho magare-garehe deʼ hokä itokara ipala-palalika, ünanga wopanyake iwi pado ibobahaya.

⁴³Ma imam kokiani wï tailako o nyawa gënanga, deʼ nako igoungu naga o noboho magare-garehe deʼ hokä itokara,

⁴⁴ma imam kokiani wohi nyata ünanga wopeseke karana wo panyake yapado ai häekika.

⁴⁵Womatengo wopanyake iwi pado, kokiani wapake o pakeanga makakakihi deʼ wamal̄aika ai tadauru ifuta-futa. Unanga kokiani daengino ai bionino watamunu deʼ wopoa-poaka, ”O peseke! O peseke!”

⁴⁶Hoko kia madekana iwi daene o panyake gënanga ünanga wo peseke deʼ kokiani ünanga wogogere o Tau madoomu ma poretoka, ai gurutika deʼ o nyawa mahomoa.

⁴⁷Nako o pakeanga ekola o ngoëre o wol ekola o lenan,

⁴⁸ekola o aiwani makai, ekola okia dika yadodiai deʼ o aiwani makai yamake o pado manonako,

⁴⁹deʼ o pado manonako gënanga ma ijo-ijo ekola madoka-dokara, done o pado manonako gënanga ihö hero-hero deʼ kokiani ihi dumutu ma imamika.

⁵⁰Ma imam kokiani watailako o baranga gënanga, daha wa tingakika o wange tumidi madekana.

⁵¹O wange matumidoka ünanga kokiani watailakoli, deʼ nako o pado manonako igoungu iheroka, o baranga gënanga ipëseke.

⁵²Ma imam kokiani watuhuku o baranga gënanga, karana o pado manonako gënanga ihero-hero, hoʼ kokiani ya hohihanga deʼ o uku.

⁵³Mä nako watailako deʼ imoteke ma imam o pado manonako gënanga iheroua o barangoka gënanga,

⁵⁴ünanga wä huloko hupaya o baranga gënanga yaihoro deʼ yatingakika o wange tumidi madekana.

⁵⁵Daha ma imam kokiani watailakoli. Nako o pado manonako gënanga iheroua makahirahi ma ijo-ijo ekola madoka-dokara, o baranga gënanga kai pesekohi deʼ kokiani yatuhuku, ngarokö o pado manonako gënanga duga-duga mahimangino ekola maporetino.

⁵⁶Ma nako yatailako deʼ imoteke ma imam o pado manonako gënanga idadioka makafo-kafo, o ngoëre ekola o aiwani makai deʼ o pado manonako o barangoka gënanga kokiani yakakihi.

⁵⁷Nako ipahaika ipudali done o pado manonako gënanga ihero, deʼ o baranga madutu kokiani watuhuku o baranga gënanga.

⁵⁸Nako yafoka ipahaino deʼ o pado manonako o barangoka gënanga ihihanga, o baranga gënanga kokiani yaihoroli daha yapulono itebini.

⁵⁹Hoko gënanga o datoro-datoro mangale o pado manonako ya mö make-make o pakeangoka ekola o ngoëre o lenan ekola o wol ekola okia dika yadodiai o aiwani makai.