Read Tobelo O IMAMAT 14 Bible Online

O IMAMAT 14 - Tobelo bible

O IMAMAT 14

² o datoro-o datoro nënanga mangale yapado ibobahaya itogumu ipahaino deʼ imatebini ma upacara. Mawange o nyawa gënanga ihi nyata wotebini, kokiani ünanga iwiao ma imamika,

³deʼ ma imam wïao o Tau madoomu maporetika. Nako i moteke wï tailakoka o nyawa gënanga wotogumoka,

⁴ma imam wï huloko ünanga woao o totaleo manga ngango o dutu hinoto ihoharamua, deʼ o dobiki moi o liwewuru magota, o lawe magumini madoka-dokara deʼ o hisop o tage moi.

⁵O totaleo o dutu moi kokiani watoaka o bohoko o tonaka mal̄okuoka madol̄a o jobubu ma akere madebi-debini.

⁶O totaleo o dutu moioli deʼ o liwewuru magota, o lawe ma gumini madoka-dokara deʼ o hisop o tage moi kokiani watono o totaleo ma awunuku yatö toa-toakoka.

⁷Ma imam kokiani wï dohurero o totaleo ma awunu gënanga o nyawa wotogu-togumokaika, wohigali matumidi. Daha ma totaleo mangango kokiani yaötana o tonaka ma lua-luasika.

⁸De ipaha o nyawa gënanga kokiani wafoka ai pakeanga, wa kori ai tadauru mata-mata, deʼ woma ohiki. Done ünanga wo tebinoka, deʼ yakunu wowohama o Tau madoomuika, mä o wange matumidoli madekana ünanga yakunowahi wowohama ai tau mahireteika.

⁹O wange matumidoka ünanga kokiani wakori ai tadauru mata-mata, ai parahiö, ai gorohutu deʼ mata-mata ai gogo ai röehoka. Daha ünanga kokiani wafoka ai pakeanga deʼ woma ohiki. Genanga deʼ iböto daha ünanga wotebini.

¹⁰O wange matufangeoka o nyawa gënanga kokiani woao o duba manauru o dutu moi ma umuru o taongo moi, moi-moi koiwa naga deʼ manabo. Ma homoa deʼ gënanga o tarigu o kilo hange ihi ganu-ganuoka deʼ o zaitun maminya deʼ o zaitun maminya o litere moi deʼ ya regu hange.

¹¹Daha ma imam kokiani wïao ünanga kamamoi deʼ ai huhuba gënanga ma Jou Ai Tau mangorana mahimangoka.

¹²Ma imam kokiani wal̄ë o duba mangohaka ma nauru o dutu moi deʼ o zaitun maminya o litere moi deʼ iregu hange mangale o rugi madagali mahuhuba, deʼ wohihuba hokä o huhuba ihi dumu-dumutu ma Jouika.

¹³O duba ma ngohaka gënanga kokiani watoaka o ngï yö dinga-dingakoka mangale o aiwani yatoa-toaka mangale o baradoha ma apongo mahuhuba deʼ o huhuba yatö tuhu-tuhuku. O duba gënanga kokiani yatoaka genangokadau karana o rugi madagali mahuhuba deʼ o baradoha ma apongo mahuhuba ganga duru itebi-tebini deʼ idadi to ma imam ai hidoku.

¹⁴Ma imam kokiani wal̄ë o duba mangohaka ma awunu mahuhutulu daha wohinauhu ai ngauku manirakika, ai giama mahagarara mal̄eha manirakika deʼ ai l̄ou mahagarara mal̄ëha maniraka o nyawa aha iwihinyata wotebini.

¹⁵Ipaha ma imam wal̄ë o zaitun maminya mahuhutulu deʼ woguhe ai giama mahigili mahoatuku mahirete.

¹⁶De iböto ünanga watono ai giama mahagarara ma niraka o minyauku, deʼ wodohurero wohigali matumidi ma Jou Ai Tau ma goronaka.

¹⁷Daha mahuhutulu o minya ai giama mahoatoka kokiani wo hinauhu o ngï-o ngï wohinau-nauhoka o awunu, enagënanga ai ngauku manirakika, ai giama mahagarara mal̄ëha maniraka, deʼ ai l̄ou mahagarara mal̄ëha maniraka o nyawa aha iwihinyata wotebini.

¹⁸O minya maboloi kokiani yoduguhe o nyawa gënanga ai haëkuku. De hoko gënanga ma imam wodiai o nyawa gënanga ai debini ma upacara ma Jou Ai himangoka.

¹⁹Ipaha ma imam kokiani wohihuba o baradoha ma apongo mahu-huba hupaya o nyawa wopese-pesekoka gënanga idadi wotebini. De iböto ünanga kokiani wotoaka o aiwani mangale o huhuba yatuhu-tuhuku

²⁰deʼ wohihuba wohidomoteke o huhuba ihi dumu-dumutu o huhuba mangï mal̄okuoka. De hoko gënanga ma imam wodiai o debini ma upacara mangale o nyawa gënanga, ünanga wodadi wotebini.

²¹Nako o nyawa gënanga womihikini deʼ womagakunua, done mangale o rugi madagali, mahuhuba ünanga yakunu wao o duba ma nauru ngohaka dika mangale o huhuba ihidö dumu-dumutu ma Jouika. Ma homoa deʼ gënanga o tarigu o kilo moi ihiganu deʼ o zaitun maminya mangale o huhuba ihi dodiaiukuoka, deʼ o zaitun maminya o litere moi yaregu hange.

²²Unanga kokiani wao o namodara magö o dutu hinoto ekola o pombo furu magö: o dutu moi mangale o baradoha ma apongo ma hu huba deʼ o dutu moioli o huhuba yatö tuhu-tuhuku.

²³Mata-mata ihihö huba-huba gënanga kokiani wao ma imamika ma Jou Ai Tau mangorana mahimangoka ai diri madebini ma upacara mawange tufangeoka.

²⁴Ma imam wal̄ë o duba mangohaka deʼ o zaitun maminya gënanga deʼ wohihuba hokä o huhuba ihidö dumu-dumutu ma Jouika deʼ gënanga ma imam ai hidoku.

²⁵De ma imam kokiani watoaka o duba mangohaka gënanga deʼ wohinauhu ma awunu mahuhutulu ai ngauku manirakika, ai giama mahagarara mal̄ëha manirakika deʼ ai l̄ou mahagarara mal̄eha manirakika o nyawa aha ihi nyata wotebini.

²⁶Ma imam kokiani o minya mahuhutulu woguhe ai giama ma higili mahoatuku

²⁷deʼ ai giama mahagarara maniraka wohigali matumidi wodohurero o minya gënanga ma Jou Ai Tau magoronaka.

²⁸De naga mahuhutulu o minya ai giamoka kokiani wohinauhu o awunu ihinö nau-nauhokaika, enagënanga ai ngauku ma nirakika, ai giama mahagarara mal̄eha manirakika, deʼai l̄ou mahagarara mal̄eha manirakika o nyawa aha ihi nyata wotebini.

²⁹Ma minya maboloi kokiani woguhe o nyawa gënanga ai haëkuku mangale ai diri ma upacara ma Jou Ai himangoka.

³⁰Ipaha ma imam kokiani wohihuba o namo dara magö o dutu moi ekola o pombo furu magö,

³¹mangale o baradoha ma apongo mahuhuba, deʼ o dutu moioli mangale o huhuba yatö tuhu-tuhuku ihidomoteke de ai huhuba yadodiai ukuoka. De hoko gënanga ma imam wadiai o nyawa gënanga ai debini ma upacara ma Jou Ai himangoka.

³²Nenanga doka o datoro mangale o debini ma upacara yapö pado-pado yopanyake yotogumino o nyawa ima gaku-gakunua.

³³Ma Jou wohidöaka o Musa deʼ o Harunika,

³⁴o datoro-o datoro mangale o tau yohora-horaika o pado ma-nonako ihö hero-hero. O datoro-o datoro nënanga ipake o Israel manyawa yowohamoka o Kanaan matonakika, o berera ma Jou wahi-doa-doakoka onangika.

³⁵O nagona honanga yamake o pado manonako manga tau ma goronaka, kokiani o hali gënanga ihi ngahu ma imamika.

³⁶Ma imam woböa uwahi watailako o pado manonako gënanga, ünanga kokiani wahipareta hupaya hagala okia honanga ihihupu o tauoka gënanga. Nako kowali, naga okia dika o tauoka gënanga idadi ipeseke. Ma imam kokiani woböa

³⁷mangale watailako o pado manonako gënanga. Nako naga itö-tubu-tubuku maijo-ijo ekola madoka-dokara yolega-lega hokä ihi gurimi mabebeno o mehelika,

³⁸ma imam kokiani wamal̄a o tau gënanga deʼ imal̄aika ibenoino o wange tumidi madekana.

³⁹O wange matumidoka ma imam kokiani woböa deʼ watailakoli. Nako o pado manonako gënanga ihero,

⁴⁰ünanga kokiani wohipareta hupaya o bebeno o mehele mahelewo-helewo gënanga yakilianga deʼ yamode-modekika ma bebeno o mehele madol̄aino yakori. O mehele yakori-korino deʼ mahelewo-helewo gënanga kokiani yaumo o ngï ipese-pesekika o kota maporetika.

⁴¹

⁴²Daha mahelewo-helewo ihi hupu-hupuoka gënanga kokiani yatagali deʼ o helewo mahungi. Ya mode-modekika o tau gënanga mabebeno o mehele kokiani ihilape de o mehele mahungi.

⁴³Nako o pado manonako gënanga ipudali ena hioko o tau gënanga mahelewo yatagalioka deʼ mabebeno o mehele yakorioka deʼ yamehelokali,

⁴⁴done ma imam kokiani woböa deʼ watailakoli o tau gënanga. Nako o pado manonako gënanga igoungu ihero done o tau gënanga ipeseke,

⁴⁵deʼ kokiani yakilianga. Ma helewo, magota-gota deʼ ingodumu mamehele kokiani yao o ngï ipese-pesekika o kota maporetika.

⁴⁶Ihira de gënanga o nagona dika yowohama otauika gënanga yodadi yopeseke hiädono o wange itumunu.

⁴⁷O nagona honanga imaidu ekola yol̄omo o tauoka gënanga kokiani manga pakeanga yafoka.

⁴⁸Mä nako ma imam woböa deʼ imoteke ünanga watailako ipudaokaua o pado manonako o tau gënanga yamehele iböto, ünanga kokiani wohinyata o tau gënanga itebini, hababu o pado manonako ihihangoka ingodumu.

⁴⁹Mangale o tau madebini, ma imam kokiani woao o totaleo o dutu hinoto, o gota cemara, o gumini madoka-dokara deʼ o hisop o tage moi.

⁵⁰O totaleo o dutu moi kokiani watoaka o bohoko mal̄okuoka madol̄a o jobubu ma akere mamä maata.

⁵¹Daha o gota cemara, o gumini madoka-dokara, o hisop deʼ o totaleo mangango kokiani yatono o totaleo yatoa-toakoka ma awunuku deʼ o akere mamä maatuku. De iböto o tau gënanga yo dohurero ihigali matumidi.

⁵²O totaleo kamangangohi kokiani yapidili o tonaka i lua-luasika o kota maporetoka. De hoko gënanga ma imam wadiai o tau madebini ma upacara, deʼ o tau gënanga idadi itebini.

⁵³

⁵⁴Genanga doka o datoro-o datoro mangale o panyake o pado ibobahaya,

⁵⁵mangale ipoda-poda, iako-ako ekola itubu-tubuku ma gare-garehe ekola manga röehika il̄oboho, deʼ mangale o pado ma nonako o pakeangika ekola o tauika.

⁵⁶

⁵⁷O datoro-o datoro gënanga mafaidä ihitantu okianaga moi gënanga itebini ekola ipeseke.