Read Tobelo O IMAMAT 15 Bible Online

O IMAMAT 15 - Tobelo bible

O IMAMAT 15

¹Ma Jou wohidöaka o Musa deʼ o Harunika o datoro-o datoro nënanga

²mangale o Israel manyawa. Nako wo ma tengo o nauru ka wo tü tütutu karana o nauru ma panyake, i tö tü tututu gënanga i peseke,

³kayaoa ihupu-hupu kayaoa ihupu-hupu ua.

⁴O ngï wö gö gögere ekola wö idu-idu o nyawa gënanga idadi ipeseke.

⁵O nagona hönanga iwi pëke o nyawa wö tü tütutu ekola ai ngidu-ngidu, ekola yo gögere ai rio uku, ekola o nyawa gënanga wä obiri, ko kiani ya föka manga baju deʼ imaohiki, deʼ önanga yo peseke hi adono o wange itumunu.

⁹O go gögere o aiwani ma poretuku ekola okia dika wo gö gogere o nyawa wo tü tütutu yo dadi yo peseke.

¹⁰O nagona hönanga ya pëke okianaga moi wo gö gögeroka o nyawa gënanga, yo dadi yo peseke hiadono o wange itumunu. O nyawa ya gö göra-göraka o baranga gënanga ko kiani ya foka manga pakeanga deʼ ima ohiki, deʼ önanga yo pëseke hi adono o wange itumunu.

¹¹Nako o nyawa wo tü tütutu wa ihorua ai giama ihira de wä peke o nyawa ma homoa, done o nyawa wä pëke-pëke gënanga ko kiani manga pakeanga ya föka deʼ ima ohiki, deʼ unanga wo peseke hi adono o wange itumunu.

¹²O bohoko o tonaka wa pëke-pëke o nyawa gënanga ko kiani ya pooteke deʼ o pakakaha wa sö sö ko kiani ya ihoro.

¹³Nako o nyawa gënanga wo togumu, ünanga ko kiani wo tama o wange tumidoli. Gënanga de iböto ünanga ko kiani wa föka ai pakeanga deʼ wo ma ohiki o jobubu uku, ho ünanga wo tebini.

¹⁴O wange tufange oka ünanga ko kiani wo ao o namodara ma gö o dutu hinoto ekola o pombo furu ma gö ma Jou Ai tau ma ngorana ma himangoka de wo hi döaka ma imam ika.

¹⁵Ma imam kokiani wohihuba ma totaleo o dutu moi mangale o baradoha ma apongo ma hu huba, deʼ o dutu moi oli mangale o hu huba ya tö tuhu-tuhuku. De hoko gënanga ma imam wo diai o nyawa gënanga ai debini ma upacara ma Jou Ai himangoka.

¹⁶Nako wo ma tengo o nauru wo hi hupu o nauru ma akere, ünanga kokiani wo ma ohiki mä ka hirahi wo pëseke hiadono o wange itumunu.

¹⁷O baranga okia dika o ngöere ekola o aiwani ma kai ya ko korona o nauru ma akere kokiani ya ihoro; o baranga gënanga i pëseke hiadono o wange itumunu.

¹⁸Ima ko röehe moi de iböto, kayaoa o nauru kayaoa o ngoheka ko kiani ima ohiki, ma önanga ka hirahi yo pëseke hi adono o wange itumunu.

¹⁹O ngoheka mo ma tengo ma go giria o mede imi daene, mo peseke ma dekana o wange tumidi. O nagona hönanga imi pëke münanga idadi yo peseke hi adono o wange itumunu.

²⁰Okia dika mö gögere ekola mö idu o ngoheka o mëde imi dae-daene idadi ipeseke.

²¹O nagona hönanga ya pëke ma rio mö idu-idu ekola mö gögere o ngoheka ma go giria o mede imi daene ko kiani ya foka manga pakeanga deʼ ima ohiki, deʼ önanga yo pëseke hi adono o wange itumunu.

²⁴Nako wo ma tengo o nauru o röehe moi de o ngoheka ma go giria o mede imi daene, o nauru genangö idadi wo peseke ma dekana o wange tumidi, deʼ o ngï wo idu-idu ö idadi ipëseke.

²⁵Nako o ngoheka mo ma tengo, o mede imi daenua de mo kopoa o wange muruono naga, ekola mo kopoa o mede imi daene ipaha ino, muna mo peseke ma dekana mo kopöa gënanga hoka maöraha munanga o mëde imi daene.

²⁶O ngï mö idu-idu ekola mö gö gögere o oraha ma dekanino gënanga idadi ipeseke.

²⁷O nagona hönanga ya pëke o ngï gënanga idadi oli yo pëseke. Onanga ko kiani ya foka manga pakeanga deʼ ima ohiki, deʼ önanga yo peseke hi adono o wange itumunu.

²⁸Itogumino mokopoa gënanga, o ngoheka gënanga kokiani motamä o wange tumidoli madekana. Genanga de iböto daha münanga mo tebini.

²⁹O wange matufangeoka münanga kokiani moao o namodara magö o dutu hinoto ekola o pombo furu magö ma imamika ma Jou Ai Tau ma ngorana ma himangoka.

³⁰O totaleo o dutu moi kokiani wohihuba mangale o baradoha ma apongo mahuhuba, deʼ o dutu moioli mangale o huhuba yatö tuhu-tuhuku. De madodagi hoko gënanga ma imam wodiai o ngoheka gënanga ami debini ma upacara ma Jou Ai himangoka.

³¹Ma Jou wï huloko o Musa wahidöaka o hohininga o Israel manyawa hupaya yohininga ihidodiai o oraha okia önanga yo peseke de o oraha okia kowali, hupaya önanga yapesekua ma Jou Ai Tau naga toönanga manga tau madoomu mahidogoronaka. Nako önanga yapeseke o tau gënanga, önanga aha yohonenge.

³²Hoko gënanga madatoro-madatoro mangale o nau-nauru kayotü tututu karana o nauru mapanyake ekola o nauru maakere ihupu,

³³mangale o ngongoheka magogiriaka o mede yadaene, deʼ mangale o nau-nauru imako röehe moi de o ngoheka magogiriaka o mede yä daene.