Read Tobelo O IMAMAT 17 Bible Online

O IMAMAT 17 - Tobelo bible

O IMAMAT 17

¹Ma Jou wï huloko o Musa

²wohidöaka o datoro-o datoro nënanga o Harunika, aingoha-ngohaka deʼ o Israel manyawa ingodumu.

³Nako o Israel manyawa womatengo wohihuba o hapi, o duba ekola o kabingi ma Jouika, o aiwani gënanga kokiani yatoaka ma Jou Ai Tau mangorana mahimangoka. Nako ünanga watoaka o ngï mahomoaka, ünanga watilakuru o tita karana wakopoa o awunu. Unanga iwi etongokaua ma Jou Madutu Ai umati.

⁵O pareta gënanga madungutu hupaya o Israel manyawa yäo ma Jou Ai Tauika mata-mata o aiwani ihi huba-huba mabiaha önanga yatoaka o dumuleoka. Onanga kokiani yäo o huhuba gënanga ma imamika ma Jou Ai Tau mangorana mahimangoka deʼ yatoaka genangokadau mangale o dame mahuhuba.

⁶Ma imam kokiani o aiwani ma awunu gënanga wohituagi o huhuba mangï magumurukika ma Jou Ai Tau mangorana mahimangoka daha mahaki yatuhuku hupaya mabounu yasanangi ma Jou Ai hininga.

⁷O Israel manyawa kokiani kahirahi yosetia ma Jouika deʼ hakali-kali yakunua yotoaka o aiwani o dumule-o dumuleika mangale ihihuba o gikiri-o gikiri madorouika. O datoro gënanga kokiani ihi ngounu kahi ado-adonika.

⁸Nako womatengo o Israeloka ekola womatengo o nyawa maporetino yogogere o Israel manyawa manga hidogoronaka ihihuba o huhuba yatö tuhu-tuhuku ekola o huhuba mahomoa

⁹ma Jouika, ünanga kokiani wohihuba ma Jou Ai Tau mangorana mahimangoka. Nako ünanga wohihuba o ngï mahomoaka, ünanga yaku-nokaua iwi etongo ma Jou Madutu Ai umati.

¹⁰ Nako imatengo o Israeloka ekola womatengo o nyawa maporetino yogogere o Israel manyawa manga hidogoronaka yaol̄omo o awunu, ma Jou aha wï hukumu ünanga deʼ yakunokaua iwi etongo Ai umati.

¹¹ Moi-moi o dodadi majiwa naga manga awunu magoronaka. Karana gënanga ma Jou wohipareta hupaya mata-mata o awunu ihi tuagi o huhuba mangï mal̄okuku hupaya o umati manga baradoha iehe. O awunu enagënanga o jiwa yaö ehe-ehe o baradoha.

¹²Genanga mahababu o Israel manyawa ekola o nyawa ma poretino yogogogere manga hidogoronaka yä duhunu o awunu yaol̄omo.

¹³Nako imatengo o Israeloka ekola imatengo o nyawa ma poretino yogogere toönanga manga hidogoronaka yatagoko o totaleo ekola o aiwani mahomoa ihoharamuua, önanga kokiani o aiwani gënanga ma awunu ihi hupu deʼ yopohuku deʼ o tonaka.

¹⁴Moi-moi o dodadi manga jiwa ganga manga awunu magoronaka, hababu gënanga ma Jou wäduhunu o Israel manyawa yaol̄omo o awunu. Moi-moi o nyawa yadodiai o manarama yaduhu-duhunu gënanga yakunokaua yä etongo ma Jou Madutu Ai umati.

¹⁵Moi-moi o Israel manyawa ekola o nyawa maporetino yaol̄omo o hiode ma akeme o aiwani ihonenge mahirete ekola yagoli o aiwani madorou hö ihonenge, kokiani yafoka manga pakeanga daha ima ohiki deʼ yotamä hiädono o wange itumunu, de ahao ünanga idadi wotebini.

¹⁶Nako ünanga wadiaiua gënanga, ünanga kokiani watagongo mabahaika.