Read Tobelo O IMAMAT 18 Bible Online

O IMAMAT 18 - Tobelo bible

O IMAMAT 18

¹Ma Jou wihuloko o Musa

²wohiadono o Israel manyawaika o pareta nënanga, ”Ngohi ma Jou nia Jou Madutu.

³Uha nia turu o Mesir manyawa manga manarama, o ngï ngini nigogogeroka, ekola o Kanaan manyawa genangika Ngohi aha tinï ao ngini.

⁴Nihingounu hagala Ahi tita deʼ nia diai okia Tohi popareta. Ngohi ma Jou nia Jou Madutu.

⁵ Nihi ngounu o datoro-o datoro deʼ hagala o tita Tohi döa-döakoka nginika. Nako ngini nidiai hoko gënanga, nia wowango ihalamati. Ngohi ma Jou.”

⁶Ma Jou wohi döaka o datoro-o datoro nënanga. Uha idadi o röehe moi de nia riadodoto manga ngohaka.

⁷Uha idadi o röehe moi de ngoni ayo, ani ama ngoi hekata, hababu munanga ani ama ai haku.

⁸ Uha nihikauku ani ama de madodagi nima röehe moi de moi ani ngoi hekata mahomoa.

⁹ Uha idadi o röehe moi de ngoni hiranga ekola ngoni hiranga o bobau, kayaoa moamoko o tau moi dede ngona kayaoa moamoko o tau mahomoaka.

¹⁰Uha idadi o röehe moi de ani danongo, gënanga aha nö diai o mal̄eke ani diri mahirete.

¹¹Uha idadi o röehe moi de ngoni hiranga nima ama moi ma nima ayo moiua ekola o ayo moi ma nima ama moiua, karana munangö kangoni hiranga.

¹² Uha idadi o röehe moi de ngoni owa, kayaoa ani ama ngoi hiranga, ekola ngoni ayo ngomi dodoto ekola ngomi riaka.

¹⁴Uha idadi o röehe moi de ani pepe ngoi hekata, karana munangö kangoni owa.

¹⁵ Uha idadi o röehe moi de ngoni hunungu

¹⁶ ekola ani riaka ngoi hekata.

¹⁷ Uha idadi o röehe moi de ami ngohaka ekola ami danongo o ngoheka momatengo nimadö dodiawoka. Yakunu idadi önanga ani dutu, deʼ gënanga o manarama ipatu-patutua.

¹⁸Ngoni hekata mahirete kamowangohi uha nokawingi de ani dodoto ngoi hekata.

¹⁹ Uha idadi o röehe moi de o ngoheka momatengo o mede ka imi daenohi, karana munanga naga mopesekuku.

²⁰ Uha idadi o röehe moi de o nyawa mahomoa manga hekata, o manarama gënanga yadiai ngona nopeseke.

²¹ Uha nihidöaka nia ngohaka imatengo ani mangale ihihuba ya huba o Molokhika, karana o manarama gënanga ihikauku ma Jou Madutu ai romanga, ani Jou.

²² O nau-nauru yakunua idadi o röehe moi de o nau-nauru; ma Jou Madutu wodohata o manarama gënanga.

²³ O nau-nauru kayaoa o ngongoheka, hakali-kali yakunua idadi o röehe moi de o aiwani; o manarama madorou gënanga inï peseke ngini.

²⁴Uha nia peseke nia diri de o manarama-o manarama gënanga, hababu de madodagi hoko gënanga hagala o nyawa yogogogere o Kanaan matonakoka yohira de ngini yapesekoka toönanga manga diri. Karana gënanga ma Jou wäduhu önanga hupaya ngini yakunu niö gögere o berera gënanga.

²⁵Onanga yadiaioka mata-mata o manarama haemo-emono gënanga, hiädono toönanga manga tonaka idadi ipeseke. Done ma Jou wähukumu önanga deʼ wahigumal̄aua önanga yogogere dokengoka. Mä ngini uha hakali-kali niadiai o manarama-manarama gënanga. Ngini mata-mata, o Israel manyawa deʼ o nyawa ma poretino yogogogere dede ngini, kokiani nihingounu o datoro deʼ ma Jou Aipareta,

²⁸hupaya ngini uha winï hukumu deʼ winï duhu o tonakoka gënanga hokä hagala o nyawa iwi nako-nakoua ma Jou, yogogo-gere dokengoka yohira de ngini.

²⁹Ngini nihi öriki o nagona honanga yadiai o manarama ha emo-emono gënanga yä etongokaua ma Jou Madutu Ai umati.

³⁰De ma Jou wotemo, ”Nihingounu o datoro-o datoro Tohi doä-döakoka deʼ uha nimä duru manga manarama hagala o nyawa yogogogere o Kanaan matonaka yohira de ngini. Uha nia peseke nia diri mahirete deʼ niadiai hagala o manarama gënanga. Ngohi ma Jou nia Jou Madutu.”