Read Tobelo O IMAMAT 19 Bible Online

O IMAMAT 19 - Tobelo bible

O IMAMAT 19

¹Ma Jou wï huloko o Musa

² wohiädono o pareta nënanga o Israel ma nyawaika, ”Kokiani ngini nitebini, karana Ngohi ma Jou nia Jou Madutu ganga Totebini.

³ Moi-moi o nyawa kokiani yä horomati manga ayo deʼ manga ama deʼ ihimulia o Sabat mawange hokä Tohipoparetaka. Ngohi ma Jou nia Jou Madutu.

⁴ Uha niahuba o gomanga. Uha nidiai o dulada o haaka ekola o gurasi deʼ niahuba. Ngohi ma Jou nia Jou Madutu.

⁵Nako ngini nihihuba o aiwani mangale o dame mahuhuba, nia moteke o datoro-o datoro Tohi döa-döakoka, hupaya o huhuba gënanga Tatarima.

⁶Ma akeme kokiani yaol̄omo mawange o aiwani gënanga ya toaka ekola yarehino mawange. Ma akeme mahouohi o wange ma hangeoka kokiani yatuhuku yamata-mataka, karana o aiwani ma akeme gënanga iharamu.

⁷Nako o aiwani ma akeme gënanga kaya ol̄omoli, o huhuba gënanga Ta tarimaua.

⁸O nagona honanga yaol̄omo o aiwani ma akeme gënanga ya-howono karana yäetongua okia ya tinga-tingakoka mangale Ngohi. O nyawa gënanga yakunokaua yäetongo hokä Ahi umati.

⁹ Nako ngini niütuku, o gandum iwango nia dumule madate-datekino uha nia utuku, deʼ uha nimakilioro mangale nia toomu o gandum mahou niutuku ipahaino.

¹⁰Uha nimakilioro nia angguru madumuleika mangale nia toomu o angguru mahohoko imal̄a-mal̄aika nia pagele madodihiraka hiraka ipahaika. Mahohoko itifa-tifa ukuokaö uha ngini nial̄ë. Genanga nia mal̄aika mangale o mihikini manyawa deʼ o nyawa ma poretino. Ngohi ma Jou nia Jou Madutu.

¹¹ Uha nitohiki, nitipu ekola nieluku.

¹² Uha nijaji deʼ to Ngohi ahi romanga nako ngini nia dumutua nia ganapu o jaji gënanga, hababu deʼ hoko gënanga ngini nihikauku Ahi romanga. Ngohi ma Jou nia Jou Madutu.

¹³ Uha nia hokoto nia dodiawo o nyawa ekola nia öra manga baranga. Imatengo yokarajanga nginioka manga hewa uha nia tümungu, ngaroka o hutu moi dika.

¹⁴ Uha nia lolai o nyawa yatotopongono deʼ uha nia kelenga uku o helewo o nyawa yopilo-piloko manga himangoka. Kokiani ngini nihi horomati deʼ nihï modongo Ngohino, hababu Ngohi nia Jou Madutu.

¹⁵ Ngini kokiani nitotiail̄e nako nia tailako yatiai ekola yahowono, uha niahiboa o mihikini manyawa deʼ uha nia modongo o kaya manyawa.

¹⁶Uha nia dohanga o fitana hagala o nyawa nimako hoana moi manga hidogoronaka, hupaya ngini nidadiua o hababu nia dodiawo o nyawa yohonenge. Ngohi ma Jou.

¹⁷ O nagonaika dika mauha o hininga nia gogono. De onagona dika niatiai niaributu, hupaya ngini nibaradohaua karana o nyawa mahomoa.

¹⁸ Uha niabalaha o hininga nima kogogono deʼ uha niadohata o nyawa mahomoa, mä niädora niadodiawo o nyawa hokä ngini nio dora nia diri mahirete. Ngohi ma Jou.

¹⁹ Nihingounu hagala Ahi pareta. Uha nihimol̄oka o aiwani marupa imakohowono. Uha nidatomo o rupa hinoto o gihihi o dumule moioka. Uha niapake o pakeanga yadodiai de o lawe o rupa hinoto.

²⁰Nako o nauru womatengo wojaji aha womi hukunu ngoi gilaongo o nauru mahomoaika la idadi ngoi hekata paliara, deʼ o nyawa womau womi ija-ija gënanga wofangu owahi, deʼ madutu wohira-hira idadi o röehe moi de magilaongo gënanga, önanga yahinoto kokiani yahukumu, mä yakunua yahukumu yahohonenge, hababu sarakia nagali ma o ngoheka gënanga kangoi gilaongohi.

²¹O nauru gënanga kokiani woao o duba manauru o dutu moi Ahi Tau mangorana mahimangoka mangale o rugi madagali mahuhuba.

²²Ma imam kokiani wohihuba o duba gënanga o debini ma upacara magoronaka hupaya o nyawa gënanga ai baradoha iapongo. Done Ngohi, ma Jou Madutu aha tï apongo.

²³Nako ngini niwohamoka o Kanaan mabereraika deʼ nidatomo dokengoka irupa-rupa o gota mahohoko haol̄o-ol̄omo, done ma dekana o taongo hange madodihiraka mahohoko kokiani ngini nia pulono iharamu deʼ yakunua ngini nia ol̄omo.

²⁴O taongo maiatoka mahohoko mata-mata kokiani nihihuba mangale nihinyata nia tarima kase Ngohino ma Jou.

²⁵O taongo mamotoaka de ahao ngini yakunu nia ol̄omo ma hohoko. Nako ngini niadiai o datoro gënanga mata-mata, nia gota mahohoko haol̄o-ol̄omo aha ihohoko iholoi iwoëoli. Ngohi ma Jou nia Jou Madutu.

²⁶ Uha nia ol̄omo o awunu. Uha niapake o guna-guna.

²⁷ Nia haëke magumurukino uha nia guti matadauru ekola nia kori nia parahi.

²⁸Uha nia paraha niakai la nia tuli-tulihi ekola nia roëhe nia topo-topoko hokä manonako nia hininga ihuha mangale o nyawa yo honenge. Ngohi ma Jou.

²⁹ Uha ni hi kauku nia ngoha-ngohaka o ngoheka manga baraguna nia diai önanga manga röehe ya huku-hukunu o gomanga ma tau oka. De nidiai hoko gënanga ngini nia peseke nia berera, deʼ hagala o manarama ipatu-patutua aha idogo-dogo genangokadau.

³⁰ Nihimulia o Sabat mawange deʼ nia horomati o ngï ya tinga-tingakoka mangale ihi huba Ngohi. Ngohi ma Jou.

³¹ Uha nioiki nigahoko o nasihati yogogumaterika yodadi o dodohanga de o nyawa yohone-honenge manga gurumini. Nako ngini niadiai gënanga ngini idadi nia peseke. Ngohi ma Jou nia Jou Madutu.

³²Niä dodato deʼ nia horomati o balu-baluhu. Kokiani ngini nihihoromati deʼ nihï modongo Ngohino, hababu Ngohi ma Jou.

³³ O nyawa maporetino yogogogere nia bereraka uha nia hidiai itorou.

³⁴Nia hidiai önanga hokä ngini ini hidiai nia hoana ma nyawa deʼ nia dora önanga hokä nio dora nia diri mahirete. Nio hohininga nginiö maniwangoka hokä o nyawa maporetino o Mesir mabereraka. Ngohi ma Jou nia Jou Madutu.

³⁵ Uha nia tipu o nyawa mahomoa deʼ nia pake o duduga, i hitiba-tibanga ekola ihi tuga-tuga madutua.

³⁶Nia pake o metere, ihi tiba-tibanga deʼ ihi tuga-tuga ma dutu. Ngohi ma Jou nia Jou Madutu, deʼ Ngohi tiniaoka ngini o Mesir mabereraka deʼ nihupu.

³⁷Nihi ngounu hagala o tita deʼ Ahi pareta. Ngohi ma Jou.”