Read Tobelo O IMAMAT 20 Bible Online

O IMAMAT 20 - Tobelo bible

O IMAMAT 20

¹Ma Jou wï huloko o Musa wohi nyata o hali nënanga o Israel manyawaika, ”Moi-moi o nyawa tingini nia hidogoronaka ekola o nyawa maporetino yogogogere nia hidogoronaka ihi huba-huba manga ngohaka o Molokhika, kokiani yongodumu o kawaha yakaweli de o helewo hiädono yohonenge.

³O nyawa ihi huba-huba manga ngohaka o Molokhika, ya peseke Ahi Tau deʼ ihikauku Ahi romanga itebi-tebini. Onanga aha Tä hukumu deʼ Ta etongokaua hokä Ahi umati.

⁴Nako o kawaha yatamunu manga lako o nyawa manga manaramika gënanga deʼ yähukumua önanga yahohonenge,

⁵done Ngohi mahirete tä hukumu önanga, ingodumu manga ngohaka deʼ manga hekata, ikali o nyawa mata-mata imakokomoteke dede önanga ihi mal̄aika Ngohi deʼ yahuba o Molokh. Onanga Tä etongokaua Ahi umati.

⁶O nyawa yoi-oiki yogahoko o nasihati yogogumaterika yodadi o dodohanga de o nyawa yohone-honenge manga gurumini aha Tä hukumu deʼ Tä etongokaua hokä Ahi umati.

⁷Nio goana hupaya ngini kahirahi nitebini, karana Ngohi ma Jou nia Jou Madutu.

⁸Nihi ngounu hagala Ahi tita, karana Ngohi ma Jou tinï tingakoka ngini mangale Ngohi.”

⁹ Ma Jou wohidöaka o datoro-o datoro nënanga, ”O nyawa yalolai manga ama ekola manga ayo kokiani yä hukumu yahohonenge.

¹⁰ Nako o Israel manyawa womatengo wohowono de o nyawa ima hoana moi ngoi hekata, ünanga deʼ o ngoheka gënanga kokiani yähukumu yahohonenge.

¹¹ O nauru womatengo idadi o röehe moi de ai ama ngoi hekata momatengo ani, waora ai ama ai haku. O nauru deʼ o ngoheka gënanga kokiani yähukumu yahohonenge. Onanga yohonenge karana manga howono mahirete.

¹² Nako o nauru womatengo idadi o roëhe moi de ngoi hunungu, o nyawa yahinoto gënanga kokiani yähukumu yahohonenge. Onanga yohowonoka, deʼ yohonenge karana manga howono mahirete.

¹³ Nako o nauru womatengo idadi o röehe moi de o nauru ma homoa, önanga yodiai o manarama i pese-peseke deʼ ipatu-patutua, deʼ yahinoto kokiani yähukumu yahohonenge. Onanga yohonenge karana manga howono mahirete.

¹⁴ Nako o nauru womatengo wokawingi deʼ o ngoheka moma tengo ikali de o ngoheka gënanga ngomi ayo, yaruangeö kokiani yätuhuku hiädono yohonenge, karana önanga yodiai o manarama ipatu-patutua. O manarama marupa hoko gënanga yakunua naga tingini nia hidogoronaka.

¹⁵ Nako o nauru womatengo idadi o röehe moi de o aiwani, o nyawa deʼ o aiwani gënanga kokiani yatoma.

¹⁶Nako o ngoheka momatengo idadi o röehe moi deʼ o aiwani, o ngoheka deʼ o aiwani gënanga kokiani yätoma. Onanga yo honenge karana toönanga manga howono mahirete.

¹⁷ Nako o nauru womatengo idadi o röehe moi de ngoi hiranga ekola ngoi hiranga o ama moi mä o ayo moiua ekola o ayo moi ma o ama moiua, önanga yakunokaua ya etongo hokä Ahi umati. Onanga yodiaioka o manarama ipatu-patutua deʼ kokiani yatagongo mabahaika.

¹⁸ Nako o nauru womatengo idadi o röehe moi deʼ o ngoheka momatengo magogiria o mede imidaene, önanga yakunokaua yaetongo hokä Ahi umati.

¹⁹ Nako o nauru womatengo idadi o röehe moi deʼ ngoi owa, o dodilakuru gënanga mabahaika kokiani yahinoto yatagongo.

²⁰Nako o nauru womatengo idadi o röehe moi deʼ ai pepe ngoi hekata, ünanga wihikauku ai pepe. O nauru deʼ o ngoheka gënanga kokiani yatagongo mahukumanga. Hiädono yohonenge önanga yamakeua o ngohaka.

²¹ Nako o nauru womatengo womä gora ai dodoto ngoi hekata, Unanga wihikauku ai dodoto deʼ wadiai o manarama ipatu-patutua patutua. Hiädono yohonenge yamakeua o ngohaka.”

²²Ma Jou wätemo, ”Nihingounu Ahi tita deʼ Ahi pareta mata-mata, hupaya ngini tinï duhuua o Kanaan mabereraka, kiaika Ngohi tinï ao ngini.

²³Uha nimä duru o nyawa yogogogere dokengoka manga adati de manga biaha. Ngohi tä emono önanga de hagala manga manarama ito torou. Ma hababu gënanga önanga yä duhu, hupaya ngini yakunu nio ngohama o berera gënanga.

²⁴O tonaka ikaya-kaya deʼ iboburere gënanga Tinihi jajioka nginika, hoʼ Tinihi döaka nginika idadi tingini madutu. Ngohi ma Jou nia Jou Madutu tinï tinga-tingakoka ngini deʼ o hoana deʼ o berera mahomoa manyawa.

²⁵Mangale karana gënanga ngini kokiani nihilihowono de madiai o aiwani ihoharamu deʼ ihoharamuua. Uha nia ol̄omo o aiwani ihoharamu. O aiwani gënanga Tohi nyata iharamu, hoʼ nako ngini nia ol̄omo ngini nidadi nipeseke.

²⁶Ngini Tinï tingakoka deʼ hoana deʼ o berera mahomoa ma nyawa hupaya nidadi Tongohi madutu. Ngini kokiani nitebini karana Ngohi ma Jou, deʼ Ngohi totebini.

²⁷Moi-moi o nauru ekola o ngoheka yodiai o dodohanga de o nyawa yohone-honenge manga gurumini kokiani yakaweli de o helewo hiädono yohonenge. O nyawa gënanga yohonenge karana manga howono mahirete.”