Read Tobelo O IMAMAT 21 Bible Online

O IMAMAT 21 - Tobelo bible

O IMAMAT 21

¹Ma Jou wï huloko o Musa wohiädono o pareta nënanga o imam-imamika o Harun aidifauku, ”O imam womatengo yakunua wapeseke ai diri karana wö himanga wanïki ai riadodoto yä lungunu maupacara,

²sowaliua nako yohone-honenge gënanga ngoi ayo, ai ama, ai ngohaka, ai riaka de ai dodoto o nauru

³ekola ai biranga yokawi-kawingowahi, deʼ yogogere o tau moi dede ünanga.

⁴Yakunua wapeseke ai diri de wanïki ngoi hekata ami riadodoto yalungunu maupacara.

⁵ O imam womatengo yakunua watoongoro ai haëke mahononga deʼ yakunua waguti ai parahi ekola watopo-topoko ai röehe de o baranga madoto-doto mangale wohidumutu ünanga magogiria ai hininga ihuha.

⁶Unanga madutu Tongohi tïtingakoka yakunua wapeseke Ahi romanga. Unanga wohihuba o huhuba o inomo Ngohino, hoʼünanga kokiani wotebini.

⁷O imam womatengo yakunua wokawingi de o ngoheka momatengo tengo mahira ami röehe mahuku-hukunu ekola momatengo o ngoheka o moholehe maboroua ekola mohelekonoka, karana o imam ganga Tongohi madutu.

⁸O Israel manyawa kokiani ihi goungu o imam hokä o nyawa yatatinga-tingakoka mangale Ngohi karana ünanga wohihuba o huhuba o inomo Ngohino. Ngohi ma Jou; Ngohi nënanga totebini deʼ Ngohi tatebini Ahi umati.

⁹Nako ma imam womatengo ngoi ora modadi o ngoheka ami roëhe mahuku-hukunu munanga mihikauku ami ama deʼ kokiani imi hukumu hiädono mohonenge.

¹⁰Ma Imam wo Amo-amoko iwi tabisoka de madodagi iwihituagi o upacara maminya ai haëkuku deʼ iwihinoa unangika o imam wo Amo-amoko ai pakeanga. Karana gënanga ünanga yakonua wa mal̄aika ai tadauru ihuta-hutaino ekola wakakihi ai pakeanga hokä manonako ünanga ai hininga ihuha.

¹¹Unanga iwihihubaka Ngohino mangale wodadi Togohi madutu, hoʼ yakunua wapeseke ai diri. Unanga yakunuali wapeseke Ahi Tau genangino deʼ wohupu mangale wowohama o tau naga deʼ mamaiyeti, ngaroko gënanga ai ama ai mayeti ekola ngoi ayo mahirete ayo mahirete.

¹³Unanga duga-duga yakunu wokawingi deʼ momatengo o moholehe maboro ai hoanino mahirete. Unanga yakunua wo kawingi deʼ momatengo o babao, ekola o ngoheka momatengo mohelekonoka ekola o ngoheka mo matengo mahira ami röehe mahuku-hukunu.

¹⁵Nako ünanga watilakuru o datoro gënanga, aingoha-ngohaka kokiani yotebini done aha yopeseke. Ngohi ma Jou deʼ Ngohi tï tingakoka ünanga wodadi o Imam wo Amo-amoko.”

¹⁶Ma Jou wï hipareta o Musa

¹⁷mangale yahetongo nënanga o Harunika, ”Womatengo ani difauku ai röehe deʼ maboditoka yakunua wohihuba-o huhuba o inomo Ngohino. Genanga imoteke kahi ado-adonika.

¹⁸O nyawa ihi huba-huba o huhuba yakunua manga röehe de ma boditoka, enagënanga yopiloko ekola yolugu, o nyawa manga biono de ma boditoka ekola ai röehika,

¹⁹manga giama ihonenge ekola manga l̄ou isuga,

²⁰yohugu-hugu ekola yopö poluluku, manga lako yohiri-hiri ekola yä pado-pado deʼ yä kokabirioka.

²¹Moi-moi ma Imam Harun aidifauku manga röehe deʼ ma boditoka yakunua ihihuba o inomo Ngohino.

²²Mä önanga yakunu yaol̄omo o inomo ihihuba-huba, kayaoa o huhuba o inomo itebi-tebini kayaoa o inomo duru itö tebi-tebini.

²³Karana o nyawa gënanga ai röehe deʼ maboditoka, ünanga yakunua wohitigi o guba ihitö tinga-tingakoka o Ngï i Tebi-tebini ekola o huhuba mangï. Unanga yakunua wapëseke o bara-baranga yatö tinga-tingakoka mangale Ngohi, karana Ngohi ma Jou deʼ Ngohi tatö tinga-tingakoka o bara-baranga gënanga.”

²⁴Genanga doka o datoro-o datoro o Musa wohiädono o Harunika ikali ai ngoha-ngohaka, deʼ o Israel manyawaika yongodumu.