Read Tobelo O IMAMAT 22 Bible Online

O IMAMAT 22 - Tobelo bible

O IMAMAT 22

¹Ma Jou wïhuloko wohiädono o pareta nënanga o Harunika deʼ ai ngoha-ngohakika, ”Nihidiai deʼ mapatutu okia ihi huba-huba o Israel manyawa itingakoka mangale Ngohi, hupaya ngini nia pesekua Ahi romanga itebi-tebini. Ngohi ma Jou.

³Nako womatengo ani difauku woma hidepesekuku deʼ womahitigi o huhuba itebi-tebinika yatö tinga-tingakoka o Israel ma nyawa mangale Ngohi, ünanga yakunokaua woleleani o huhuba ma ngïoka. O datoro gënanga ipake kahi ado-adonika. Ngohi ma Jou.

⁴Womatengo o Harun aidifauku wopanyake iwipado, ekola o ngoheka mapanyake hiädono kawotututoka, iwï duhunu waol̄omo o huhuba itebi-tebini nako ünanga wapeke okianaga moi ipese-peseke karana iwikorona o maiyeti. Unangö wopeseke nako tonauru ma akere ihupu,

⁵ekola wapeke o aiwani ekola o nyawa yopese-peseke.

⁶O imam womatengo de madodagi okia dika wopeseke, hiädono o wange itumunu kahirahi wopëseke. deʼ o wange matumidoka ünanga yakunuahi waol̄omo o inomo ihi huba-huba ma Jouika nako ünanga woma ohikowahi.

⁷O wange itumunoka ünanga wotebini deʼ yakunu waol̄omo, karana gënanga ai inomo.

⁸Unanga iwï duhunu waol̄omo o aiwani ena mahirete ihonenge ma akeme ekola o aiwani madorou yagoli. Nako ünanga womä ol̄omo, ünanga idadi wopeseke. Ngohi ma Jou.

⁹Mata-mata o imam kokiani ihi ngounu o datoro-o datoro Tohi dö döa-döakoka. Nako kowali, önanga yahowono deʼ aha yohonenge, karana yatilakuru o datoro-o datoro itebi-tebini gënanga. Ngohi ma Jou, deʼ Ngohi tätingaka önanga mangale Ngohi.

¹⁰O huhuba itinga-tingakoka mangale Ngohi yakunu yaol̄omo duga-duga ma imam gënanga mahirete deʼ ngoi hekata deʼ aingohaka; o nyawa mahomoa yakunua yaol̄omo, ngarokä o nyawa gënanga ima tau moi deʼ ma imam gënanga ekola ai hewa manyawa.

¹¹Mä o gogilaongo wä ija-ijaino ma imam gënanga deʼ ai tiwi mahirete ekola imakil̄au ai tau magoronaka, yakunu ya ol̄omo o inomo ma imam gënanga ai hidoku.

¹²Ma imam ngoi ora momatengo mokawingi deʼ womatengo ma imamua, yakunua maol̄omo o huhuba gënanga.

¹³Mä ma imam ngoi ora mofao-faoka ekola momahelekonoka deʼ amingohaka koiwa daha molio ami ama ai tauika inoli idadi ai momoku, yakunu maol̄omo o inomo ami ama ai hidoku. Duga-duga ma imam manga hekata deʼ manga ngohaka dika yakunu yaol̄omo o hu-huba gënanga.

¹⁴Nako imatengo ma imam ai tau madol̄aua deʼ yohangajaua yaol̄omo o inomo ihi huba-huba ma Jouika, önanga kokiani ihi döaka madagali ma imamika deʼ yodogo yaregu o ratuhu moi o regu motoa.

¹⁵O imam-imam yakunua yapeseke ihi huba-huba yatinga-tingakoka mangale Ngohi

¹⁶yahigumal̄a o nyawa manga haku koiwa-iwa yaol̄omo. O hali gënanga yadiai o nyawa geönanga yahowono deʼ yadotagao o hukumanga onangika. Ngohi ma Jou, deʼ Ngohi tatebini o huhuba gënanga.”

¹⁷Ma Jou wï hüloko o Musa

¹⁸wahi döaka o Harun deʼ ai ngoha-ngohakika deʼ ingodumu o Israel ma nyawaika o datoro-o datoro nënanga. Nako imatengo o Israel manyawa ekola womatengo maporetino yogogere o Israel mabereraka ihihuba o huhuba yatö tuhu-tuhuku mangale yafangu manga jaji ekola mangale o huhuba o hininga mahuka, o aiwani gënanga kokiani manauru deʼ yakunua maröehe de maboditoka hupaya yakunu Ta tarima.

²⁰ Uha ihihuba o aiwani maröehe deʼ maboditoka, hababu ma Jou woluku watarima.

²¹Nako imatengo ihihuba ma Jouika o dame mahuhuba mangale yo fangu manga jaji ekola mangale o huhuba o hininga mahuka, o aiwani gënanga yakunua naga deʼ maboditoka hupaya yakunu Watarima.

²²Uha ihihuba ma Jouika o aiwani ipilo-piloko, makobongo itobikoka ekola yal̄abo, deʼ maborohoka, makai deʼ mapanyakeoka ekola iako-ako. O aiwani hoko gënanga uha ihi huba mangale o huhuba o inomo o huhuba mangï mal̄okuoka.

²³Mangale o huhuba o hininga mahuka ngini yakunu nihihuba o aiwani madüku itotomua; mangale yofangu o jaji, o aiwani hoko gënanga Watarimaua.

²⁴Uha nihihuba ma Jouika o aiwani mamui ihi dobilatu hoʼ iboditoka, yaluiti, magoronaka yal̄abo ekola yaumoka. O hali gënanga yakunua idadi nia bereraka.

²⁵O gigini o nyawa maporetino inihi döa-döakino yakunua nihihuba mangale o huhuba o inomo. O aiwani gënanga nia pulono deʼ maboditoka deʼ yakunua Watarima.

²⁶O hapi mangohaka, o duba mangohaka ekola o kabingi ma ngohaka dahaö imahiadonino kokiani igö gogerohi deʼ ma ayo o wange tumidi madekana. Deʼ ipahaika dahaö o aiwani gënanga yakunu Watarima mangale o huhuba o inomo.

²⁸Uha nihihuba o hapi ma ayo ekola o kabingi kamamoi deʼ ma ngohaka mawange kaima daene.

²⁹Nako ngini nihihuba o sukur mahuhuba ma Jouika, niadiai gënanga imamoteke o datoro hupaya nia huhuba Watarima.

³⁰Nia ol̄omo o huhuba gënanga o wange gënanga dika, deʼ ka mahuhutulö mauha nia mal̄aika mangale yarehe mawange.

³¹Ma Jou wätemo, ”Nihingounu hagala Ahi pareta; Ngohi ma Jou.

³²Uha nia peseke Ahi romanga itebi-tebini. O Israel manyawa yongodumu kokiani ihihuba Ngohi hokä Duru To tebi-tebini. Ngohi ma Jou deʼ Ngohi tinihidadi ngini nitebini.

³³Ngohi tinï ao ngini o Mesir mabreraka deʼ Tihihupu, hupaya Ngohi todadi nia Jou ma Dutu. Ngohi ma Jou.”