Read Tobelo O IMAMAT 24 Bible Online

O IMAMAT 24 - Tobelo bible

O IMAMAT 24

¹Ma Jou wï huloko o Musa

²wohi döaka o pareta-pareta nënanga o Israel manyawaika: ya oa o zaitun ma minya madutu deʼ duru maoa-oa mangale o hilo hupaya yakunu yatuhuku deʼ kai wango-wango gogogere.

³O Harun kokiani watatoro o hilo-o hilo gënanga o bimaoa hiädono o ngorumino o ngï kiaka ma Jou wohimangino, o guba ma poretoka ihi tamu-tamunu o Jaji ma Peti o Ngï Duru iTebi-tebinoka. O pareta gënanga kokiani nia diai kahiädo-adonika.

⁴O Harun kokiani wohi dailako hagala o hilo yadodiai deʼ o gurasi madutu mahilo mal̄ouoka hupaya kahirahi i wango-wango ma Jou Ai Tau magoronaka.

⁵ Nia l̄ë o tarigu duru maoa-oa o kilo ngimoi deʼ hinoto deʼ nia diai o roti mahohululunu ngimoi deʼ hinoto, o gahumu moi o tarigu o kilo moi.

⁶Nia kelenga o roti gënanga o datoro hinoto, o datoro moi o roti butanga, o meja malape o gurasi mal̄okuoka naga ma Jou Ai Tau magoronaka.

⁷Nio gelenga o manyanyi madutu o rotiuku o datoro yö getongo mangale ihi nonako o roti gënanga o huhuba o inomo mangale ma Jou.

⁸O Sabat mawange magetongo naga o roti yadodiaiukuoka ma Jou Ai Tau magoronaka. Genanga doka o Israel manyawa kokiani yadiai kahi ädo-ädonika.

⁹ O roti gënanga ganga mangale o Harun deʼ aidifauku. Onanga kokiani ya ol̄omo o ngï ma debi-debinoka, karana o roti gënanga marupa o huhuba o inomo mahidoku duru itö tebi-tebini ihihö huba-huba ma Jouika mangale hagala o imam.

¹⁰O Israel manyawa manga Tau madoomuoka naga o nauru womatengo. Ai ama o Mesir manyawa deʼ ngoi ayo o Israel manyawa ami romanga o ngo Selomit, o Dibri ngoi ora o Dan ai hoanino. O wange moiuku nyawa gënanga ima ributu deʼ woma tengo o Israel manyawa manga Tau madoomuoka. Maöraha i maributu, ünanga wï lolai ma Jou Madutu, karana gënanga o Israel manyawa iwi ao ünanga wï himanga o Musa,

¹²deʼ iwi tumunguku ünanga deʼ ikali yodamä ma Jou Ai putuhu yakorona okia kokiani önanga yodiai unangika.

¹³Ma Jou wïtemo o Musaika,

¹⁴”Niwi ao o nyawa gënanga o Tau madoomuoka wohupu. O nyawa yoihe-ihenoko ünanga wololai, kokiani yogelenga manga giama o nyawa gënanga ai häekuku mangale ihi döaka o hakihi ünanga wahowono. Daha i ngodumu o kawaha kokiani iwi kaweli ünanga deʼ o helewo hiädono wohonenge.

¹⁵Genanga deʼ iböto nënanga nihingahu o Israel manyawaika: O nagona honanga iwi lolai ma Jou Madutu kokiani ya tagongo hiädono mabaha,

¹⁶deʼ yähukumu yä hohonenge. O nagona dika iwi lolai ma Jou kokiani ingodumu o jemaat yä kaweli deʼ o helewo hiädono yohonenge. O tita gënanga ipake mangale o Israel manyawa kayaoa o nyawa maporetino yogogogeroka o Israel mabereraka.

¹⁷ O nagona honanga yä toma o nyawa mahomoa kokiani yä hukumu ya hohonenge.

¹⁸O nagona honanga yatoma o nyawa mahomoa manga aiwani, kokiani yatagali. Matiti enagënanga ’O jiwa madagali o jiwa.’

¹⁹Nako ima tengo yodiai o nyawa mahomoa yobodito, okia dika yadodiaioka, kokiani yadiai ö unangika.

²⁰ Nako önanga yatobiki manga kobongo, done manga kobongö ma kokiani yatobiki. Nako önanga yadiai o nyawa mahomoa manga lako mahononga ipiloko, done manga lako ma kokiani mahononga yapiloko. Nako önanga yä gohara o nyawa mahomoa hiädono manga ingiri itobiki, done manga ingiri ma kokiani yatobiki. O kia dika yodiai hiädono o nyawa mahomoa manga röehe ibodito, kokiani onangikaö yodiai hokä mabalaha.

²¹O nagona honanga yatoma manga aiwani kokiani yatagali, mä o nagona honanga yä toma o nyawa kokiani yähukumu yä hohonenge.

²² O tita gënanga idadi mangale ngini mata-mata deʼ o nyawa maporetinoö yogogogere nia hidogoronaka karana Ngohi ma Jou, nia Jou Madutu.”

²³O Musa wohiädono o ade-ade gënanga o Israel manyawaika deʼ iböto, önanga iwi ao o nyawa wï lololaioka ma Jou Madutu yohupu o Tau madoomuoka daha iwi kaweli deʼ o helewo hiädono wohonenge. De madodagi hoko gënanga o Israel manyawa yadia o kia wohi popareta ma Jou o Musaika.