Read Tobelo O IMAMAT 25 Bible Online

O IMAMAT 25 - Tobelo bible

O IMAMAT 25

¹ O Sinai mal̄okuoka ma Jou wï temo-temo o Musaika deʼ wï huloko ünanga

²wohiädono o datoro-o datoro nënanga o Israel manyawaika. Nako ngini ni wohama o bereraika aha ma Jou winihi döaka nginika, ngini kokiani niwi horomati ma Jou deʼ madodagi nënanga. O taongo matumidoka ihi geto-getongo ngini yakunua nia karajanga nia tonaka mangale nidatomo.

³O taongo butanga madekana kokiani ngini niö datomo nia dumule, nia angguru mautu madumuleoka niö boporo deʼ nia toomu nia tonaka mahasili.

⁴Mä o taongo matumidoka ihi geto-getongo niö dingaka mangale ma jou. Hoʼ o taongo gënanga magurutu kokiani nia mal̄aika deʼ yakunua nia karajanga. Uha niö datamo nia dumule deʼ uha nia angguru mautu o dumuleoka niö boporo.

⁵Ma boboloi o gandum iwö wango-wango ena mahirete ekola o angguru nia angguru mautu ipö poporua, yakunua ngini nia toomu deʼ nia gogono, hababu o taongo gënanga ganga o dodogumu ma taongo mangale o tonaka.

⁶Ngarokä hoko gënanga, o tonaka gënanga aha ka ihi döaka mahasili mangale imadadi o inomo mangale ngini, nia go gilaongo, nia hewa manyawa, deʼ o nyawa maporetino yo gogogere dede ngini.

⁷Hagala nia giginiö deʼ hagala o aiwani i huhuhuku nia bereraka. Hagala ihi hasi-hasili o tonaka gënanga yakunu nia ol̄omo.

⁸Nia etongo o taongo tumudi nihigali matumidi, mangöe o taongo moruata deʼ hiwo.

⁹Deʼ o wange mangimoioka o mede matumidoka, enagënanga o baradoha ma apongo mawange, nia huloko o nyawa yowuwu o trompet la mailingi kiaika honanga o berera yamode-modekika.

¹⁰Ngini kokiani nihi tingaka o taongo moritoa gënanga, deʼ nihi ngahu o bebasi yongodumu o berera manyawaika. O taongo gënanga magoronaka hagala nia arata nia huku-hukunoka kokiani nihigilio madutu yohira-hiraika ekola aingohaka deʼ ai donongika. O nagona yahukunuka hoka o gilaongo kokiani yahigilio manga riadodotoika.

¹¹Uha nio datomo o dumule. O gandum iwango-wngo ëna mahirete ekola o angguru mahohoko nia angguru madumuleoka ipö poporua yakunua ngini nia toomu deʼ nia gogono.

¹²O taongo gënanga marupa o taongo itebi-tebini mangale ngini. Ngini yakunu nia ol̄omo duga-duga o kia naga i wango-wango ena mahirete nia dumuleoka.

¹³O taongo gënanga magoronaka mata-mata o tonaka ihuku-hukunoka kokiani ihigilio madutu yo hira-hiraika.

¹⁴Hoʼ nako ngini nihukunu o tonaka nia dodiawoika o Israel manyawa, ekola nia ija o tonaka unangoka, uha nimakubukunu gënanga deʼ nia hininga irikotua.

¹⁵O tonaka maija gënanga kokiani nihi tatapu imamoteke mangöe mataongo madekanino o tonaka gënanga yakunu ihi hasili hiädono o Higilio mataongo moioli.

¹⁶Nako magegetongo mataongo iwöe, o tonaka ma ija gënanga ihali. Mä nako mataongo magegetongo mahuhutulu, ma ija kokiani imura, karana ihukunu ganga yaetongo ma hasili.

¹⁷Uha nia tipu nia dodiawo o Israel manyawa, mä kokiani ngini niwï modongo ma Jou nia Jou Madutu.

¹⁸Nihi ngounu mata-mata ma Jou Ai tita deʼ Aipareta, hupaya ngini niwango nirïdi nia bereraka gënanga.

¹⁹O berera gënanga matonaka aha ihi döaka mahasili hiädono ngini deʼ nia inomo ini wedo-wedono deʼ nigogere dokengoka deʼ mahalamati.

²⁰Mä mudukua naga yoleha okia aha mia ol̄omo o taongo ma tumidoka maöraha manga tonaka yodatomua deʼ mahasili yal̄ëua.

²¹O taongo mabutanga magoronaka ma Jou aha wohi barakati o tonaka hiädono mahasili o taongo hangeino inï wedono.

²²deʼ maöraha ngini niö datomo nia dumule o taongo ma tufangeoka, nia utu-utukino o taongo mabutangaka kanagahi mangale ngini ni ol̄omo. Ma boboloioli nia inomo nimagö gogonika aha kai niwedono hiädono maöraha yadono ngini nia toomu nia hasili o taongo gënanga.

²³Nia tonaka yakunua nia hukunu ihi gila-gila, hababu o tonaka gënanga madutu koti nginiua, madutu duga-duga ma Jou Madutu. Ngini duga-duga hokä o nyawa maporetino ini higumal̄a mangale nia pake o tonaka gënanga.

²⁴Nako nia tonaka o löa moi nia hukunu, kokiani nihi goungu madutu wohira-hira ai haku watuhuhu o tonaka gënanga.

²⁵Nako womatengo o Israel manyawa womihikini hiädono pakisa ünanga wahukunu ai tonaka, ai riadodoto duru yadö dutu-dutu kokiani yatuhuhu o tonaka gënanga.

²⁶Nako moiua manyawa mangale yatuhuhu mä matonaka madutu gënanga maduruino kawa hukunu deʼ ai tiwi yadono mangale watuhuhu ai tonaka,

²⁷done ünanga kokiani wofangu ai tonaka waija-ijaika deʼ ma ija imoteke o tonaka gënanga mahasili o taongo muruono ma himangika hiädono o Higilio mataongo aha i boa-boa. Deʼ hoko gënanga ünanga yakunu wakilio tounanga ai tonaka.

²⁸Mä nako ünanga wakunua watuhuhu ai tonaka, o nyawa wo ija-ija kahirahi wakuaha o tonaka gënanga hiädono o Higilio mataongo moioli. O taongo gënanga magoronaka o tonaka gënanga kokiani ihigilio madutu wohira-hiraika.

²⁹Nako ima tengo ani yahukunu manga tau o gahumu moi o kota magoronaka ihi gilolitino o bebeno o mehele, done önanga deʼ manga haku yatuhuhu manga tau maöraha o taongo moi ma goronaka mulaenge i etongo mawange yahükunu deʼ i hikaino.

³⁰Ma nako o tau gënanga o taongo moi yadono deʼ yatuhuhua ihihanga manga haku mangale yatuhuhu. O tau gënanga kahirahi madutu o nyawa wo ija-ija deʼ aidifauku. O Higilio ma Taongo magoronaka, o tau gënanga ihigilioua.

³¹Mangale o tau o kapo-kapongika ihi gilolitinoua o bebeno o mehele madatoro imaketero hokä o tonaka madatoro; madutu yo hira-hira manga haku yatuhuhu deʼ o tau gënanga kokiani i higilio o Higilio ma Taongo magoronaka.

³²Mä o Lewi manyawa o öraha okia dika manga haku yatuhuhu toönanga manga arata hagala o kota ihi totatapuoka toönanga manga kota.

³³Nako o Lewi manyawa womatengo wahukunu ai tau o kota moi ani magoronaka gënanga deʼ ünanga watuhuhua, o tau gënanga kokiani ihi gilio unangika o Higilio ma Taongo magoronaka. Hababu o Lewi manyawa manga tau hagala toönanga manga kotaka ganga kahirahi toönanga madutu o Israel manyawa manga hidogoronaka.

³⁴Mä o momo o tonaka malua-luasoka o Lewi manga hoana manga gilolitino yakunua yahukunu. Enanga ganga kahi ädo-ädonika to Lewi manyawa.

³⁵ Nako o nyawa nia hoana moi yogogere nia hidogoronaka yomihikini deʼ wakunua wapaliara ai wowango, ngini kokiani niwi riwo ünanga hokä maporetino ekola o dagi-dagino, hupaya ünanga yakunu wowango i gila-gila nia hidogoronaka.

³⁶ Okia naga niwihibau unangika uha niö gahoko ma bunga, mä kokiani ngini niwi modongo ma Jou Madutuika, deʼ ni wi mal̄aika o nyawa gënanga wowango nia hidogoronaka. O inomo niwï buku-bukunu unangika uahaoli nia l̄ë o utumu.

³⁷

³⁸Genanga ma Jou nia Jou Madutu Aipareta winï ao-aoka o Mesir mabereraka deʼ nihupu mangale o Kanan maberera winihi döaka nginika, hupaya Unanga wo dadi nia Jou Madutu.

³⁹ Nako o nyawa nimako höana moi yogogere nia hidogoronaka yomihikini hiädono ünanga wahukunu ai diri hokä o gilaongo nginika, o nyawa gënanga yakunua ngini niwi huloko wadiai o gilaongo makarajanga.

⁴⁰Unanga kokiani wogogere nginioka hokä o hewa manyawa womatengo deʼ wo karajanga mangale ngini hiädono o Higilio ma Taongo.

⁴¹O öraha gënanga ünanga deʼ ai ngoha-ngohaka yakunu ya mal̄a nia tau deʼ imakilioro manga riododotika deʼ manga ete deʼ manga tohora manga tonakika.

⁴²O Israel manyawa ganga ma Jou Ai gogilaongo ge Unanga doka wa ao önanga o Mesir mabereraka deʼ yohupu deʼ karana gënanga önanga yakunua yähukunu hokä o gilaongo.

⁴³Hoʼ o Israel manyawa yahuku-hukunu manga diri nginiika yakunua nia dodorohu. Kokiani ngini niwï modongo nia Jou Madutuika.

⁴⁴Nako ngini niparalu o gilaongo, ngini yakunu nimä ija o hoana manyawa yogogogere ini kokilolitino.

⁴⁵Yakunoli ngini nimä ija o nyawa maporetino manga ngoha-ngohaka yogogere yotatapu nia hidogoronaka. O nyawa ma poretino manga ngoha-ngohaka ima kokil̄au nia bereraka yakunu tingini madutu,

⁴⁶deʼ yakunoli nia hipuhaka nia ngoha-ngohakika mangale yodadi toönanga manga gilaongo manga ngango magurutu. Mä nia dodiawo o Israel manyawa yakunua ngini nia dodorohu.

⁴⁷Nako womatengo o nyawa maporetino wogö gogogere nia hidogoronaka wodadi wokaya, deʼ naga nia dodiawo o Israel manyawa womihikini hiädono ünanga wahukunu ai diri hokä o gilaongo o nyawa maporetinoika gënanga ekola ai riadodotika,

⁴⁸o Israel manyawa kahirahi deʼ ai haku mangale iwi tuhuhu. Womatengo ai riadodoto o nauru,

⁴⁹ekola ai pepe, ekola ai riadodoto o ete moi ekola o nyawa mahomoa ai riadodoto ma dutu-dutuino, yakunu wï tuhuhu. Ekola nako ünanga mahirete womä gakunu, ünanga yakunu wa tuhuhu ai diri mahirete.

⁵⁰O gilaongo gënanga kokiani ima ade-ade ima tatoro deʼ o nyawa wi ija-ijaoka. Onanga kokiani ya etongo mangoë mataongo ka dema dero wahukunu ai diri hokä o gilaongo hiädono o Higilio ma Taongo moioli, daha ihi tantu ai duduhuhu ma ija. Ma ija gënanga kokiani ihi tatapu imoteke o gaji magegetongo yahi döa-döaka o hewa manyawaika.

⁵¹O gilaongo gënanga kokiani wohigilio ai diri ma ija ma amoko ya etongo womatengo o hewa manyawa ai gaji madekanino mataongo womanaramöwahi,

⁵²

⁵³ma tero hokä ünanga wokarajängoka hokä o hewa manyawa i wihi gaji deʼ mataongo. Ai tuanga yakunua widodorohu.

⁵⁴Nako ünanga wakunua woma tuhuhu deʼ madodagi gënanga, ünanga deʼ aingoha-ngohaka kokiani yahi bebasi o Higilio ma Taongo moioli magoronaka.

⁵⁵O Israel manyawa womatengo yakunua wodadi o gilaongo ai ngango magurutu karana o Israel manyawa gënanga ma Jou Ai gogilaongo. Ma Jou wa ao oka önanga o Mesir mabereraka deʼyohupu. Unanga ma Jou toönanga manga Jou Madutu.