Read Tobelo O IMAMAT 26 Bible Online

O IMAMAT 26 - Tobelo bible

O IMAMAT 26

¹ Ma Jou wätemo, ”Uha nidiai o gomanga ekola nihi goko o dulada ekola o liate o helewo igogarade mangale nia huba. Ngohi ma Jou nia Jou Madutu.

²Ni himulia o Sabat mawange deʼ o agama mawange ma amoko mahomoahi deʼ nia horomati o ngï yatinga-tingakoka mangale nihihuba Ngohi. Ngohi ma Jou.

³ Nako ngini niwango nia moteke hagala Ahi datoro deʼ nihi ngounu hagala Ahi pareta,

⁴ma orahoka o awana Ngohi aha tohiguti, hiädono o tonaka ihi döaka o hasili deʼ hagala o gota mautu aha ihohoko.

⁵Nia tonaka mahasili aha deʼ maboboloi, hiädono nako ma yadonoka maöraha mangale nipagele o angguru mahohoko, ngini kani utukohi o gandum. Deʼ nako maöraha yadonoka o gandum nidatomo, ngini kani pagelohi o angguru mahohoko. Ngini aha deʼ nia inomo i kura-kurangua deʼ niwango deʼ madame nia bereraka.

⁶Ngohi aha tö goana nia berera koiruaeua hiädono ngini yakunu nima idu nimahi rorahai, deʼ moiua niä modongo. O aiwani madorou aha Tahohihanga nia bereraka gënanga, deʼ koiwaka o parangi nia bereraka.

⁷Ngini aha niakunu nia hohihanga hagala nia haturu;

⁸ngini inï motoa kani akunu niä hohihanga yaratuhu moi, deʼ inï ratuhu moi ngini kani akunu niä hohihanga yaribuhu ngimoi.

⁹Ngohi aha tinihi barakati ngini deʼ ngohaka deʼ o danongo manga ngoë Tinihi döaka nginika. Okia Tinihi jajioka nginika aha Taganapu.

¹⁰Nia tonaka mahasili aha kadeʼ maboboloi, hiädono ka inï wedono o taongo moi. Maboboloioli pakisa ngini nihi hupu nia utu-utukino ihira-hira, hupaya naga mangï mangale nia gögono nia utu-utukino mahungi.

¹¹Ngohi aha togogere tingini nia hidogoronaka Ahi tau magoronaka, deʼ aha ko Tinï tilaua ngini.

¹² Ngohi aha tinï tomoteke ngini; Ngohi aha todadi nia Jou Madutu deʼ ngini nidadi Ahi umati.

¹³Ngohi ma Jou nia Jou Madutu, Tinï ao-ao ngini o Mesir mabereraka deʼ nihupu nidadiokaua o gilaongo. O kuaha inï tö tuku-tuku ngini Tatobikoka, deʼ ngini Tinihidadi o nyawa yo bö bebebasi.”

¹⁴ Ma Jou wätemo, ”Nako ngini nihihi gihenua Ngohi deʼ nia diaiua Ahi pareta,

¹⁵nako ngini nia tilakuru o jaji Tadodiaioka dede ngini deʼ nioluku nihi ngounu Taputu-putuhoka deʼ hagala Ahi datoro,

¹⁶ngini aha Tinï hukumu. Ngohi aha tini dotagao o bodito nginiuku, o panyake deʼo röehe mahauku koi togu-togumua, hiädono nia lako idadi ipiloko deʼ ngini niwango kania bobelelaka. Ngini aha nimä datomo mä nia ol̄omua mahasili, hababu hagala nia haturu aha yoböa ini hohihanga ngini deʼ yamata-mataka okia ngini nia dato-datomo.

¹⁷Ngini aha Tini hukumu, hiädono ngini inï hohihanga nia haturu-haturu deʼ inï doha-dohata inï kuaha. Ngini aha idadi duru nihawana hiädono ngini nipiringana, ngarokä moiua ini ginïki.

¹⁸Nako nia maoka o hukumanga mata-mata gënanga ngini koni hihi ngounuwahi Ngohino, nia hukumanga aha Tö dogo o lape tumidi.

¹⁹Ngini duru niedenge, mä Ngohi aha tinihi tudukuku. Aha koi awanua, hiädono nia tonaka kamadü dudungu deʼ ma dogowini hokä o behi.

²⁰Nia huha deʼ nia kangela mata-mata koiwa mafaidä, hababu nia tonaka aha ihi döakua mahasili deʼ nia joro nidato-datomo aha koi hohokua.

²¹Nako ngini kanihi gila-gilaohi nihi lawani Ngohi deʼ nioluku nihihi ngounu Ngohino, done nia hukumanga aha To dogooli o lape tumidi.

²²Ngohi aha tinï dotagao o aiwani-aiwani madorou nia hidogoronaka. O aiwani-aiwani gënanga aha yä goli nia ngoha-ngohaka, deʼ yatoma nia gigini deʼ inï mata ngini, hiädono nia gegetongo idadi duru nia muhutulu, deʼo ngeko-ngekomo nia bereraka idadi kai rïdika.

²³Nako mata-mata o hukumanga gënanga ngini koni hihi gihenowahi Ngohi, mä kagila-gilaohi nihi lawani Ngohi,

²⁴done Ngohi aha tinï gohara ngini deʼ Tinï hukumu ngini madubuho ihi gali matumidi iholoi deʼ ipaha-pahaka.

²⁵Ngohi aha tapüda o parangi nia hidogoronaka mangale Tinï hukumu ngini karana ngini nia tilakuroka Ahi jaji dedengini. deʼ nako ngini nima toomu nia kotaka mangale nilingiri o hohohongo, Ngohi aha tini dotagao o panyake yakunua itogumu, hiädono pakisa ngini nimahi döaka nia haturuika.

²⁶Ngini aha nia inomo imata-mataka, hiädono o ngoheka ya ngimoi yoparalu duga-duga moi dika mangale yoharongo o roti naga onangoka. O inomo gënanga aha ihi kodoku, deʼ nia ol̄omo deʼ iböto, ngini kania maohi inï hahini.

²⁷Nako mata-mata o hukumanga gënanga nia maoka ngini kagila-gilaohi nihi lawani Ngohi deʼ ni oluku nihi hingounu Ngohino,

²⁸done deʼ Ahi dohata aha Ngohi tinï gohara ngini deʼ Tinï hukumu ngini madubuho ihi gali matumidi iholoi deʼ i paha-pahaka.

²⁹Ngini aha inï habirokata, hiädono nimä ol̄omo nia ngoha-ngohaka mahirete.

³⁰Ngohi aha tawedere nia puji-puji mangï hagala o doporono mal̄okuoka, Taruba nia huhuba-huhuba mangï o dupa niö duhu-duhuku, deʼ hagala nia maiyeti Tohikaweli nia gomangika irö ruba-rubaika gënanga. Ta ëmono

³¹nia kota-kota Ta tagali idadi i wede-wederuku, nia puji-puji mangï Ta wedere deʼ nia huhuba-huhuba ko Tatarimaua.

³²Nia berera aha Tabinaha mata-mataika, hiädono nia haturau-haturu yogö gogere yatodokana yamake mangedere gënanga duru yömodongo.

³³Ngohi aha tapuda o parangi nia bereraka deʼ Tinihi kokitingakoka ngini o berera mahomoaika. Nia dumule aha moiua ya paliara, deʼ nia kota imal̄aika idadi i wede-wederuku.

³⁴O öraha gënanga magogiria inï umoika nia haturu-haturu manga bereraka, nia tönaka nihi gumal̄a ua ima togumu maöraha ngini niö gogerika, aha moiua yapaliara deʼ yamake o öraha imahi batongo.

³⁶Hagala nia nyawa naga yä umo-umoika o berera mahomoaka, aha Tädiai duru yohawana, hiädono mailingi o gota mahoka o hidal̄oko yawuwu mä önanga kayo piringana. Ngini aha nipiringana hokä inï ginïki o parangi magoronaka, deʼ niruba ngaroka moiua nia haturu nia datekoka.

³⁷Ngini aha nipiringana deʼ nima kokepeleke moi deʼ moika, ngarokä moiua ini ginïki. Deʼ ngini niakunua nia lawani nia haturu-haturu.

³⁸Ini umoika o berera mahomoaka ngini aha nihonenge nia haturu-haturu manga berera inï binaha.

³⁹Nia huhutulukahi niwango nia haturu manga bereraka ini pelelaka karana nia baradoha mahirete deʼ nia ete deʼ nia tohora manga baradoha.

⁴⁰Mä nia difauku aha ima ngaku toönanga manga baradoha deʼ toönanga manga ete deʼ manga tohora manga baradoha ihi lawa-lawanoka Ngohi deʼ Ahi pareta yamotekua

⁴¹hiadono Ngohi tomaoko talawani önanga deʼ Tä duhu önanga deʼ Tä umo manga haturu-haturu manga bereraika. Ma baha, nako nia difauku ima ikeoka Ngohino deʼ yamaoka o hukumanga karana manga baradoha deʼ toönanga manga lolawani,

⁴² Ngohi aha toma hininga Ahi jaji deʼ o Yakub, o Ishak deʼ o Abraham. Ngohi aha ta hungi Ahi jaji mangale Ta hi döaka o tönaka gënanga Ahi umatika.

⁴³Mä o tonaka gënanga kokiani ihira yamal̄aka maberera madutu, hupaya yakunu igou-goungu o tonaka gënanga imahi batongo. Deʼ Ahi umati kokiani yamao mata-mata o hukumanga Ta gogelengaka onanguku karana yoluku ihi ngounu Ahi datoro deʼ Ahi pareta-pareta.

⁴⁴Mä önanga kamanga haturu manga bererakahi ma, aha Ngohi kota mal̄aua önanga ekola Tä binaha mata-mataka. Hababu nako önanga Tä binaha, mamangarati Ngohi tatoaka Ahi jaji dede önanga, ena hioko Ngohi nënanga ma Jou manga Jou Madutu.

⁴⁵Ngohi aha tahungi Ahi jaji tadodiaioka deʼ toönanga manga ete deʼ manga tohora, maöraha Ngohi tohidumutu Ahi kuaha hagala o hoana deʼ o bereraika deʼ tä ao Ahi umati o Mesirino deʼ yohupu, hupaya Ngohi ma Jou idadi toönanga manga Jou Madutu.”

⁴⁶Genanga doka o tita-tita deʼ o pareta-pareta ma Jou wohi döa-döaka o Sinai mal̄okuoka o Musaika mangale o Israel ma nyawa.