Read Tobelo O IMAMAT 3 Bible Online

O IMAMAT 3 - Tobelo bible

O IMAMAT 3

¹Maöraha nako ima tengoani ihihuba o hapi o dutu moi mangale o dame mahuhuba, o hapi gënanga yakunu manauru, yakunu mabeka, mä yakunua naga deʼ manabo.

²O nyawa wohihö huba-huba kokiani wö gelenga aigiama o aiwani gënanga mahaëkuku daha yatoaka ma Jou Ai Tau mangorana mahimangoka. O imam-imam o Harun aidifauku kokiani o hapi ma awunu gënanga ihituagi o huhuba mangï magumuruku iatika.

³Mangale o dame mahuhuba ma Jouika, ma imam kokiani wohihuba o aiwani gënanga ma hidoku-hidoku nënanga: maraka yahawo-hawoino mamamata madol̄a,

⁴madudu mahiri de mahaki deʼ magate duru yaoa-oa.

⁵Genanga mata-mata kamamoi de o huhuba itö tuhu-tuhuku mahomoa kokiani yatuhuku o huhuba mangï mal̄okuoka. O huhuba o inomo gënanga mabounu yasanangi ma Jou Ai hininga.

⁶Nako ihihö huba-huba gënanga o duba o dutu moi ekola o kabingi, o aiwani gënanga yakunu manauru, yakunu mabeka, mä yakunua naga manabo.

⁷Maöraha nako imatengoani ihihuba o duba o dutu moi, ünanga kokiani wao ma Jou Aitauika.

⁸Genangokadau kokiani ünanga wogelenga ai giama o duba gënanga mahaëke mal̄okuku daha yatoaka o Tau ma himangoka. Daha ma imam kokiani o duba gënanga ma awunu wohi tuagi o huhuba mangï magumuruku iatika.

⁹Mangale o dame mahuhuba ma Jouika, ma imam kokiani wohi huba o duba gënanga ma hidoku-hidoku nënanga: mahaki, ingodumu mabikini dema haki-hakioka deʼyatobiki imahi tigi-tigika maporete makobongika, maraka yahawo-hawoino ma mamata madol̄a,

¹⁰madudu mahiri de mahaki deʼ magate duru yaoa-oa.

¹¹Ma imam womomanarama kokiani watuhuku mata-mata gënanga o huhuba magï mal̄okuoka mangale o huhuba o inomo ma Jouika.

¹²Nako ihö huba-huba o kabingi o dutu moi, o nyawa wohihö huba-huba kokiani wao ma Jou Ai tauika.

¹³Genangokadau kokiani ünanga wogelenga ai giama o kabingi gënanga ma haëke mal̄okuku daha yatoaka O Tau mahimangoka. Ma imam kokiani o aiwani ma awunu gënanga wohi tuagi o huhuba mangï magumuruku iatika.

¹⁴Mangale o huhuba o inomo ma Jouika, ma imam kokiani wohi huba o aiwani gënanga ma hidoku-hidoku nënanga: maraka yahawo-hawoino ma mamata madol̄a,

¹⁵madudu mahiri de mahaki deʼ magate duru yaoa-oa.

¹⁶Ma imam womomanarama kokiani mata-mata gënanga watuhuku o huhuba mal̄okuoka. O huhuba o inomo gënanga mabounu yasanangi ma Jou Ai hininga. O aiwani gënanga mahaki mata-mata mangale ma Jou.

¹⁷O Israel manyawa hakali-kali yakunua yaol̄omo mahaki ekola ma awunu. O datoro gënanga idiai gila-gila kahi ado-adonika deʼ kokiani o Israel manyawa moi-moi ihingounu kiaka dika önanga yogogere.