Read Tobelo O IMAMAT 4 Bible Online

O IMAMAT 4 - Tobelo bible

O IMAMAT 4

¹Ma Jou wïhuloko o Musa wohingahu o nagona dika yo baradoha yohangajaua karana yatilakuru moi ani ma Jou Ai tita, kokiani yanïki o datoro nënanga.

³Maöraha nako ma imam wo Amo-amoko wo baradoha, hi adono o Israel manyawa ihimoteke yahowono, ünanga kokiani wohihuba ma Jouika o hapi manauru magö o dutu moi koiwa naga manabo, hupaya ai baradoha iapongo.

⁴O hapi gënanga kokiani yao ma Jou Ai Tau mangoranika. Ma imam wo Amo-amoko kokiani wogelenga ai giama o aiwani gënanga mahaëke mal̄okuku, daha yatoaka o Tau mahimangoka.

⁵Ma awunu o hidoku moi kokiani ihi ngohama o Tau magoronaika.

⁶De ünanga kokiani ai hagarara watono o awunuku gënanga deʼ wö dohurero wohigali matumidi o guba ihi tinga-tingaka o Ngï i Tebi-tebini mahimangoka.

⁷O hidoku moi o awunu gënanga kokiani wohinauhu o dupa ma bounu ihemo-hemoro mahuhuba mangï matatadukika malibuku-libukuoka o Tau magoronaka, deʼ maboloi kokiani wohituagi mabukuku o huhuba itö tuhu-tuhuku mahuhuba mangï o naga o Tau mangorana mahimangoka.

⁸Ma imam kokiani wal̄ë ingodumu o hapi manauru gënanga mahaki, enagënanga maraka yahawoino ma mamata madol̄a,

⁹madudu mahiri deʼ mahaki deʼ magate duru yaoa-oa.

¹⁰Mata-mata gënanga kokiani watuhuku o huhuba itö tuhu-tuhuku mahuhuba mangï mal̄okuoka hokä o dame mahuhubaka.

¹¹Mä o hapi gënanga maakeme, makai, mahaëke, mal̄ou, ma mamata madol̄a maboloi inoli mawariki,

¹²hoʼ, sawaliua o hidoku yatinga-tingakoka, i ngodumu ko kiani yao ihihupu o tau madodoomu maporetika. Genangokadau o hapi gënanga kokiani yatuhuku o gota ihi dofo-dofo mal̄okuoka o kafo magugumo mangïoka, enagënanga o ngï yatinga-tingakoka mangale gënanga.

¹³Maöraha nako ingodumu o Israeloka yobaradoha, hababu ko yo hangajaua yatilakuru moi ani ma Jou Ai tita,

¹⁴deʼ ihi örikoka o baradoha gënanga deʼ iböto itaiti o kawaha kokiani o hapi manauru magö o dutu moi yao ma Jou Ai Tau mahimangoka. O aiwani gënanga kokiani ihihuba mangale o baradoha ma apongo mahuhuba.

¹⁵O hoana matutuda-tutuda kokiani yogelenga toönanga manga giama o aiwani gënanga mahaëke mal̄okuku, daha yatoaka genangokadau.

¹⁶Ma imam wo Amo-amoko kokiani wao o aiwani gënanga ma awunu o hidoku moi wohingohama o Tau magoronaika.

¹⁷Genangokadau ünanga kokiani ai hagarara watono o awunuku gënanga daha wodohurero wohigali matumidi o guba ihi tinga-tingakoka o Ngï i Tebi-tebini mahimangino.

¹⁸O hidoku moioli kokiani ihinauhu o dupa mahuhuba mangï matotatadukika malibuku-libukuoka o Tau mangoranoka, deʼ maboloi kokiani wohituagi mabuku uku o huhuba itö tuhu-tuhuku mahuhuba mangï naga o Tau mangorana mahimangoka.

¹⁹O aiwani gënanga mahaki ingodumu kokiani wal̄ë deʼ watuhuku o huhuba mangï mal̄okuoka.

²⁰Madodagi hokä o hapi manaurika ihi huba-huba mangale o baradoha ma apongo mahuhuba. Hoko gënanga madodagi ma imam wo Amo-amoko wohihuba o huhuba mangale o kawaha manga baradoha, done o baradoha-baradoha gënanga aha ma Jou wa apongo.

²¹De ipaha o hapi manauru gënanga kokiani yao maporetika, deʼ yatuhuku o dodoomu matau maporetoka hokä o hapi manauru ihi huba-huba mangale ma imam wo Amo-amoko gënanga mahirete ai baradoha ma apongo mahuhuba.

²²Maöraha nako womatengo wokokuaha wobaradoha karana wohangajaua watilakuru ma Jou Ai Tita moiani.

²³Deʼ iböto itaiti wamao, manga kokiani wohihuba o kabingi manauru o dutu moi koiwa manabo, mangale ai baradoha ma apongo.

²⁴Unanga kokiani wogelenga ai giama o aiwani gënanga ma haëke mal̄oku uku, deʼ yatoaka o huhuba mangï o koremieuku ihimangoka, o ngï o aiwani yatoa-toaka mangale o huhuba yatö tuhu-tuhuku.

²⁵Ma imam kokiani ai hagarara watono o aiwani gënanga ma awunuku de wohinauhu o huhuba mangï matotatadukika malibuku-libukuoka deʼ mahou wohituagi o huhuba mangï mabuku uku.

²⁶De ipaha o aiwani gënanga mahaki ingodumu kokiani ya tuhuku o huhuba mangï mal̄okuoka, hokä o dame mahuhuba. Hoko gënanga madodagi ma imam wohihuba o huhuba mangale womatengo wokokuaha ai baradoha, done o nyawa gënanga aha ma Jou wï apongo.

²⁷ Maöraha nako womatengo o kawaha biaha o baradoha wo diai karana wohangajaua watilakuru ma Jou Ai Tita moiani,

²⁸de wamao ipahaino itaiti, ünanga kokiani wohihuba o kabingi mabeka o dutu moi koiwa naga manabo.

²⁹Unanga kokiani wogelenga ai giama o aiwani gënanga ma haëke mal̄okuuku, daha yatoaka o huhuba mangïoka o koremie uku ihima-himanga, mangï o aiwani yatoa-toaka mangale o huhuba yatö tuhu-tuhuku.

³⁰Ma imam kokiani ai hagarara watono o aiwani gënanga ma awunuku, daha wohinauhu o huhuba mangï matotatadukika ma libuku-libukuoka deʼmahou wohituagi o huhuba mangï mabuku uku.

³¹O aiwani gënanga mahaki ingodumu kokiani wal̄ë hokä o dame mahuhuba. O haki gënanga ma imam kokiani watuhuku o huhuba mangï mal̄okuoka, hupaya mabounu yasanangi ma Jou Ai hininga. Hoko gënanga madodagi ma imam wohihuba o huhuba mangale womatengo o kawaha biaha ai baradoha, done o nyawa gënanga aha ma Jou wihi apongo.

³²Maöraha nako ima tengoani wohihuba o duba o dutu moi mangale ai baradoha ma apongo, o duba gënanga kokiani mabeka deʼ koiwa naga manabo.

³³Unanga kokiani wogelenga ai giama o aiwani gënanga ma haëke mal̄uku uku daha yatoaka o huhuba mangïoka o koremieuku ihima-himanga, mangï o aiwani yatoaka mangale o huhuba yatö tuhu-tuhuku.

³⁴Ma imam kokiani ai hagarara watono o aiwani gënanga ma awunuku, daha wohinauhu matotatadukika o huhuba mangï ma libuku-libukuoka, deʼ mahou wohituagi o huhuba mangï ma buku uku.

³⁵De ipaha o aiwani gënanga mahaki ingodumu wal̄ë hokä o dame mahuhubaka. O haki gënanga kokiani watuhuku o huhuba mangï mal̄okuoka, kamamoi deʼ o huhuba o inomo ihihö huba-huba ma Jouika. Hoko gënanga madodagi ma imam wohihuba o huhuba mangale o nyawa gënanga ai baradoha, done ünanga aha ma Jou wï apongo.