Read Tobelo O IMAMAT 6 Bible Online

O IMAMAT 6 - Tobelo bible

O IMAMAT 6

¹ Ma Jou wohidöaka o Musaika o datoro-o datoro nënanga.

²Womatengo kokiani wohihuba o huhuba nako ünanga wo baradoha ma Jouika karana woluku wohigilio o baranga ai dodiawo ihidodo dogumika unangoka, ekola o nyawa watipu, watohiki manga baranga, ekola wamakeoka o baranga ihohihihanga, mä wohipongono deʼ wokoboto.

⁴O nyawa wahowo-howono gënanga kokiani wo fanguoli mata-mata wamö make-make deʼ madiaiua. Maöraha ünanga iwi make wahowono, ünanga kokiani wofangu ingodu-ngodumu madutuika, de wodogo o ratuhu moi yaregu monaoko.

⁶Mangale o nyawa gënanga ai rugi madagali mahuhuba kokiani wohihuba o duba ekola o kabingi manauru o dutu moi koiwa naga manabo deʼ maija yobetongo imoteke maija ma Jou Ai Tauoka.

⁷Ma imam wohihuba mangale o nyawa gënanga ai baradoha, done ma Jou aha wï apongo ünanga.

⁸Ma Jou wï huloko wohidöaka o Harun deʼ aingoha-ngohakika o datoro-o datoro nënanga mangale o huhuba yatö tuhu-tuhuku o huhuba mangï mal̄okuoka deʼ wamal̄aika genangokadau o hutu moi yahaiwatiki, deʼ mauku kokiani kayö doka-dokara.

¹⁰O huhuba gënanga imadadioka o kafo, ma imam womahipakeanga o haluara maboboluluku deʼ o juba o ngöere o lenan, kokiani wagoraka o kafo deʼ mahaki-hakioka gënanga o huhuba mangï ma ngï mal̄okuoka gënanga deʼ wakelengauku o huhuba mangï madatekoka.

¹¹Genanga deʼ iböto ünanga kokiani ai pakeanga watagali deʼ wao o kafo gënanga o Tau madoomu maporetika, mangïika yodinga-dingakoka mangale gënanga.

¹²O ngorumino ihi geto-getongo ma imam kokiani wogelenga o gota ihi dofo-dofo o huhuba mangï mal̄okuoka, ma huhuba yatö tuhu-tuhuku wodatoro mal̄okuino deʼ watuhuku o dame mahuhuba o haki. O uku mahuhuba mangï mal̄okuoka kokiani kahoko genangika kayö doka-dokara deʼ yakunua ihigumal̄a ihonenge.

¹⁴Nenanga doka o datoro-o datoro mangale o huhuba ihi dodiai ukuoka mangale ma Jou. O huhuba gënanga kokiani womatengo o Harun aidifauku wao o huhuba mangï mahimangoka ika.

¹⁵Unanga kokiani wal̄ë o tarigu ma aluhu o bokoto moi deʼ o minya deʼ o manyanyi mata-mata, daha yatuhuku o huhuba mangï mal̄okuoka hokä manonako o huhuba gënanga ingodumu ihi huba ma Jouika. O huhuba mabounu gënanga yasanangi ma Jou Ai hininga.

¹⁶O tarigu maboloi kokiani yadiai o roti maragi koiwa-iwa deʼo imam-imam yaol̄omo o ngï yodinga-dingakoka, enagënanga ma Jou Ai Tau malooaka. Genanga doka o imam-imam manga hidoku onangika ma Jou wohidöaka o huhuba o inomino. O inomo gënanga duru itebini, hokä o baradoha ma apongo mahuhuba deʼo rugi madagali mahuhuba.

¹⁸O Harun aidifauku o nau-nauru magetongo kahi ado-adonika yakunu yaol̄omo o roti gënanga; gënanga doka kahirahi toönanga manga hidoku ihi huba-huba ma Jouika. O nyawa mahomoa yapeke-peke o inomo ihi huba-hubaka gënanga aha yamake o bodito karana o debini ma kuata.

¹⁹Ma Jou wohidöaka o Musaika o datoro-o datoro nënanga

²⁰mangale o huhuba ma imam womatengo o Harun aidifauku ai tabisanoka. Unanga iwitabis mawangeoka, ünanga kokiani wohihuba o tarigu o kilo moi ma Jouika. Ma hononga kokiani wohihuba o ngorumino deʼ mahou o bimaoa.

²¹O tarigu gënanga kokiani ihiganu de o minya daha yaharongo o nonofo mal̄okuoka, deʼ ipaha yabela-belaka deʼ ihi huba hokä o huhuba ihi dodiai ukuoka. O huhuba gënanga mabounu yasanangi ma Jou Ai hininga.

²²Mangale kahi ado-adonika o Harun aidifauku yätabis yodadi ma imam wo Amo-amoko kokiani ihihuba o huhuba gënanga. Ingodumu kokiani yatuhuku mangale ihihö huba-huba ma Jouika.

²³O huhuba ihi dodiaiuku magetongo wohihuba-huba ma imam kokiani yatuhuku ingodumu, kamahuhutulö ma, yakunua wa ol̄omo.

²⁴Ma Jou wïhuloko o Musa

²⁵nohidöaka o Harun deʼ ai ngoha-ngohakika o datoro-o datoro nënanga mangale o baradoha ma apongo mahuhuba. O aiwani mangale o baradoha ma apongo mahuhuba kokiani yatoaka o aiwani yatoa-toaka mangïoka mangale o huhuba yatö tuhu-tuhuku. O huhuba gënanga duru itebini.

²⁶Ma imam wohihö huba-huba o huhuba gënanga kokiani wa ol̄omo yodinga-dingakoka mangï enagënanga ma Jou Ai Tau ma looaka.

²⁷O nagona dika ekola okia dika yakorona o aiwani ma akeme gënanga aha yamake o bodito karana madebini makuata. Nako o baju o doboki moi yakorona o aiwani ma awunu gënanga yo dohoropu, o baju gënanga kokiani yafoka deʼ mangï yodinga-dingakoka.

²⁸O bohoko o tonaka yapake-pake mangale ihibohoko o hiode ma akeme ihihö huba-huba gënanga kokiani yapootekoka. Nako yapake o bohoko o behi, o bohoko gënanga kokiani yafika daha yaihoro deʼ o akere.

²⁹O nau-nauru moi-moio imam-imam manga tau manyawa yakunu ya ol̄omo o huhuba duru itebi-tebini gënanga.

³⁰O aiwani mangale o baradoha ma apongo ma huhuba yol̄o l̄ë-l̄ë ma awunu o hidoku moi mangale yao o Ngï iTebi-tebinika kokiani yatuhuku imata-mataka deʼ yakunua ya ol̄omo.