Read Tobelo O IMAMAT 9 Bible Online

O IMAMAT 9 - Tobelo bible

O IMAMAT 9

¹O wange moi iböto ipahaika o tabisan ma upacara gënanga, o wange matufangeoka, o Musa wä ahoko o Harun deʼ aingoha-ngohaka ikali o Israel manyawa manga tutuda-tutuda.

²O Musa wïtemo o Harunika, ”Nal̄ë o hapi magö o dutu moi deʼ o duba manauru o dutu moi, hinotö koiwa naga manabo ekola ipiloko. Nihihuba o aiwani hinoto gënanga ma Jouika, o hapi manauru mangale o baradoha ma apongo mahuhuba, deʼ o duba ma nauru mangale o huhuba yatö tuhu-tuhuku.

³Daha nä huloko o Israel manyawa ihi huba o kabingi ma nauru o dutu moi mangale o baradoha ma apongo mahuhuba deʼ o hapi mangohaka o dutu moi ikali o duba mangohaka moi-moi ma umuru o taongo moi deʼ koiwa naga manabo ekola ipiloko mangale o huhuba yatö tuhu-tuhuku.

⁴Nä huloko önanga ihi hubaö o hapi manauru o dutu moi deʼ o kabingi manauru o dutu moi mangale o dame mahuhuba. Mata-mata gënanga kokiani önanga ihihuba ma Jouika kamamoi deʼo huhuba ihi dodiaiuku yaminya-minyaika, karana o wange nënanga ma Jou woboa onangika.”

⁵Mata-mata o Musa wohibehehongo önanga yao o Tau mahimangika, deʼ o kawaha yongodumu imatoomu genangokadau mangale ma Jouika.

⁶Daha o Musa wätemo, ”Ma Jou winï huloko ngini nia diai nënanga hupaya ngini yakunu nia make ma Jou Ai himanga ma cahaya.”

⁷ Genanga deʼ iböto ünanga wïtemo o Harunika, ”Noiki o huhuba mangï ika deʼ nasadia o baradoha ma apongo ma huhuba deʼ o huhuba yatö tuhu-tuhuku, hupaya ani baradoha deʼ o kawaha manga baradoha ma Jou wa apongo. Nadiai gënanga hokä ma Jou wohipopareta.”

⁸De o Harun woiki o huhuba mangï ika deʼ watoaka o hapi manauru aha wohihuba mangale ai baradoha mahirete ma apongo.

⁹O Harun aingoha-ngohaka yototaka o aiwani ma awunu gënanga o Harunika, deʼ ünanga watono ai hagarara o awunuku gënanga, ikali wohinauhu o totatadukika o huhuba mangï ma libuku iata. Genanga deʼ iböto o awunu maboloi gënanga wohi tuagi o huhuba mangï mabukuku.

¹⁰Mahaki, madudu mahiri deʼ mahidoku duru maoa-oa o aiwani gënanga yatuhuku o huhuba mangï mälokuoka, hokä ma Jou wohipopareta o Musaika.

¹¹Mä o hiode ma akeme deʼ o aiwani gënanga deʼ makai ya tuhuku o doomu matau maporetoka.

¹²De ipaha o Harun watoaka o aiwani mangale o huhuba yatö tuhu-tuhuku mangale ai diri mahirete. O Harun aingoha-ngohaka yototaka o aiwani ma awunu gënanga unangika, daha ünanga wohituagi o huhuba mangï magumurukika iatö.

¹³Genanga deʼ ibötoönanga ihidöaka unangika mahaëke deʼ mahidoku-mahidoku mahomoa o aiwani gënanga, deʼ ünanga watuhuku o huhuba mangï mal̄okuoka.

¹⁴De ipaha mamamata madol̄a deʼ aiwani gënanga mauguru wa ihoro deʼ watuhuku deʼ o huhuba yatö tuhu-tuhuku o huhuba mangï mal̄okuoka.

¹⁵Genanga deʼ ipaha ünanga wohihuba o kabingi mangale o kawaha manga baradoha ma apongo mahuhuba. O kabingi gënanga wa toaka deʼ wohihuba hokä o huhuba mangale ai baradoha mahirete ma apongo.

¹⁶De ikali wal̄ë oli o aiwani mangale o huhuba yatö tuhu-tuhuku, deʼ wohihuba imoteke o datoro.

¹⁷Genanga deʼ iböto wohihuba o huhuba yadodiaiuku; wa l̄ë o gopuno o bokoto moi, deʼ waharongo o huhuba mangï ma l̄okuoka. Genanga ganga madogo o huhuba yatö tuhu-tuhuku o wange ihi getongo.

¹⁸ Daha watoakoli o hapi manauru o dutu moi deʼ o duba ma nauru o dutu moi mangale o kawaha manga dame mahuhuba. O Harun aingoha-ngohaka yototaka o aiwani ma awunu gënanga unangika, daha ünanga wohituagi o huhuba mangï magumurukika iatö.

¹⁹O hapi deʼ o kabingi mahidoku ihö haki-haki gënanga önanga yakelenga o aiwani hinotö gënanga ma alu mal̄okuoka,

²⁰ma alu mal̄okuoka o aiwani hinoto genanga, daha o Harun watuhuku o huhuba mangï mal̄okuoka.

²¹Ma alu mangunungu deʼ mauguru maniraka o aiwani gënanga ihihuba hokä o huhuba ihidö dumu-dumutu ma Jouika. Genanga ganga o imam-imam manga hidoku, hokä o Musa wohipo pareta.

²² O huhuba gënanga ihi huba mata-mata deʼ iböto, o Harun wagoraka ai giama o Israel ma kawahauku deʼ wahibarakati önanga, daha ünanga wouti.

²³De ipaha o Musa deʼ o Harun yowohama ma Jou Ai Tau ma goronaika. Genanga deʼ iböto önanga yohupu deʼ yahibarakati o kawaha. De o Israeloka yongodumu yamake ma Jou Ai Himanga ma cahaya.

²⁴Itodokanino ma Jou wohiguti o uku yatuhuku yamata-mataka o huhuba yatö tuhu-tuhuku deʼ mahidoku ihaki-haki o huhuba mangï mal̄okuoka. Maöraha o Israeloka makawaha ya make, önanga youli-ulili deʼ yohuba yatilabukuku.