Read Tobelo O YEREMIA 10 Bible Online

O YEREMIA 10 - Tobelo bible

O YEREMIA 10

¹O Israel manyawa, nï ihene ma Jou Ai behehongo nginika.

²Unanga winïtemo, ”Uha nia moteke o hoana deo berera mahomoa manga biaha, deʼ uha nihaharoka nia make hagala o nonako o dihangoka yömodo-modongo o hoana deo berera gënanga.

³Manga adati de manga biaha o hoana deo berera gënanga hakali-kali koiwa mafaida. Onanga yotol̄anga o gota o honganoka, deʼ yähuloko o tukanga yakarajanga deo pakakaha idadi o gomanga madulada.

⁴De ipaha o gomanga madulada gënanga yaporomu deo haaka deo gurasi, dahaö yakuata deo paku hupaya uha yaotaka.

⁵O gomanga madulada-dulada gënanga hokä o nyawa-nyawa o timu madumuleoka. Enanga yakunua itemo, yakunua yöaguru, deʼ kokiani ka yagoraka. Uha nio modongo enangika, hababu ënanga yakunua idiai o dorou nginika; idiai o oa ma ënanga yapoaua.”

⁶Jou nomomulia, Ngona koiwa honihitero, Ani romanga ikurutil̄e deʼ yaomanga o kuaha.

⁷ O nagunali woluku wonï modongo Ngonaika, hagala o hoana deo berera manga koano? Igoungu, Ngona duru ipatutu ini horomati. Mata-mata yososawaroino hagala o hoana deo berera manga hidogoronaka deʼ mata-mata toönanga manga kokoanoino, kao nyawa moiö ma yakunua imahitero de Ani diri ya Jou.

⁸Mata-mata önanga yofuma deʼ yobodo hababu manga gikiri mata-mata kao gota, yakunua yödotoko iböbaraguna.

⁹Enanga ihilape deo haaka, deʼ o gurasi yao-ao o Spanyol deʼ o Ufas makotaino, mata-mata yogogarade manga giama maleleani deʼ o yosawaro gurasi yadodiai. Mapakeanga deo ngöere hatoli kai ungu deʼ duru maungu-ungu, yakarajaanga mangale duru yanako-nako o pakeanga yododiai de uru ihi dodiai.

¹⁰Mä ngona, o Jou, o Jou Madutu nototiai, o Jou Madutu nohidoa-döaka o wowango, o koano nokokakali. Nako Ngona initohata, o dunia igiwi, nako Ngona duru initohata o hoana deo berera koyapoaua. (

¹¹Ngini, hei o umati, kokiani nihingahu onangika hagala o gikiri yododiaiua o dihanga deʼ o dunia aha yäbinaha. Onanga aha yohihanga o dunia mal̄okuoka.)

¹²Ma Jou wohidadi o dunia de Ai kuaha, watuku o dunia de Ai barija, deʼ wohihohe o dihanga de Ai akali isosawaro.

¹³Duga-duga de wohipareta, o akere iruruhu o gitaoaka. O dunia abaha-bahaino o lobi Woao, deʼ Wadiai o leletongo ijanga-janga o awana magoronaka, inoli Wohidingoto o hidal̄oko magogogono mangï ino.

¹⁴Yamake mata-mata gënanga o nyawa imamao, önanga yobodo deʼ koiwa manga mangarati. O gurasi yadodiai manga biono yamakeua, hababu o gomanga madulada yadodiai gënanga itiaiua deʼ koiwa majiwa.

¹⁵Hagala o gomanga gënanga koiwa maija, ipatutu yahohedu deʼ ihikauku. Nako maoraha yadono önango ibinaha.

¹⁶O Yakub ai Jou Madutu hokä hagala o gomangua gënanga; Unanga wohidadi hagala moi-moi. Ai Romanga enaganga ma Jou Duru Wokokuaha; Unanga wäirikoka o Israel idadi Ai umati.

¹⁷O Yerusalem nigögogere, ngini ini higilolitino! Karana gënanga nimä hawo-hawoinoka!

¹⁸Mamoi nënanga ma Jou aha wahikaweli yongodumu o Yehuda aihöana o tabuangika; ngini mata-mata aha nibinaha kamamoi. Genanga o behehongo ma Jouino.

¹⁹O Yerusalem yogögogere yopöaka. ”Ngomi mianabo ma ago-agomo deʼ koyakunu itogumu. Mahira ngomi miatobote kayakunu ngomi miatagongo, enahioko kowali.

²⁰Tongomi mia tau-tau ikilianga, deʼ maliliko itoaka mata-mata. Moiokaua yakunu ihigoko manga tau-tau deʼ ihihohe mangöere, karana o ngoha-ngohaka yoikoka.”

²¹Ngohi tohaluhu, ”Yobodo tongone nanga tutuda-tutuda gënanga. Onanga koyogahokua o hidumutu ma Jouino, gënanga mahababu önanga koyohasilua, deʼ ngone inahikabarihi kiaika honanga.

²²Ni ihene! naga o bodito ma abari moi o hoana deo berera o koremieil̄e yapuda o ruae. Manga tentara aha yadiai o Yehuda ma kota-kota kairïdika deʼ moiua yögogere. Hagala o kaho o honganika aha imangiunu dokengoka.”

²³Jou ngohi tohioriki kao nyawa moiö ma wokuahaua, wohitantu ai nasib ekola watatoro ai wowango mangekomo.

²⁴Nomï gohara ngomi ya Jou, mä uha magogohara ihiri holi. Uha nomï hukumu ngomi nako Ngona magogiriaka ini tohata, hababu marai ngomi aha mata-mata mibinaha.

²⁵Nohiaiki Ani dohata hagala o hoana deo bereraika ini nako-nakoua Ngona deʼ yoluku imahigilaongo Ngonaika. Hababu önanga yäbinahaoka Ahi umati kamamoiuku deʼ yabinahaka tongomi mia berera.