Read Tobelo O YEREMIA 11 Bible Online

O YEREMIA 11 - Tobelo bible

O YEREMIA 11

¹Ma Jou wohi to ngohino,

²”Na tailako nohi dodiai o jaji ma datoro-ma datoro Ta dodiai de Ahi umati. Nohingahu o Yehuda ma nyawaika deʼ yo gogogere o Yerusalem,

³Ngohi, ma Jou o Israeloka manga Jou Madutu, ta lolai o nagona dika ihingou-ngounua Ahi jaji ma datoro-ma datoro gënanga.

⁴O jaji gënanga Ta diaioka de toönanga manga ete de manga tohora maöraha önanga Ta ao o Mesir mabereraka de yohupu, o berera hokä o naraka onangika. Ngohi tä huloko önanga ihi hingounu Ngohi ino deʼ ya diai hagala okianaga Ngohi tohi poparetaka. Oraha nënanga Ngohi ta hetongokali o Yehuda ma nyawa ika deʼ yo gogogere o Yerusalem i goungu nako önanga ihi hingounu Ngohi ino, önanga aha yo dadi Ahi umati deʼ Ngohi toönanga manga Jou Madutu.

⁵Nako önanga ya diai mata-mata gënanga, Ngohi aha ta totomo Ahi jaji toönanga manga ete de manga tohoraika o berera i boburere deʼ ma hasili i woe-woe, oraha nanga naga önanga yö gogere, aha Ta hidöaka onangika.” Ngohi ti baluhu, ”Kayaoa, Jou.”

⁶Daha ma Joo wohitemo ngohino, ”Noiki o Yehuda ma kota-kota ika, deʼ o Yerusalem ma ngeko-ngekomika. Nohiadono Ahi behehongo nënanga hagala o nyawaika genangokadau manyawa. Nä huloko önanga yö hininga ihidodiai deʼ ihingounu Ahi jaji ma datorika.

⁷Maöraha Ngohi tä ao manga ete de manga tohora o Mesir mabereraka de yohupu, tohi totailako Ngohi to hidöaka o hohininga onangika hupaya ihi hingounu ngohino. Hiadono o wange nënanga ma Ngohi ka hokogenangika ta hidöaka o hohininga Ahi umati ya korona o hali gënanga,

⁸deʼ tä huloko önanga ihingounu Ahi jaji gënanga, mä önanga yoluku ihigihene deʼ yoluku ihingounu. Ma boboloi önanga kahirahi manga häeke itogowini deʼ itorou hokä mahira. Karana gënanga hagala o hukumanga ituli-tulihi o jaji gënanga magoronaka Tahitapal̄uoka onanguku.”

⁹De ipaha ma Jou wohi temoli ngohino, ”O Yehuda manyawa deʼ yogögogere o Yerusalem imateke fakatioka ihilawani Ngohi.

¹⁰Onanga yodiaioka o baradoha manga ete de manga tohora yadodiai yoluku ihihingounu Ngohino, önanga yahuba hagala o gikiri mahomoa deʼ yoluku yamoteke Ahi pareta. Kayaoa o Israel kayaoa o Yehuda yatilakuru o jaji Tadodiaioka de toönanga manga ete de manga tohora.

¹¹Karana gënanga, Ngohi, ma Jou, tohidöaka o hohininga Ngohi aha tadotagao o bodito onanguku deʼ önanga yakunua yörehene. Nako önanga yopöaka yogahoko o roriwo Ngohino, Ngohi toluku tohigihene.

¹²Daha o Yehuda manyawa deʼ yogögogere o Yerusalem yoiki yogahoko o roriwo hagala o gikiri mahomoaika önanga yahuba-huba deo huhuba ihihö huba-huba. Hagala o gikiri gënanga aha koyakunua yahihalamati önanga maorahoka o bodito gënanga iboa.

¹³O Yehuda manyawa manga gikiri duru kahä ngöe, imatero mangöe de toönanga manga kota. Yogögogere o Yerusalem ihigoko hagala o huhuba mangï imatero mangöe o ngeko-ngekomo o Yerusalemoka la ihihuba o Baal ma Gikirika.

¹⁴Karana gënanga, Yeremia, uha nomä niata mangale önanga ekola nogahoko o roriwo mangale önanga! Nako önanga o huba deo hangihara magoronaka deʼ yogahoko o roriwo Ngohino, Ngohi aha toluku tahigihene önanga.”

¹⁵Ma Jou wato, ”Ahi umati tädora-dora yodiaioka hagala o hali itotorou. Onanga koiwa manga haku yogogere Ahi Tauoka. Onanga yatobote de yodiai hagala o jaji, de ihihuba o aiwani önanga yakunu yatatoko o bodito. Boteka de gënanga yakunu önanga youtumu?

¹⁶Mamoi iböto Ngohi tahiromanga önanga o zaitun magota mautu ma hokä irubu-rubu mangöe mahohoko marorahai. maöraha nënanga deo ruae mailingi yömodo-modongo aha Tatuhuku mahoka-hoka deʼ tatobiki majaga-jaga mata-mata.

¹⁷Ngohi nanga tohigö goko-goko o Israel deʼ o Yehuda, Ngohi, ma Jou Duru Tokokuaha. Maöraha nënanga Ngohi todatoroka mangale tädotagao o bodito onanguku. Onanga mahirete yodadi o hababu mata-mata gënanga, karana önanga yodiaioka o dorou, ena gënangala ihihuba o huhuba o Baal hiädono Ngohi tongamo.”

¹⁸Ma Jou wohingahu ngohino, mangale hagala ahi haturu manga datoro itotorou ngohino.

¹⁹Ngohi hokä o duba imanakoua yao yatoa-toaka mangï ika. Ngohi tohiorukua toönanga manga datoro itotorou ngohino madumutu. Onanga yato, ”Niaino ngone ha tol̄anga o gota mautu nënanga kamagogiriahi ënanga yakunu ihohoko; ngone habinaha ënanga hupaya maromanga o nyawa yawohanga.”

²⁰Daha ngohi tomä niata, ”Ya Jou Duru Nokokuaha, Ngona o hakimi noadi-adili; Ngona dika nauji-uji o nyawa manga dibanga deʼ manga hininga. Ahi perekara nënanga tohilapahi Ngonaika. Tanu ngohi yakunu tahakihi Ngona nabalahi manga manarama hagala o nyawa gënanga.”

²¹O Anatot makota manyawa yönahihu hupaya ngohi tohonenge. Onanga yato, ”Nako ngona kahokogenangika dika nohiado-adono ma Jou Ai behehongo ngomino, ngona aha ngomi mini toma.”

²²Karana gënanga, ma Jou Duru Wokokuaha wato, ”Ngohi aha tähukumu önanga. Toönanga manga gogoduru aha yohonenge o parangi magoronaka, toönanga manga ngoha-ngohaka aha o habirokata ihihonenge.

²³Ngohi tohitantuoka maöraha la tädotagao o bodito o Anatot ma nyawauku, deʼ nako toönanga manga hukumanga gënanga maöraha imahiadono, kaonyawa moiö ma aha koyootanua.”