Read Tobelo O YEREMIA 12 Bible Online

O YEREMIA 12 - Tobelo bible

O YEREMIA 12

¹”Nako ngohi tao ahi perekara Ani himangoka, ya Jou, maraioka aha i nyata igoungu ka Ngona itiai. Mä ngohi toigoli toleha Ngonaika o adili maloleha: Yadodoaho o nyawa madorou okia-kiaua yokuranga? Yadodoaho i idulu yaino o nyawa manga hininga iriko-rikotua yohasili?

²Onanga Nädatomo hokä iwöwango-wango, daha önanga imahingutuku, iwango, deʼ ihohoko. Onanga salalu yotemo-temo maoa-oa mangale Ani diri, mä manga hininga magoronaka, imoteke madiai inihaduliua Ngonaika.

³Mä Ngona, ya Jou, ngohi nohinako. Ngona namake okianaga tadodiai, deʼ Ngona nohioriki sarakia ahi hininga mamamao Ngonaika. Nätatauru hagala o nyawa madorou gënanga yohupu, nä ao önanga hokä o duba yatoa-toaka mangï ika. Nägoana önanga hiädono maoraha yadono önanga yätoaka.

⁴Hiädono hokokiaohi madekana o berera nënanga idudungu, deʼ mamomo imaai o dumule yögetongo? O totaleo deʼ o aiwani mahomoa ihonenge karana tongomi miahoana de miaberera manga dorou. Onanga yotemo, ngohi aha tamakeua okianaga idödadadi onangika.”

⁵Ma Jou wato, ”Yeremia nako ngona inibole nororebe deo nyawa, kiaka yakunu idadi ngona nororebe deo kuda? Nako o tonaka mahuru-hara koiwa-iwaka ngona nohawana, okia done aha nadiai nako ngona naga o hongana igogol̄owaka o Yordan ma ngairi madatekoka?

⁶Ngona ini hianatoka ani roriadodoto mahirete, önanga imahimoteke iniparangi ngona. Uha nängaku onangika, ngaroko toönanga manga demo-demo imutiti.”

⁷Ma Jou wato, ”O ngï Tögogogere Tahaduliokaua, Tongohi Ahi berera madutu Tamal̄aka, deʼ Ahi umati Tädora-dora Tähilapahioka toönanga manga haturu manga giama mahoatika.

⁸Ahi umati Toma ngiri-ngirikika ihi lawani Ngohi; hokä o singa o honganoka hoko gënanga önanga imapöaka Ngohino.

⁹Onanga hokä o totaleo o kawihi yoguruhe yautuku o kiaino honanga. Na ahoko hagala o aiwani o honganika la imahimoteke yämata-mataka önanga.

¹⁰Manga ngöe yokokuaha maporetino yakiliangoka Ahi angguru madumule deʼ yadoko-doko Ahi dumule. Ahi berera mahohailoa önanga yangali idadi o tonaka ikokakaha kairïdika.

¹¹Itiai, Ngohi tamake önanga yadiai Ahi berera o ngï ka irïdika de kai hühuhaika. Yamode-modekika yolegaikaua, moiua naga ihidö dailako.

¹²O tonaka ikokakaha ol̄oku mabuturungoka mahonongaka de yaino, hagala o nyawa yoboa la yaora. Ngohi tädotagao o parangi la yakilianga o berera yamode-modekika hiädono kamoiö ma moiua o nyawa yakunu yowango deo dame.

¹³Ahi umati ihibarihi o gandum yodatomo, mä kaohihika yautuku. Onanga imahihuha de ima hikangela mä manga usaha koi hasilua. Ngohi duru ihitohata hiädono önanga yautu-utuku i dadiua.”

¹⁴Ma Jou wato, ”Nenanga doka Ahi behehongo mangale hagala o negara imakokadateke deo Israel yakokiliangoka o berera Tahidoa-döaka Ahi umatika o Israeloka. Hokä idö dato-datomo yarahuku o tonakil̄e, hoko genangoli hagala o nyawa madorou gënanga aha Tahihupu toönanga manga bereraino, deʼ o Yehuda aha Tahirehene toönanga manga giama mahoatika.

¹⁵Mä tahihupuoka önanga dei pahaika, Ngohi aha tadorali önanga; moi-moi o hoana deo berera aha Ta ao Tahigilio manga bereraika mahirete.

¹⁶Nako önanga de manga hininga magahumu yomau yatarima Ahi umati manga agama, deʼ yomau yokoboto deyotemo, ’Dema Jou wowango-wango,’ — hokä mahira önanga yädotoko Ahi umati yokoboto deo Baal — done onangö ma aha yäetongo Ahi umati deʼ idadi okia-kiaua yokuranga.

¹⁷Mä o hoana deo berera yolu-oluku ihi himoteke Ngohi, aha Tarahuku idödato-datomo deʼ Tabinaha. Ngohi, ma Jou, totemoka.”