Read Tobelo O YEREMIA 13 Bible Online

O YEREMIA 13 - Tobelo bible

O YEREMIA 13

¹Ma Jou wohihuloko ngohi toiki toija o ngoere o lenan mabobolulu deʼ tapake, mä ngohi yakunua tatono o akeruku.

²De ngohi toiki toija o ngoere mabobolulu gënanga, daha tapake.

³De ipaha ma Jou wohitemoli ngohino, Wato,

⁴”Noiki o Efrat ma Ngairika, deʼ nagogono o ngoere mabobolulu gënanga o helewo madonga-dongaika.”

⁵Done imamoteke dema Jou Ai pareta ngohi toiki deʼ tagogono o ngoere mabobolulu gënanga imahitigi-tigika o Efrat ma Ngairika.

⁶O öraha muruono naga ipahaika ma Jou wohihuloko ngohi toikoli o Efrat ma Ngairika la tal̄ë o ngoere mabobolulu gënanga.

⁷Ho ngohi toiki, deʼ tohihupu o ngoere mabobolulu gënanga taiu-iunu mangï ino. Inyata o ngoere gënanga ibabitoka, deʼ hakali-kali ibaragunaokaua.

⁸De ma Jou wohitemoli ngohino, Wato,

⁹”Hoko gënanga madodagi aha Ngohi okianaga todiai o Yehuda manyawaika deʼ o Yerusalem yogögogere. Ngohi aha tawedere toönanga manga hininga magurutil̄e kabiahaua gënanga.

¹⁰O hoana deo berera yatotorou nënanga duru kahä dogowini manga häeke deʼ yoluku yohingounu Ngohino. Onanga yopuji deʼ imahi gilaongo hagala o gikiri mahomoaika. Mahababu gënanga önanga yodadi hokä o ngoere mabobolulu ibö baragunaokaua gënanga.

¹¹Hokä o ngoere mabobolulu ikekete ihiliko wapake-pake ai goronaino, hoko genangoli Ngohi ahi dungutu hupaya o Israeloka deʼ o Yehuda imahiliko ikekete Ngohino. De hoko gënanga önanga yodadi Ahi umati yadodiai Ahi romanga ihigogiriri deʼ yahoromati. Mä önanga yoluku ihihimoteke Ngohino.”

¹²Ma Jou Madutu wohitemo ngohino, ”Yeremia, nohingahu Ahi behehongo o Israel manyawaika moi-moi o rube-rube o angguru mangï kokiani yadol̄a ioma-omanga deo angguru. Onanga aha yohaluhu, ’O nagona yato ngomi mihiorikua o rube-rube yögetongo kokiani yaomanga deo angguru?ʼ

¹³Hoʼ nahetongo onangika hagala o nyawa o bereraka nënanga, o kokoano o Daud ai difauku, o imam-imam, o nabi, deʼ yongodumu o Yerusalem yogögogere aha Taguhe o angguru taoma-omanga hiädono yädaluku.

¹⁴Daha önanga aha Tähikoohana moi de moi. O bereki deo gikiri magö aha Tähidiai hoko gënanga ma apongo koiwa. Onanga aha Täbinaha koiwa mahayanga ekola madora. Ngohi, ma Jou totemoka.”

¹⁵Israel manyawa, ma Jou wotemoka! Uha nimahikurutil̄e, Unanga niwihigihene!

¹⁶Ma Jou nia Jou Madutu kokiani ngona nïgorakil̄e ihira de Unanga wonï dotagao o huhutu, deʼ anil̄ou ilakete o l̄oku mabuturungika, ihira deo dararono nö ngano-nganono Wangali idadi o huhutu.

¹⁷Nako ngona nöigoua nohigihene ngohi aha toari toma ngiu-ngiunu. Tamao ihi tora tögari niahininga magurutil̄e gënanga. Ahi kongo aha iuihi karana ma Jou Ai umati yätoraka hokä o dagokino.

¹⁸Ma Jou wohitemo ngohino, ”Nahuloko ma koano de ngoi ayo o popareta makuruhioka de youti, hababu manga makota mahöhailoa manga haekoka deitifaka.

¹⁹O Yehuda makota-kota o koreharail̄ë magogiria ihigiloliti, de moiua naga yakunu yakilianga ihigogilolitino gënanga. Mata-mata o Yehuda manyawa yätorakoka o tabuanga mangï ika.”

²⁰Ma Jou wätemo o Yerusalem yogögogerika, ”Niatailako nihidodiai. Nia haturu-haturu magogiriaka yoboa o koremieil̄ë! Kiaka yaika manyawa inïgoa-goana ngini deʼ ngini duru niahi amo-amoko gënanga.

²¹Aha ngini niato okia nako o nyawa ngini niahidiai hokä niadodiawo inï hohininga deʼ inïkuaha ngini? Maraioka ngini aha niamao mahiri hokä o ngoheka magogiriaka ami ngohaka imakil̄au.

²²Mudukua ngini nileha yadodoaho mata-mata gënanga yatapalu niadiri, yadodoaho niapakeanga ikakihi deʼ ngini inï pakisa. Kokiani nianako gënanga idadi karana niabaradoha i lamoko holi.

²³Kayakunu o nyawa manga daro-daromo yangali magare-garehe manga kai, ekola o harimau yahihanga makai ma ba bänga? Maraioka kowali! Hoko genangoli ngini nibiaha niadodiai o dorou koniakunua nidiai ma oa-oa.

²⁴Ngohi aha ngini tini hikitingaka hokä o afa yawuwu o hidal̄oko o tonaka ikokakahaino.

²⁵Genanga doka niawowango Tohi tantuoka karana ngini nihiwohangoka Ngohi, deʼ ningakuoka hagala o gikiri ielu-eluku.

²⁶Ngohi mahirete aha takakihi niapakeanga niaröehoka hupaya ngini kania hekonoka deʼ inï mal̄eke.

²⁷Ngohi tinï makeoka ngini nidiai hagala o hali Tö doha-dohata. Ngohi tinimakeoka ngini nianïki hagala o gikiri mahomoa o doporonoka deʼ o dumuleoka, hokä o nauru womatengo womi hidogohanga o nyawa mahomoa manga hekata ekola hokä o kuda manauru yonahihu o kuda mabekaika. O Yerusalem nigögogere nibodito ngini! Muruonoka aha ngini nibebasi deo dorou mata-mata?”