Read Tobelo O YEREMIA 14 Bible Online

O YEREMIA 14 - Tobelo bible

O YEREMIA 14

¹Ma Jou wohitemo ngohino hoko nënanga mangale o ngogoro hömodo-modongo.

²”O Yehuda mahininga ihuha makota-kota ngade ihonenge. Manyawa imaluluiha o tonakoka deʼ yotaiana. O Yerusalem ipöaka igahoko yöriwo.

³Yalöleleani o kaya manyawa yähuloko yalingiri o akere kiaika honanga; o humu-humuika önanga yoiki mä koiwaka mata-mata ma akere. Kamahomoa o akere mangï önanga yoao-ao ihigilio. Yobingu deʼ manga ngonganono itoaka önanga yämal̄eke deʼ manga biono yatamunu.

⁴Koi awanua deʼ o tonaka idudungu matore-tore; yototumule manga biono yatamunu hababu duru yosanangiua.

⁵O momo koiwakali; hababu gënanga o maijanga mal̄ayo ioikoka. Mangohaka daha imahiadonino yamal̄aika o tonaka ikokakahaoka.

⁶O l̄oku matubuoka o keledai ihühuhuku kaima okoino dika, malako kai ruhu-ruhuku karana koiwa o momo; ënanga iwohama kama dobi-dobiki hokä o serigala.

⁷Ahi umati yopöaka, ’Jou, ngaroko miabaradoha imïkalaki ngomi mä nomïriwo ngomi imoteke de Ani jaji. Ngona nomi mal̄aka ngomi nohi gali-galiigoungu, ngomi mibaradoha Ngonaika.

⁸Ngona o Israeloka manga ngonganono duga-duga kanomatengo, nomihihohalamati ngomi o boditoino. Mä yadodoaho Ngona hokä o nyawa maporetino tongomi mia bereraka, hokä o nyawa o dagi-dagino notulu o hutu moi de ipaha noma joboka?

⁹Yadodoaho Ngona hokä o nyawa yobingu-bingu; hokä yonau-nauru nakunua nomï riwo? Mä, maraioka Ngona tongomi mia hidogoronaka, Jou! Ngomi Ani umati, uha ngomi Nomï mal̄aika!ʼ ”

¹⁰Mangale o hoana deo berera gënanga ma Jou wato, ”Ngohi tosanangiua de o nyawa geönanga yöigo-igo Ngohioka deyo piringana, deʼ yoluku yakuaha manga diri. Ngohi kotawohangua toönanga manga howono, Ngohi aha tähukumu önanga karana toönanga manga baradoha.”

¹¹Ma Jou wohitemo ngohino, ”Uha nogahoko Ngohi täriwo o nyawa geönanga.

¹²Ngaroko önanga yopuaha, Ngohi toluku tohigihene toönanga manga boaka yogahoko o roriwo, deʼ ngaroko ihihuba Ngohino o huhuba itötuhu-tuhuku deʼ o huhuba o gandum, Ngohi aha täsanangiua önanga. I idulu yaino, Ngohi aha täbinaha önanga deo parangi, o habirokata, deʼ o bobaku o panyake.”

¹³De ngohi totemo, ”Ya Jou Duru Nokokurutil̄e, Ngona nohioriki o nabi-nabi yotemoka o kawahaika aha koiwa o parangi ekola o habirokata, karana Ngona nojajioka o bereraka nënanga aha salalu naga o dame.”

¹⁴Mä ma Jou wohaluhu, ”O nabi-nabi gënanga yoao o abari i elu-eluku de tongohi Ahi romanga; Ngohi tähulokua önanga, deʼ tahidöaka o pareta ekola Tätemo-temo onangika. Hagala o lolega önanga yoade-ade Ngohi inoua; önanga ihingahu okianaga idädadiowahi hagala o hali iböbaragunaua önanga mahirete yatatoro o ade-ade.

¹⁵Onanga yahetongo de tongohi Ahi romanga o berera nënanga aha yatapal̄ua o parangi ekola o habirokata, enahioko Ngohi tähulokua önanga yahetongo gënanga. Ngohi, ma Jou, tonihingahu ngonaika, Yeremia, okianaga aha Todiai deo nabi-nabi Tähulo-hulokua gënanga, Ngohi aha tätoma önanga deo parangi ekola o habirokata.

¹⁶Hagala o nyawa yatotarimaka idädadiuahi ma abari onangö gënanga aha yatoma demadodagi imakokadaene. Toönanga manga maiyeti aha ihikaweli o ngeko-ngekomika o Yerusalem makotaka kamoiua naga yäjere. Hoko gënanga toönanga manga ngango deʼ toönanga manga hekata de manga ngohaka manga ngango. Aha Tadiai önanga yamao toönanga manga dorou mahasili.”

¹⁷Ma Jou wohihuloko ngohi tohingahu ahi hininga mahuha Ai umatika. Ngohi kokiani totemo hoko nënanga, ”Mal̄aikala ngohi toari tomatogu-togumu, o hutu deo wange ahi köngo itifa. Hababu ahi hoana de ahi berera manga nabo ma ago-agomo deʼ duru yohuha deyohangihara.

¹⁸Nako ngohi toiki o tonaka ilua-luasika tamake hagala o maiyeti o parangi ihi honenge. O kota magoronaka tamake o huha deo hangihara, hagala o nyawa ngade yohonenge yahabirokata. O nabi deʼ o imam ihidagi manga manarama imangaratiua okianaga önanga yadodiai.”

¹⁹Jou, Näumoka o Yehuda kama moiuku deʼ yogögogere o Sion Ngona nädohata? Yadodoaho hoko gënanga makuata Nomï gohara ngomi hiädono ngomi yakunokaua mitoguli? Parasuma dika ngomi milingiri o dame, koiwa mabaraguna ngomi mionganono mitogumu, hababu nanga naga duga-duga kao gangamo.

²⁰Jou, ka Ngonaika dika ngomi mibaradohaka. Ngomi mimangaku tongomi mia baradoha mahirete deʼ tongomi mia ete de mia tohora manga baradoha.

²¹Nomahininga Ani jaji, uha ngomi Nomihikauku; Ani jaji dede ngomi uha Ngona nohidadiua. O Yerusalem Ani popareta makuruhi imomulia mangï, uha Ngona nohikauku.

²²Hagala o hoana deo berera mangagikiri yakunua ihiguti o awana o duniauku. O dihanga makoyakunua o yapuraraha o awana de toenanga makuaha mahirete. Duga-duga ka Ngona tongomi mia ngonganono. Ngona nadiai mata-mata gënanga kaidadi.