Read Tobelo O YEREMIA 15 Bible Online

O YEREMIA 15 - Tobelo bible

O YEREMIA 15

¹Ma Jou wohitemo ngohino, ”Ngohi aha tädoraokaua o hoana deo berera nënanga, ngaroko o Musa deʼ o Samuel imaokoino nenangokadau la yogahoko o hayanga deo dora mangale önanga. Nahuloko yoiki o hoana deo berera nënanga, Ngohi toluku tämake önanga!

² Nako önanga yoleha ngonaika kiaka kokiani önanga yoiki, nohaluhu hoko nënanga, ’Ma Jou wato, ihi tötantuoka lawohonenge karana wopanyake mal̄aikala ünanga wohonenge karana o panyake. Ihi tötantuoka lawo honenge magoronaka mal̄aikala ünanga wohonenge o parangi magoronaka. Ihi tötantuoka wo honenge karana iwi hahini mal̄aikala ünanga wohihonenge o hahini! Ihi tötantuoka la iwitagoko mal̄aika ünanga iwitoraka hokä o dagokino!ʼ

³Ngohi, ma Jou, tohitantuoka o hukumanga iata yömodo-modongo aha idadi onangika: önanga aha yohonenge o parangi magoronaka, toönanga manga maiyeti aha o kaho yatatauru, o totaleo yaol̄omo, deʼ o aiwani madorou yamata-mataka.

⁴ Ngohi aha tadiai o hoana deo berera o duniaka yaporohono yämake önanga. Mata-mata gënanga Tadiai karana o Manasye o Hizkia aingohaka o Yerusalemoka ai manarama maöraha ünanga wodadi o Yehuda manga koano.”

⁵Ma Jou wätemo, ”Hei o Yerusalem nigögogere, o naguna aha winïdora ngini? O naguna womau ai hininga ihuha dede ngini? O naguna womau wotulu lawo leha okianaga idädadi nginioka?

⁶Ngini nihitilaka deʼ Ngohi nihimal̄aikaka, karana gënanga Tatoakika Ahi giama la tinïbinaha ngini, hababu ngohi ihikihounoka tatumu-tumungu Ahi gangamo.

⁷O kota yögeto-getongo o bereraka nënanga ngini aha Tinïumo hokä o gandum ma roehe madoolenge. Ngaroko ngini ganga Ahi umati mä Ngohi aha tinïbinaha ngini deʼ nia ngoha-ngohaka karana ngini nioluku nia ngali nia wowango madodadi.

⁸Nia berera aha iomanga deo bobobao, iholoi iwöe deo dowongi o gahi madatekino. Hagala o nyawa aha Tätomaka imagö ikahi hiädono toönanga manga ayo yamao o huha deo hangihara. O wangeoka Tadotagao onangika womatengo wabobinaha hiädono önanga yamao yohawana deʼ manga hininga ihuha.

⁹O ngo ayo ami ngohaka o nauru yohö hone-honenge yatumidi mokiditoko karana ami womaha itokeme. Ami ngango mawange idadioka ihuhutu, münanga mamao imi hikauku deʼ imimal̄eke. Nia haturu Tahuloko yätoma yowö wango-wangohi tingini nia hidogoronaka. Ngohi, ma Jou, totemoka.”

¹⁰Igoungu ngohi nënanga tosoe! Mangale okia ngohi ayo mohihingohaka? De o nyawa moi-moi o bereraka nënanga ngohi kokiani mimakokalawani deʼ mimateke roributu. Ngaroko ngohi komaiwa tahibau ekola tobau, mä ngohi ihilolai mata-mata o nyawa.

¹¹Jou, nako igoungu tohidodiaiua ahi manarama tadiai, deʼ tariwoua ahi haturu Ani himangoka maöraha önanga yamake o bodito deʼ o huha, mal̄aikala hagala o nyawa gënanga manga lolai igou-goungu idadi. (

¹²Kao nyawa moiö mayakunua yatobiki o behi, maboboloi o behi o koremieil̄e ihi sapu-sapurinoka deo tabaga.)

¹³Ma Jou wohitemo ngohino, ”Ngohi aha tohidingoto o haturu layä toraka Ahi umati manga kaya deʼ manga arata hokä o hukumanga o baradohauku önanga yadodiaioka o berera yamode-modekika.

¹⁴O berera mahomoaka önanga koya nako-nakoua, Ngohi aha tadiai toönanga manga haturu manga gilaongo, hababu Ahi dohata i hebuloka hokä o uku ihiru-hiru deʼ ioluku ihonenge.”

¹⁵De ngohi totemoka, ”Jou, Ngona nomangarati. Nohihininga deʼ nohïriwo ngohi. Nabalaha önanga ihïgoginïki deʼ ihituku-tuku ngohi. Uha kalioli Nosabari nabalahi onangika hiädono önanga aha ihasili ihi toma ngohi. Nohohininga karana Ngona ngohi ihihikauku.

¹⁶Ngona Nohi temo-temo ngohino, deʼ ngohi tohigihene Ani demo moi-moi. Ngohi to Ngona, ya Jou ma Jou Madutu Duru Nokokuaha, karana gënanga hagala Ani demo tosanangi deʼ tamao toutumu.

¹⁷Ngohi tomahimotekua tomahi sosanangi de hagala o nyawa imatoomu la imateke hohangaja. Karana tohingounu Ngonaika, ho ngohi katoma tengo-tengoka de tamao ihi tohata.

¹⁸Yadodoaho ngohi kahokogenangika dika tamao o huha de o hangihara? Yadodoaho ahi nabo ma ago-agomo deʼ koitogu-togumua? Boteka Ngona ani dungutu ahi hininga nahuha hokä o ngairi i dadi idudungu o ngogoro maorahoka?”

¹⁹Ma Jou wohaluhu, ”Nako ngona nomakilioro, Ngohi aha tonitarima. Ngona aha nodadioli Ahi gilaongo. Nako ngona nohingahu hagala o hali iböbaraguna deʼ nohihohomoaua, done ngona yakunu nodadioli Ahi nabi. Hagala o nyawa aha yoboali ngonaika, deʼ iparaluua ngona noiki onangika.

²⁰Onangika ngona aha nodadi hokä o bebeno o tabaga. Onanga aha iniparangi ngona, mä ngona aha yakunua ini hohihanga. Ngohi aha dede ngona la Tonïgoana deʼ Tonihihalamati ngona.

²¹Ngohi aha Tonihilapahi ngona o nyawa madorou manga hayanga koiwa-iwano. Ma Jou, totemoka.”