Read Tobelo O YEREMIA 16 Bible Online

O YEREMIA 16 - Tobelo bible

O YEREMIA 16

¹Ma Jou wohitemoli ngohino, Wato,

²”Uha deʼ nomämake o ngohaka mangï nenangokadau.

³Aha Tahetongo ngonaika okianaga aha idödadadi deo ngoha-ngohaka imakokil̄au nenangoka deʼ toönanga manga dimono.

⁴Onanga aha yohonenge yakorona o panyake ihihone-honenge, deʼ önanga aha yohonenge o parangi magoronaka ekola ihi honenge o habirokata. Moiua o nyawa yägari ekola yälungunu önanga. Toönanga manga maiyeti aha ihikabarihika hokä o pupuk o tonakoka, deʼ o totaleo inoli o aiwani madorou ya ol̄omo.

⁵Uha noiki o nyawa magogiria yoduka manga tauika, Yeremia. Uha nomahipake o huha mapakeanga mangale o nagona dika. Ngohi aha tahibarakatiokaua Ahi umati deo wowango isosanangi deʼ aha tohi dumutokaua o hayangi mamao ekola o dora deo hayangi onangika.

⁶O kaya manyawa deʼ o mihikini manyawa o bereraka nënanga aha yohonenge de moiua naga yälungunu. O nyawa moiua aha yähangihara manga diri ekola manga häeke yakori hokä manonako manga hininga ihuha mangale önanga.

⁷Moiuali yömodeke imatoomu yogahoko o barakati mangale yälaru o nyawa magogiriaka yamao o huha. Moiua imahimoteke yoduka maboboloi deo nyawa manga ayo ekola manga ama yohihangoka.

⁸Uha nowohama o nyawa magogiriaka yorameanga manga tauika. Uha nol̄omo deʼ nokere dede önanga.

⁹ Nohigihene okianaga Ngohi, ma Jou Duru To kokuaha o Israel manga Jou Madutu, tomau tahetongo ngonaika. O morene deʼ o hininga mangigo mailingi inoli o kawingi marameanga aha mata-mata Tatogumuku. O hali gënanga o nyawa yowö wango-wango ani orahoka nënanga aha yahakihi.

¹⁰Nako ngona nohiadono mata-mata nënanga onangika, mudukua önanga aha yoleha yadodoaho Ngohi tomau tähukumu önanga hoko gënanga makuata. Onanga aha yoleha okia manga howono deʼ manga baradoha Ngohino, ma Jou toönanga manga Jou Madutu.

¹¹Nahingahu onangika Ngohi totemo hoko nënanga, ’Nia ete de nia tohora ihimal̄aka Ngohi la yohuba deʼ yopuji o gikiri mahomoaika. Onanga ihïlegaikaua Ngohi deʼ yoluku ihingounu hagala Ahi datorika.

¹²Mä ngini nidiai iholoioli itorou. Ngini niahäeke i togowini deʼ duga-duga niamoteke niamau mahirete itotorou. Ngini nioluku nihingounu Ngohino.

¹³Karana gënanga, ngini aha Tinïduhu o bereraka nënanga deʼ Tinïumo o berera moika hakali-kali ngini deʼ nia ete de nia tohora niabiahaua. Dokengoka ngini aha o hutu deʼ o wange nipuji hagala o gikiri mahomoaika, deʼ Ngohi aha tini hayanga de tini doraua nginiika.’

¹⁴Ma Jou wotemo, ”Aha iboa maoraha o nyawa yokobotokaua de Ani romanga, o Jou Madutu towango-wango, ta ao-ao o Israeloka o Mesir mabereraino deyo hupu,

¹⁵duga-duga de Ahi romanga, o Jou Madutu towango-wango, ta ao-ao o Israeloka yohupu o berera moi ino o koremieuku idaduoka deʼ mata-mata o berera mahomoaino kiaka önanga Tahikokitingakoka. Onanga aha Tä ao tahigilioli toönanga manga tonaka madutuika, o berera Tahidoa-doakoka manga ete de manga tohoraika.”

¹⁶Ma Jou wotemo, ”Ngohi tomau tä ahoko manga ngöe o nawoko yotago-tagoko layätagoko o nyawa neönanga. Deipaha Ngohi aha ta ahoko manga ngöe yo l̄ia-l̄ia layal̄ia önanga o l̄oku deo doporono yögeto-getongo, deʼ o doporono o helewo ma aru-arukika.

¹⁷Ngohi tamake hagala yadodiai önanga. Koiwa naga i iu-iunu mangale Ngohi; toönanga manga baradoha Ngohi tamakeoka.

¹⁸Toönanga manga baradoha deʼ manga dorou aha Tabalahi deo hukumanga o lape hinoto, karana deo gomanga mangöe önanga yapesekoka Ahi berera. Hagala o gomanga gënanga koiwa majiwa hokä o maiyeti.”

¹⁹Jou ka Ngona nohï goa-goana ngohi deʼ nohihidöaka o kuata ngohino; Ngona nohïriwo ngohi o huha maorahoka. Hagala o hoana deo berera o dunia mabaha-bahaino aha yoboa Ngonaino deʼ yotemo, ”Tongomi mia ete de mia tohora de manga gikiri duga-duga o gikiri madutuua hakali-kali koi baragunaua.

²⁰Kayakunu o nyawa imädiai mahirete manga gikiri? Maraioka kowali. Yadodiai gënanga maraioka o Jou Madutua.”

²¹”Karana gënanga,” ma Jou wato, ”mamoi nënanga Ngohi aha tadiai hagala o hoana deo berera yamao Ahi kuaha deʼ Ahi kuata hupaya kahiado-adonika önanga aha ihioriki ka Ngohi ma Jou.”