Read Tobelo O YEREMIA 17 Bible Online

O YEREMIA 17 - Tobelo bible

O YEREMIA 17

¹Ma Jou wotemo, ”Hei o Yehuda ma hoana dema berera, niabaradoha yögaradeoka niahiningaika, deʼ niahuhuba mangï malibukuika mata-mata deo pena o behi mapena madoto o intan.

²Hagala nia nyawa yopuji o huhuba-huhuba mangïoka deʼ o gomanga maloliate ihi goko-gokoil̄eoka mangale o Dewi Asyera o gota mautu mahoka irörubu-rubu yogeto-getongo o doporono ma tubuoka,

³deʼ hagala o l̄okuoka o kota maporetoka. Karana mata-mata o gomanga yahuba-huba mangï ngini nihigoko-gokoil̄eoka o berera yamode-modekika deʼ karana hagala o baradoha ngini nia dodiaioka, hoʼ Ngohi aha tadiai niahaturu-haturu yagoraka hagala nia arata deʼ nia kaya.

⁴Ngini aha dema pakisa nihidöaka o tonaka Tinihidoa-doakoka nginika, deʼ Ngohi aha tadiai ngini nima gilaongo nia haturuika manga bereraka hakali-kali ngini konia biahaua. Ngohi tadiai mata-mata gënanga karana Ahi dohata ihebuloka hokä o uku itoka-tokara deʼ yakunua yahohonenge.”

⁵Ma Jou wotemo, ”Nako womatengo wohimal̄aika Ngohi, ai Jou, deʼ womahinganono o nyawaika inoli woma hibuturungu ai kuatika done Ngohi aha tïhukumu ünanga.

⁶Unanga hokä yadato-datomo iwango o tonaka ilua-luasoka, o tonaka ikokakahaka, kai rïdika deʼ magahi-gahi, komaiwa ünanga wamao ma oa-oa.

⁷Mä o nyawa imahingano-nganono Ngohino salalu Tahibarakati.

⁸ Unanga hokä o gota mautu o ngairi ma akere ihähahuru madatekoka; mangutuku mangöe itahe hiädono o akeruku. Unanga womodongua o ngogoro maoraha mahoka-hoka salalu ma ijo-ijo. Ngaroko o berera yadaene o hiwara, ünanga ai hininga i huhaua hababu ünanga salalu wohohoko.

⁹O nyawa manga hininga hatuga hakunua, hagala moi-moi duru iwöe manga akali itorou deʼ itubuho holi manga panyake.

¹⁰ Ngohi, ma Jou, tatö tailako o hininga Tauji o nyawa manga hininga madol̄a. Moi-moi o nyawa aha Tabalahi imoteke ai kalakuanga, deʼ Tihidiai imoteke ai manarama.”

¹¹Hokä o totaleo yömoduku toenangua magohi, hoko genangoli o nyawa manga hininga iriko-rikotua yamake o arata. Ai umuru itogoronaika aha unangoka dei hihanga ai arata mata-mata. Ai wowango mabobahaka inyata igoungu ünanga duru o nyawa bodo.

¹²Tongone nanga Jou Ai tau hokä o popareta makuruhi imomulia, ol̄oku magö gurutil̄eoka imulaenge madodihirakahi.

¹³Jou, ka Ngona o Israeloka Ani umati, manga ngonganono; mata-mata ini mal̄a-mal̄aka aha yämal̄eke. Onanga aha yohihanga o duniaka nënanga deʼ yoiki o nyawa yohone-honenge manga duniaika. Hababu, Ngona o akere mangango matiti önanga yamal̄aka, ya Jou.

¹⁴Jou ngohi nohihitogumu, done ngohi aha idadi totumuloa. Ngohi nohihihalamati, done ngohi aha tohalamati. Ngona dika toni himomulia!

¹⁵O nyawa ihitemo ngohino, ”Kiaka yaika ma Jou Ai gogohara mata-mata gënanga. Mal̄aikala öraha nënanga idadi!”

¹⁶Mä, ya Jou komaiwa ngohi tonigegoto hupaya Ngona nadotagao o bodito onanguku. Ngohiötö igoua hupaya önanga yätapalu o bodito. Ngona nohioriki gënanga, Jou. Ngona nohioriki okianaga taheto-hetongo.

¹⁷Uha Ngona nodiai okianaga moi yahawa-hawana ahi hininga. Ngona ahi ngï toma hiditokika nako iboa o huha.

¹⁸Tanu ihïgoginiki deʼ ihitötuku-tuku ngohi, Nahimal̄eke deʼ kayo hawa-hawanika. Mä uha nodiai hoko gënanga ngohino, ya Jou. Nädotagao o bodito onanguku hiädono önanga yobinaha yowede-wederuku.

¹⁹Ma Jou wohitemo ngohino, ”Yeremia, noiki o kawaha manga Ngorana ma Lamo-amokika yanö nonu o Yehuda manga kokoano nako önanga yohupu yowohama o kotaika. Noikoli o ngorama ma ago-agomo mahomoaika mata-mata o Yerusalemoka.

²⁰Nohiädono Ahi behehongo o kokoanoika deʼ mata-mata o Yehuda ma nyawaika inoli yongodumu o Yerusalem yogögogere yakokaino o ngora-ngoranino gënanga.

²¹ Nahetongo hoko nënanga: ’Nako ngini niö igoua nihonenge, kokiani uha niatoraka niabaranga o Sabat mawangeoka, ekola niao nihingohama nianonu o Yerusalem mangorana ilamo-amoko.

²² Uha nikarajanga ekola niao o baranga okianaga dika nihihupu niatauino o Sabat mawangeoka. Niatingakika o wange gënanga mangale Ngohi hokä Tohipoparetaka nia ete de nia tohoraika.

²³Mä nia ete de nia tohora yoluku ihigihene ekola yöhohininga okianaga Taheto-hetongoka. Onanga manga häeke itogowini deʼ yoluku ihingounu ekola hähidaaere.

²⁴Nihingounu mata-mata Ahi pareta. Uha niatoraka o baranga okia dika nianonu o kota nënanga mangorana ilamo-amoko o Sabat mawangeoka. Niatingakika, o Sabat mawange mangale Ngohi, deʼ uha niakarajanga okianaga dika mawangeoka gënanga.

²⁵Nako ngini niagou-goungu nihidagi Ahi pareta-pareta gënanga, done o kokoano deʼ o pegawe-pegawe yopopareta hokä o Daud aha yöngohama o Yerusalem makota mangorana ilamo-amoko. Onanga kamamoi deo Yehuda manyawa deʼ o Yerusalem yogö gogere, aha yöbarene o kuda makereta, hiädono o Yerusalem makota idadi duru kahä rame.

²⁶Hagala o nyawa aha yoboa hagala o Yehuda makota de yaino, deʼ o kapo-kapongino o Yerusalem magilolitino; önanga aha yoboa o Benyamin ai daera de yaino, o doporono matimioka de yaino, ol̄oku mabuturungu madaera de yaino, deʼ o Yehuda o koreharail̄e idaduoka de yaino. Onanga aha yoao Ahi Tauika hagala o aiwani ihi huba-huba, kayaoa yatötuhu-tuhuku ekola kowali, o huhuba o gandum deʼ o manyanyi inoli o syukur mahuhuba.

²⁷Mata-mata gënanga aha idadi nako ngini nihingounu Ngohino deʼ niatingaka o Sabat mawange mangale Ngohi. Uha niatoraka o baranga okianaga nianonu o Yerusalem mangorana ilamo-amoko o wange gënanga. Nako ngini niatilakuru Ahi pareta-pareta nënanga, o Yerusalem mangorana ilamo-amoko inoli makadato aha Tatuhuku imata-mataka deʼ o uku gënanga yakunua yahohonenge.’ ”