Read Tobelo O YEREMIA 18 Bible Online

O YEREMIA 18 - Tobelo bible

O YEREMIA 18

¹Ma Jou wohitemo ngohino,

²”Noiki o bohoko o tonaka wododiai ai tauika; dokengoka aha Tohiadono Ahi behehongo ngonaika.”

³De ngohi toiki o bohoko o tonaka wododiai ai tauika deʼ ngohi timake ünanga magogiriaka wokarajanga de ai nonouhu.

⁴Nako o bohoko o tonaka wododiai gënanga ikuranga itiai ünanga wohigalioli wakarajanga idadi o bohoko o tonaka mahomoa imoteke ünanga womau.

⁵Daha ma Jou wohihuloko ngohi tahetongo o Israel manyawaika.

⁶”Hei Ahi umati, o nagona yato Ngohi hotakunua Todiai nginika hokä wadodiai deo tonaka matau-taulu gënanga? Hokä o tonaka matau-taulu o bohoko o tonaka wadodiai gënanga ai giama mahoatoka; hokogenangoli ngini Ahi giama mahoatoka.

⁷Nako o öraha mamoiuku Ngohi taputuhu la tadohigoraka, takilianga deʼ tabodito moi o hoana deo berera ekola o popareta,

⁸daha o hoana deo berera gënanga yotoba de toönanga manga baradoha done Ngohi aha tohidadiua Ahi niata gënanga.

⁹I idulu yaino, nako Ngohi taputuhu mangale tohigoko ekola takuata moi o hoana deo berera ekola o popareta,

¹⁰mä maduruino o hoana deo berera gënanga ihingounua Ngohino de yodiai itotorou, done Ahi niata gënanga ko Tohidadiua.”

¹¹Ma Jou wohitemo ngohino, ”Oraha nënanga, nahetongo hagala o Yehuda ma nyawaika deʼ o Yerusalem yogögogere Ngohi magogiriaka todiai okianaga tatatoroka la tälawani önanga, deʼ tasadia o hukumanga mangale önanga. Nähuloko önanga imatogumu de toönanga manga wowango iböbaradoha gënanga inoli ihidiai yaoa toönanga manga kalakuanga de manga managama.

¹²Mä önanga aha yohaluhu, ’Okia mabaraguna? Ngomi aha kahirahi mianïki tongomi miamau mahirete! Ngomi moi-moi aha miadiai tongomi miahininga manahihu itotorou!ʼ ”

¹³Ma Jou wotemo-temo, ”Nialeha o hoana deo bereraika nio geto-getongo boteka mamoi iböto idadi o hali hokä hoko nënanga. O Israel manyawa yodiaioka okianaga moi yöboborohono!

¹⁴Komaiwa o domoata ihihanga o Libanon mal̄oku ihohelewoka. Komaiwa o akere mamäta ihähahuru ol̄oku ma buturungino idudungu.

¹⁵Mä Ahi umati ihi wohangoka Ngohi, deʼ yotuhuku o dupa mangale o gomanga. Onanga yahidatatokino o ngekomo ihira-hira inoka kiaka kokiani önanga yatilakuru, deyörehene o ngekomo irata-ratauwahika.

¹⁶O berera nënanga önanga yadiaioka yoboborohono mangï, deʼ salalu yodadi o hohedu mangï. Mata-mata yokokaino aha manga häeke yagiwi-giwi karana yamao yaporohono.

¹⁷Hokä o kafo o hidal̄oko o wange mahiwariha yawuwu, hoko genangoli Ahi umati aha Tahigerewoto manga haturu manga himangoka. Nako o bodito iboa, Ngohi aha täporetika önanga deʼ tariwoua önanga!”

¹⁸O nyawa yotemo-temo, ”Niaino ngone hodiai o doomu itotorou hilawani o Yeremia. Duga-duga ka unangua yakunu wotemo-temo mangale ma Jou Madutu. Salalu aha naga o imam ya aku-akunu i hidöaka o dodotoko, naga o nyawa yobobarija ya aku-akunu i hidöaka o nasihati; deʼ naga o nabi ya aku-akunu ihiädono ngoneino hagala o behehongo ma Jouino. Niaino ngone hïkalaki o juruhakimika deʼ hoihe-ihenokaua ai demo-demo.”

¹⁹De ngohi toma niata, ”Jou noihene ahi niniata; nohininga nohidodiai okianaga yohö heto-hetongo ahi haturu mangale ngohi.

²⁰Kaipatutu o oa ihibalahi deo dorou? Mä önanga yohaitoka o baiti hupaya ngohi ihi otaka magoronauku. Nö hohininga ngohi täriwoka önanga Ani himangoka, hupaya Ngona uha nängamo onangika.

²¹Mä öraha nënanga, Jou, mal̄aikala toönanga manga ngoha-ngohaka o hahini ihihonenge ekola yohonenge o parangi magoronaka. Mal̄aikala toönanga manga ngongoheka manga rokata deʼ manga ngohaka yohihanga; mal̄aikala o nau-nauru yohonenge karana o bobaku o panyake deʼ o gogoduru yohonenge o parangi magoronaka.

²²Nähuloko yo ora-ora yoboa yahitodokanika toönanga manga tauika, hiädono önanga yopoa-poaka yohawana. Onanga yo haitoka o baiti hupaya ngohi ihiotaka magoronauku deʼ önanga ihi akanoka o modoi la ihitagoko ngohi.

²³Mä Ngona, Jou, nohioriki mata-mata önanga yatatoro yadiai la ahi nyawa yahou. Karana gënanga, uha nahiapongo önanga, uha naehe toönanga manga howono. Nägohara önanga hiädono yoruba. Okia naga moi nodiai onangika Initohata magogiriaka.”