Read Tobelo O YEREMIA 19 Bible Online

O YEREMIA 19 - Tobelo bible

O YEREMIA 19

¹Ma Jou wohihuloko ngohi toiki toija o buyu, deʼ tahigaro yamuruono naga o hoana deo berera ma tutuda inoli yamuruono naga o imam-imam o bobereki,

² la toiki dede önanga o Hinom ma Wai ika miatilakuru o Baling ma Ngorana ma Amo-amoko. Dokengoka ngohi kokiani tohingahu okianaga Wohi bobehehongo ngohino.

³Ngohi kokiani totemo hoko nënanga, ”Hei o Yehuda ma kokoano deʼ o Yerusalem nigögogere. Ni ihene okianaga Ngohi, ma Jou Duru Tokokuaha, o Israeloka manga Jou Madutu, tomau Ta hetongo nginika. Ngohi aha Todotagao o bodito ma ago-agomo o ngïuku nënanga hiädono o nyawa ihigö gihe-gihene yatodokana.

⁴O hali gënanga Todiai karana o hoana deo berera nënanga ihi mal̄aka Ngohi. Onanga yapeseke o ngï nënanga de ihihuba o huhuba o gikiri önanga yanö nako-nakoua, manga ete de manga tohora yanö nako-nakoua deʼ o Yehuda manga kokoano. Onangö ihi omangoka o ngï nënanga deo nyawa yahowo-howonua manga awunu.

⁵ Onanga ihigokoka o Baal mahuhuba mangï la ihihuba toönanga manga ngoha-ngohaka hokä o huhuba yatö tuhu-tuhuku, ena hioko Ngohi komaiwa Tähuloko önanga yodiai o hali gënanga, maboboloi komaiwa o hali hoko gënanga ipuda Ahi dibanga magoronaka.

⁶Hababu gënanga, aha iboa maöraha o ngï nënanga yahetongokaua o Tofet ekola o Hinom ma Wai, duga-duga yä Toma-toma ma Wai.

⁷O ngïoka nënanga Ngohi aha Tatatoko mata-mata yatätatoro o Yehuda manyawa deʼ o Yerusalem yogögogere. Onanga aha Tämal̄aika toönanga manga haturu yähohihanga deʼ yatoma o parangi magoronaka. Toönanga manga maiyeti aha Tamal̄aika o totaleo deʼ o aiwani madorou yaol̄omo.

⁸Ngohi aha Tohitapal̄u o bodito yömodo-modongo o kotauku nënanga hiädono moi-moi o nyawa yakokaika genangika aha yätodokana deʼ yäporohono.

⁹Manga haturu aha ihi gilolitino o kota nënanga, deʼ ihidailako yätoma manyawa yogögogere. Ihi gilolitino gënanga duru kahägiria, hiädono hagala o nyawa o kota nënanga magoronaka moi-moi imaol̄omo manga dodiawo manga akeme, yomoholoioli toönanga manga ngoha-ngohaka mahirete.”

¹⁰Ipahaino ma Jou wohihuloko ngohi tapooteke o buyu gënanga o nyawa ihinö ninïki manga himangoka.

¹¹Ngohi kokiani tahetongo onangika ma Jou Duru Wokokuaha wotemo hoko nënanga, ”O hoana deo berera nënanga aha Takilianga hiädono hokä o buyu gënanga yakunokaua idiaioli. O nyawa aha yalungunu toönanga manga maiyeti o Tofet mabereraka, karana koiwaka mangï o jere mahomoa.

¹²O kota nënanga deʼ yögogogere aha Tadiai hokä o Tofet maberera.

¹³Mata-mata o tau o Yerusalemoka deʼ mata-mata o Yehuda ma kokoano manga tau aha idadi ipeseke hokä o Tofet, karana manga tau makatu mal̄okuoka gënanga o nyawa yotuhukoka o dupa mangale o dihanga magiki-gikiri, deʼ ihihuba o angguru o giki-gikiri mahomoaika.”

¹⁴De ngohi tamal̄a o Tofet, o ngï ngohi ihihuloko tohiadono ma Jou Ai behehongo. Ngohi toiki ma Jou Ai Tau malooaika deʼ toma okoino genangokadau, de tohingahu o nyawa mata-mataika,

¹⁵ma Jou Duru Wo kokuaha o Israel manga Jou Madutu, wotemo hoko nënanga, ”Karana ngini niahäeke itogowini deʼ nioluku nihigihene, done ngohi aha todotagao o kotauku nënanga deʼ mata-mata o kapongo magilolitino hagala o bodito Todato-datoroka.”