Read Tobelo O YEREMIA 2 Bible Online

O YEREMIA 2 - Tobelo bible

O YEREMIA 2

¹Ma Jou wohihuloko ngohi

²tohingahu o abari nënanga o nyawaika mata-mata o Yerusalem mabereraka, ”Hei Israel, Töhininga sarakia ani satia maöraha ngona kanoma gö ikahi; hokokia ma amoko ani hayangi maöraha ngone aha ho kawaingino. O tonaka ikokakahaika Ngohi nohinïki hanonu o daera koiwa naga yödatomika.

³Israel, ngona Toma hitongohi, Ahi gate mabelaka Toni haya-hayanga. Ngohi tahitapal̄u o bodito mata-mata yadodiai ngona nohuha deno hangihara, Ngohi, ma Jou, totemoka.”

⁴Ni ihene ma Jou Ai behehongo, hei ngini o Yakub aidifauku o Israel mahoana!

⁵Ma Jou wato, ”O howono okia niaete de niatohora yamake Ngohioka, hiädono önanga ihi hianati Ngohi? Onanga yakinïki o gomanga koiwa-iwa maragene deʼ mabaha önanga mahirete okiakaua yädaene.

⁶Ngohi koihi legaikaua; Ngohi, tätuda-tudaka önanga o ngekomika, deʼ taao önanga yo hoepu o Mesir matonakoka de tahihupu yatilakuru o tonaka ikokakaha, o daera matonaka mamomo koiwa-iwa mangöe iuti idoa, ikali madüdudungu inoli demabodito — o tonaka moi-moiua yögogere deʼ yanönonuua!

⁷O berera iboburereika önanga Tängotaka la yamao de yamake hagala mahasili deʼ hagala maoa-oa dokengoka. Mä genangokadau Ahi tonaka önanga yapeseke deʼ Tongohi ahi kia honanga önanga yadiai okianagamoi haemo-emono.

⁸Hagala o imam koiwa yoleha kiaka taika Ngohi, manga Jou. O tita magogokoö maihiorikua Ngohi o naguna, hagala yokokuaha yosatiaokaua Ngohino. Hagala o nabi yotemo-temo deo Baal maromanga deʼ yahuba o gomanga mafaida koiwa-iwa.”

⁹Ma Jou wato, ”O oraha nënanga Ahi umati Täperekarali, deʼ manga difauku Tahi juruhakimi.

¹⁰Niatowongi o Siprus mahohanino o wange madumuniha idaduoka, niahidingoto o nyawa o wange mahiwaroko o Kedar mabereraika, niatailako dokengoka nihidodiai, boteka mamoi iböto idadi o hali marupa hoko gënanga?

¹¹Komaiwahi moi o hoana deo berera ihitagali manga gikiri ngaroko gënanga kao Jou Madutua igou-goungu. Mä, Ahi umati ihihitagalioka Ngohi, önanga ihilamo-amoko de okianagamoi kokia-kiaua yakunu idiai.

¹²Karana gënanga, hei dihanga, nogiwi! Noheranga deʼ nohahara!

¹³Ahi umati yodiai o baradoha o rupa hinoto: önanga ihïporete Ngohi, o akere matiti ihidoa-döaka o ngango mangale o nyawa; önanga yodiaioka mangale manga diri o akere mangï mapidaha yakunua yatumungu ma akere.”

¹⁴”O Israel kogilaongo, o gilaongo manga difaukuua. Mä yadodoa ho önanga yodadioka manga lawani manga inomo?

¹⁵Manga haturu imapöaka onangika hokä o singa, manga tonaka idadi koiwa o momo iwangoil̄e deʼ kao homoa, hagala manga kota yamataka o uku yaol̄omo, yamal̄aika moiua yapaliara de moiua yögogere.

¹⁶Hei Israel, ani haeke matadauru yaguti o Memfis deʼ o Tahpanhes manyawa.

¹⁷Ngona mahirete nodadi o hababu mata-mata idädadi ani dirika, karana maöraha ngona Tonituda o ngekomika, ngona nohï porete Ngohi, ma Jou ani Jou Madutu.

¹⁸Okia mautumu ngona noiki o Mesirika? Nomau naokere o Nil ma Ngairi ma akere? Okia mautumu ngona noiki o Asyurika Nomau naokere o Efrat ma Ngairi ma akere?

¹⁹Anidorou mahirete yahukumu anidiri, ngona nohangihara karana nohitila Ngohi, ani Jou Madutu. O öraha nanga namao hokokia mamali deʼ mahihi nako Ngohi ngona nohïporete deʼ nohihoromatiua. Ngohi, ma Jou ani Jou Madutu totemoka; Ngohi nanga ma Jou o Jou Madutu Duru Tokökurutil̄e deʼ Duru Tokokuaha.”

²⁰Ma Jou wato, ”Madekanoka ngona noluku nomahi gilaongo Ngohino; noluku nohihingounu ekola nohihuba Ngohi. O doporono matubu-tubuoka yögetongo, deʼ o gota mautu mahoka irörubu-rubu matimiuku yögetongo ngona nahuba o burere magiki-gikiri.

²¹Ngona Tonidatomoka hokä o angguru magota mautu magihihi maoa-oa tairi-irikika. Mä o öraha nanga ngona nongali, nodadi o dadatomo o huhuku deʼ koiwa mafaida.

²²Ngaroko ngona nomaohiki denapake o sabongo duru mangöe, mä anihowono manoda ka Tamakeohi.

²³Duru nobarani ngona notemo ngona konopesekua, deʼ o Baal komaiwa ngona nanïki! Namake ahi kalakuanga o waioka, nomä hininga anidorou deʼ nomangaku! Ngona hokä o onta mabeka manahihu iboa, ipiringana yakaika yakaino yatumungu yakunua,

²⁴deʼ iwohama o tonaka ikokakahaika o gigoro koiwa-iwa. Enanga yakunua yatumungu nako magogiriaka manahihu iboa. Yonönahihu ënanga iparalua yalingi-lingiri, hababu maorahoka imol̄oka ënanga salalu imahidöaka maröehe.

²⁵Israel, uha ngona nomapopata nanïki hagala o gikiri, deʼ uha nomapöaka önanga nä ahoko, done anil̄ou ibodito deʼ aningomaha itore karana ani kiriti madudungu. ’Kowali, ngohi idadiua tomaidulu,’ ngona notemo, ’hababu ngohi töhininga hagala o gikirika, deʼ tomau taniki ënanga.’ ”

²⁶Ma Jou wato, ”Hokä wotohi-tohiki wamao iwi mal̄eke maöraha iwitagoko, hokogenangoli ngini mata-mata aha niamao inï mal̄eke, hei o Israel manyawa, o kokoano deʼ o popareta ma popegawe, o imam-imam deʼ nia nabi-nabi!

²⁷Ngini aha inïmal̄eke, hababu o gota o dobiki moi ngini nia ahoko ama deʼ o helewo o gahumu moi nia ahoko ayo. Ngini niboaua Ngohino, duga-duga nihimal̄aika Ngohi. Mä nako o huha iboa, Ngohi nanga nihiaho-ahoko la Toboa tinihihalamati ngini.

²⁸Kiaka yaika hagala niagomanga niadodiaiuku gënanga? Nako naga o huha niahuloko ënanga inihihalamati ngini, nako ënanga yakunu! Hei Yehuda, hagala niagikiri mangöe imatero de hagala nia kota!

²⁹Okia ngini niasanangiua mangale Ngohi hiädono ngini nihilawani Ngohi?

³⁰Parasumadika Ngohi tinihukumu ngini, hababu ngini nioluku niatarima o dodaaere. Hokä o singa magogiriaka ikinïki ingamo, hokogenangoli niatoma hagala nia nabi.

³¹Hei Israel manyawa, nihigihene Ahi demo-demo nënanga. Mamoi iböto Ngohi hokä o tonaka ikokakaha mangale ngini ekola o tonaka mahohuhutu? Mä yadodoaho ngini nitemo ngini nimau nibebasi, deʼ niolukoka nimaidulu Ngohino?

³²Boteka naga o moholehe mawohanga ami poromu, ekola o ngoheka mokawi-kawingi mawohanga ami kawingi mabaju? Mä ngini duru madekanoka nihiwohanga Ngohi — imulaenge madekana hakunua haetongo.

³³Ngini igoungu nisawaro niatatoro madodagi la manga hininga nia l̄ë hagala niä haya-hayangi. O ngoheka manga röehe yahuku-hukunu duru yonö naka-nakali ma kaimä dotokohi nginika!

³⁴Ani pakeanga inoda deo mihikini manyawa manga awunu deʼ o nyawa yahowo-howonua, koyotohi-tohikua yatago-tagoko manga awunu. Ngaro, hoko gënanga,

³⁵ngini niato ngini niahowonua, Ngohi tinïngamo okaua nginika. Mä Ngohi, ma Jou, aha tinihukumu ngini, karana ngini nioluku nimangaku ngini niahowono.

³⁶Duru itaiti ngini nioiki o hoana deo berera mahomoa manga gikirika la nigahoko o roriwo! Ngini maraioka aha o Mesir yadiai niahininga yadaene imatero hokä o Asyur yadiai niahininga yadaene.

³⁷Ngini aha niamal̄a o Mesir de niahininga yadaenua deʼ inï mal̄eke. Ngohi, ma Jou, tätilaka önanga ngini niä ngano-nganono; ngini aha niamake o kia-kiaua mautumu onangino.”