Read Tobelo O YEREMIA 20 Bible Online

O YEREMIA 20 - Tobelo bible

O YEREMIA 20

¹Ma Imam Pasyhur o Imer aingohaka ganga ma Jou Ai Tau yogoa-goana manga häeke. Maöraha ünanga woihene tohingahu o hali gënanga mata-mata,

²ünanga wahipareta hupaya ngohi ihi gohara deʼ ihibui o Benyamin ai Ngorana ma Amo-amokoka, o ngorana ma amo-amoko i l̄oku-l̄oku ma Jou Ai Tauoka.

³O ngorumino moioli yaino ma imam Pasyhur wohihihupu o buioka deipaha, ngohi tïtemo unangika, ”O romanga aha ma Jou wonihidöaka ngonaika o Pasyhurua, ma ’O Huru-hara okiaika honanga’.

⁴Ma Jou mahirete wotemo, ’Ngona aha Tonihidadi o huru-hara anidirika mahirete deʼ anidodiawoika. Ngona aha namake toönanga manga haturu yätoma önanga. Mata-mata o Yehuda manyawa aha Tamal̄aika o Babel ma koano wäkuaha; önanga o hidoku moi aha yätoraka o Babelika hokä o dagokino, deʼ mahouohi aha yätoma.

⁵Toönanga manga haturuö aha Tamal̄aika yäora de yätoraka o Babelika mata-mata o kota nënanga manga kaya, inoli mata-mata manga arata, maboboloi o Yehuda ma kokoano manga bara-baranga o puhaka.

⁶Deʼ ngona, kamamoi ningodumu de ani roriadodoto aha initagoko deʼ ini toraka o Babelika. Dokengoka ngona aha nohonenge deʼ inilungunu; hokogenangoli ani dodiawo mata-mata ihi gihe-gihenoka hagala anitengeluku.’ ”

⁷Jou, Ngona nohi baja ngohi deʼ ngohi nohingakunoka. Ngona iholoi nokuata de ngohi deʼ ngohi tonipoaua. Moi-moi o nyawa ihi hohedu ngohi, ihihikauku kao ngoruminohi hiädono o bimaoa.

⁸Ngohi totemo-temo magetongo, kokiani ngohi tomapoaka takua-kuatil̄e, ”O aniaya! O bodito!” Jou, ngohi ihi hohedu deʼ ihi hikauku o öraha ihi getongo, karana tohiädono Ahi behehongo.

⁹Mä nako ahi hininga magoronaka ngohi totemo, ”Mal̄aikala ma Jou tïwohangoka dika, tolukoka totemo-temo de Ai romanga,” done Ani behehongo hokä o uku mangaboho ahi hininga madol̄aka. Tohitailako toma totongohono mä inyata ngohi koiwa ahi kuaha.

¹⁰Toihene o nyawa imakokuhudu kiaka dika, ”O modongo ipaha-pahaua! Niaino ünanga hihingahu yokokuahaika!” Maboboloi mata-mata ahi dodiawo yototamä ngohi ihi otaka. Onanga yato, ”Mudukua deo bobaja, ünanga yakunu hiutumu, hupaya ngone hakunu habalahi o dorou unangika.”

¹¹Mä Ngona, ya Jou, naga dede ngohi; Ngona duru nokuata inoli noputurungu. Onanga ihïgoginïki deʼ ihituku-tuku ngohi aha yäotaka deʼ imangakunokaua. Onanga aha yamal̄eke kahiado-adonika, mata-mata önanga yatätatoroka idadiua. Toönanga manga hikauku gënanga aha salalu yöhihanga.

¹²Ma, ya Jou Duru Nokokuaha, de o adili Ngona näuji o nyawa, Ngona nohioriki manga hininga deʼ manga dibanga. Karana gënanga nohihigumal̄a ngohi tapulo-pulono Ngona nabalahi ahi haturu manga dorou hababu Ngonaika tohilapahi ahi perekara.

¹³Ninyanyi mangale ma Jou deʼ niwihigiriri Unanga hababu Unanga wälapahi o nyawa yätuku-tuku o nyawa madorou manga kuahaino.

¹⁴ Yakorona o lolai tomakokil̄au mawange! Mal̄aikala ihihikauku maoraha ngohi ayo mohi hingohaka.

¹⁵Yakoronali o lolai yoao-ao o abari yadiai ahi ama duru womorene, maöraha iwihingahu unangika, ”Ngona namake o ngohaka o nauru womatengo!”

¹⁶Mal̄aikala o abari woao-ao gënanga marupa hagala o kota wawö wede-wedere ma Jou mahayangi koiwa. Mal̄aikala ünanga woihene ogururihi mahiri maöraha o ngoru-ngorumino, deʼ o parangi maulili o wange ikokoronauku.

¹⁷Hababu ünanga wohitomaua ngohi maöraha ngohi kao mamata ma gorona okahi, hupaya ngohi kahirahi ngohi ayo ami mamataka deʼ ami mamata idadi ngohino hokä o lungunu.

¹⁸Yadodoaho ngohi kokiani ihihingohaka? Boteka duga-duga la tamao o huha deʼ o hangihara? Deʼ hupaya ahi wowango imapaha duga-duga kao mal̄eke magoronaka?