Read Tobelo O YEREMIA 21 Bible Online

O YEREMIA 21 - Tobelo bible

O YEREMIA 21

¹O Zedekia o Yehuda ma koano wähuloko ngohino ma Imam Pasyhur o Malkia aingohaka, deʼ ma Imam Zefanya o Maaseya aingohaka. Unanga wähuloko önanga ihingahu ngohino o gogahoko nënanga,

² ”Nogahoko o hidumutu ma Jouino mangale ngone, hababu o Nebukadnezar o Babel ma koano deʼ aitentara maduduono magogiria ihigilolitino tongone nanga kota. Mudukua ma Jou aha wodiai ihöhera-heranga mangale ngone, deʼ wïpakisa o Nebukadnezar wähigilio imadohuku aitentara maduduono.”

³De ma Jou wohitemo ngohino, daha ngohi tähuloko o nyawa wähulo-huloko gënanga

⁴ihingahu o Zedekiaika igoungu ma Jou, o Israel manga Jou Madutu, wotemo hoko nënanga, ”Zedekia, Ngohi aha tähohihanga anitentara manga duduono magogiriaka yoparangi iwilawani ma Koano Babel deʼ aitentara maduduono. Ani tentara manga dae aha Tatoporonil̄e o kota mahidödogoronaka.

⁵Ngohi mahirete aha tinïparangi ngini de Ahi kuata mata-mata deʼ Ahi dohata duru ikokiria.

⁶Yogögogere o kota nënanga aha Tätoma; kayaoa o nyawa kayaoa o aiwani aha nihonenge karana o bobaku o panyake nio modo-modongo.

⁷Ngona deʼ hagala anipegawe inoli hagala o nyawa yo ota-otana de o parangi, o habirokata, deʼ o bobaku o panyake, mata-mata Tamal̄aika ma Koano Nebukadnezar wätagoko deʼ hagala niahaturu yöigo-igo inïtoma. O Nebukadnezar aha winïtoma ngini mata-mata koiwa ma apongo deʼ koiwa mahayangi. Ngohi, ma Jou, totemoka.”

⁸Daha ma Jou wohihuloko ngohi totemo hoko nënanga Ai umatika, ”Ni ihene! Ngohi, ma Jou, tinihidöaka nginika moi o ngongiriki: o ngekomo yödumutu o ngango, ekola o ngekomo yödumutu o honenge.

⁹O nyawa yogögogere o kota magoronaka aha yohonenge karana o parangi, o habirokata, ekola o bobaku o panyake. Mä önanga yohöhupu-hupu la ima hidöaka o Babel ma nyawaika magogiriaka ihigilolitino o kota nënanga, aha yahirehene deʼ yätomaua.

¹⁰Ngohi taputuhoka la yakilianga o kota nënanga, deʼ koyodoraua. O kota nënanga aha ihilapahi o Babel manga koanoika; ünanga aha watuhuku hiädono imata-mataka kamamoiuku. Ngohi, ma Jou, totemoka.”

¹¹Ma Jou wohihuloko tohingahu o behehongo nënanga ma koano Yehuda ai tau madol̄aika, o Daud aidifauku: ”Ni ihene okianaga Ngohi, ma Jou, tahetongo. Nihidailako hupaya o adili nihidagi o wange ihigetongo. Nia hibebasi o nyawa yäora-ora, o nyawa yoora-ora manga kuahaino. Nako kowali, done o dorou nadodiai aha yadiai Ahi dohata i hiru-hiru hokä o uku yahohonenge yakunua.”

¹³De ipaha ma Jou watemo o Yerusalemika, ”Hei Yerusalem! Ani gogere iholoi ikurutil̄e de hagala o wai ani gilolitino. Ngona hokä o doporono o helewo itubuil̄e o tonaka marata-rataka, mä Ngohi tonilawani ngona. Ngona nato moiua yakunu iniparangi ekola yakilianga ani bebeno-bebeno o mehele,

¹⁴mä Ngohi aha tonihukumu ngona hababu ani manarama. Ani kadato aha Tatuhuku, deʼ hagala moi-moi ani higilolitino aha youku oli. Ngohi, ma Jou, totemoka.”