Read Tobelo O YEREMIA 22 Bible Online

O YEREMIA 22 - Tobelo bible

O YEREMIA 22

¹Ma Jou wohihuloko ngohi toiki o Yehuda manga koano ai kadatoika, o Daud aidifauku, la tohiadono ma Jou Ai behehongo ma koanoika, deʼ hagala ai pegaweika, inoli yogö gogere o Yerusalem. Nenanga ma Jou Ai demo-demo onangika.

³”Nidadi niadili deʼ nia hininga irikoto. Nia hibebasi o nyawa yaora-ora, o nyawa yoora-ora manga kuahaino. Uha niatuku ekola nidiai o dorou o nyawa o dagi-daginoika, o ngohaka o gohihi ekola o bobao. Uha niatoma o nyawa yahowo-howonua o ngï oka nënanga.

⁴Nako ngini igou-goungu niadiai hagala Ahi pareta nënanga, done o kokoano yopopareta hokä o Daud aha yöngohama o kadato mangorana ilolago-agomo nënanga. Onanga kamamoi de hagala manga pegawe deʼ toönanga manga kawaha aha yöbarenuku o kereta deʼ o kuda.

⁵ Mä nako ngini nioluku nihingounu hagala Ahi pareta done Ngohi tokoboto o kadato nënanga aha ikokilianguku. Ngohi, ma Jou, totemoka.

⁶Ngohino o Yehuda manga koano ai kadato duru ihailoa, mahailoa hokä o Gilead matonaka deʼ o Libanon mal̄oku; mä o ngï gënanga aha Tadiai hokä o tonaka ikokakaha yogö gogerua o nyawa.

⁷Aha Tohidingoto o nyawa la yakilianga. Onanga aha yoao o bahuku, deʼ yaruba maliate-liate ihöhailoa yadodiai de o Libanon ma liwewuru magota. De önanga aha ihikaweli o ukuika.

⁸Genanga deiböto o nyawa maporetino aha yakaino genangino deʼ imakeleha moi de moi yadoaho Ngohi, ma Jou todiaioka hoko gënanga o kota mahöhailoaika gënanga.

⁹Done o nyawa yohaluhu mata-mata gënanga idadi hababu ngini nihi pongonoka niajaji dede Ngohi, nia Jou Madutu, deʼ nia hubaka deʼ nipujioka hagala o gikiri mahomoaika.”

¹⁰O Yehuda manyawa, uha niduka mangale wohonenge ma koano o Yosia. Niwïgari dika o Yoahas aingohaka o nauru hababu ünanga iwi aoka woiki deʼ aha wolio okaua. Ai tonaka madutu aha kowamakeokaua.

¹¹ Mangale o Yoahas, o Yosia aingohaka o nauru, wodädadi o Yehuda ma koano wïtagali ai ama, ma Jou wotemo hoko nënanga, ”Unanga nenangokadau de woikoka, deʼ aha kowoliookaua.

¹²Unanga aha wohonenge o tabuanga mangïoka, deʼ aha kowamakeokaua o berera nënanga.”

¹³Yobodito o nyawa ihigoko-goko ai tau de koi adilua, deʼ yawoata de manga hininga irikotua. Wobodito ünanga wohö hulo-huloko yokarajanga de koiwa mahewa.

¹⁴Yobodito o nyawa yotö temo-temo, ”Aha tohigoko o kadato malamo-amoko deʼ makamari ilua-luasika daku i l̄oku-l̄oku il̄e,” daha o kadato gënanga majangela dema riwoto de o Libanon maliwewuru magota, deʼ macat madoka-dokara.

¹⁵Noihene, hei Koano Yoyakim! Nako ngona nohigoko o kadato de o Libanon maliwewuru magota duru irorahai, boteka gënanga manyonyata igoungu ngona o koano iholoi yaoa deo kokoano mahomoa? Abeika nomä hininga ani ama: Unanga wajame o ngango isosanangi deʼ wohasili hagala ai usaha magoronaka, hababu ünanga salalu worikoto deʼ ai hininga itiai inoli watailako o juruhakimoka o nyawa mihikini manga perekara dema adili. Itiai hoko gënanga kokiani yodiai o nyawa iwinö nako-nako ma Jou.

¹⁷Mä ngona o Yoyakim, hara moioli. Ngona duga-duga nolingiri ani utumu mahirete. Ngona nätoma o nyawa koiwa-iwa manga howono, deʼ nätuku ani kawaha dema hayanga koiwa.

¹⁸ Karana gënanga mangale o Yoyakim o Yehuda ma koano, o Yosia aingohaka o nauru, ma Jou wotemo hoko nënanga, ”Ai honenge aha komoiua yögari; koiwa aha yotemo, ’Adede, ahi dodiawo, adede!ʼ Koiwa yoduka ekola yopöaka, ’Hioko Jou Koano!ʼ

¹⁹O Yoyakim aha iwililiara deʼ iwihikaweli o Yerusalem mangorana ma amo-amoko maporetika, hokä o nyawa yadodiai o keledai mahonengika.”

²⁰Ma Jou watemo, ”Hei o Yerusalem nigögogere, nioiki o Libanon deʼ o Basanika, deʼ nipoa-pöaka dokengoka. Nima pöaka o Moab mal̄oku mabuturungoka, hababu mata-mata niadodiawo nima teke rorimoi yohihangoka.

²¹Ngohi totemoka nginika maoraha ngini naga kayaoa-oahi, mä ngini nioluku nihigihene. Itiai hoko gënanga nia kalakuanga mahiraino hiädono öraha nënanga; komaiwa ngini nimau nihingounu Ngohino.

²²Karana gënanga, niatutuda-tutuda aha yohihanga hokä o hidal̄oko yawuwu. Nia dodiawo nimateke rorimoi aha yätoraka hokä o dagokino, deʼ niakota ihikauku deʼ ihimal̄eke karana hagala nia dorou.

²³Ngini nigogere nimasosanangi o Libanon maliate o liwewuru magilolitino, mä aha nako initapal̄u o hangihara mahiri, ngini aha niamao o huha deʼ o hangihara hokä o ngoheka magogiriaka ami ngohaka ima kil̄au.”

²⁴ Ma Jou wïtemo ma Koano Yoyakhinika, o Yoyakim aingohaka o nauru o Yehuda manga Koano. ”Mangale Ngohi, o Jou Madutu to wango-wango Ngohi tohitotiaika ngaroko ngona hokä o ali-ali meterai Ngohino Ahi giama manirakino, ma ngona aha Toni huputu

²⁵deʼ tonihilapahi o nyawa nämodo-modongika deʼ yonahihu ini toma. Ngona aha Toni hilapahi o Nebukadnezarika o Babel ma koano, kamamoi de ani ngoha-ngohaka.

²⁶Ngona deʼ ngoni ayo aha Tinï umo o bereraika niatonaka ma dutuua, deʼ dokengoka ngini aha nihonenge.

²⁷Ngini aha duru kanio hohininga o berera nënanga, ma ngini aha konilio okaua.”

²⁸Ngohi o Yeremia totemo, ”Boteka ma koano Yoyakhin wodadioka hokä o bohoko mabooteke yaumo yöigo okaua? Genanga doka mahababu ünanga deʼ aingoha-ngohaka yäduhu deʼ yäumo o bereraika önanga yanö nako-nakoua?”

²⁹Hei ahi berera, nohigihene okianaga ma Jou waheto-hetongo,

³⁰”O nyawa gënanga ihi tantuoka la ihihanga aingoha-ngohaka deʼ salalu okia-kiaua wakunu wadiai ai ngango magoronaka. Aidifauku koiwa naga aha yohasili yopareta o Yehuda madaeraka hokä ma koano o Daud aidifauku Ngohi, ma Jou, totemoka.”