Read Tobelo O YEREMIA 24 Bible Online

O YEREMIA 24 - Tobelo bible

O YEREMIA 24

¹ O öraha moiuku ipahaika o Yoyakhin o Yoyakim o Yehuda manga koano aingohaka o nauru kamamoi de o pegawe-pegawe o popareta, yolöleleani deʼ yososawaro yokarajanga ma Nebukadnezar o Babel manga koano wätoraka, deʼ wäso hokä o dagokino o Yerusalemoka deo Babelika, ma Jou wohidöaka okianaga moi tamö make-make ngohino. Ngohi tamake o karaja o gahumu hinoto madol̄a o ara mahohoko ikelengauku ma Jou Ai Tau mahimangoka.

²O karaja madodihiraka madol̄a o ara mahohoko marorahai, hokä o ara mahohoko madomoro, enahioko o karaja mahinotoka o ara mahohoko mabounu mamela-mela, hiädono yakunua yaol̄omo.

³Daha ma Jou wohitemo ngohino, ”Yeremia, okia ngona namake?” Ngohi tohaluhu, ”O ara mahohoko Jou. Marorahai duru irahai, deʼ mabounu ma mela-mela duru mamela hiädono yakunua ya ol̄omo.”

⁴De ma Jou wohitemoli,

⁵”Hagala o nyawa Tahi gogumal̄aka yätoraka o Babel ika gënanga Täpulono önanga hokä o ara mahohoko marorahai nënanga; karana gënanga Ngohi ma Jou, o Israeloka manga Jou Madutu, aha önanga tahidodiai.

⁶Ngohi aha tägoana önanga deʼ täao önanga yolioli o bereraino nënanga. Ngohi aha tahigokoil̄e, tärubaua önanga; Ngohi aha tadatomo, tärahukua önanga.

⁷Ngohi aha tahidöaka onangika o ngigo la yomangarati Ngohi nanga ma Jou. Done önanga aha yodadi Ahi umati, deʼ Ngohi aha idadi toönanga manga Jou Madutu, karana önanga aha yolioli Ngohino de manga hininga magahumu.

⁸Mä o Zedekia o Yehuda manga koano, kamamoi de manga popareta yotigi-tigika dede ünanga, deʼ mahou o Yerusalem manyawa kahirahi yogogere o bereraka nënanga aha imatagali o Mesirika, önanga aha mata-mata Tahidiai hokä o ara mahohoko imömela-mela nënanga, koyakunua yaol̄omo. Ngohi, ma Jou, totemoka.

⁹Ngohi aha taboditoönanga hoko gënanga marupa hiädono hagala o hoana deo berera o dunia yamode-modekika idadi kayo hawa-hawanika. Kiaika dika önanga tahigerewotoönanga aha yähohedu, yodadi o gie-giete mangï de o hohedu. Toönanga manga romanga aha yapake hokä o lolai.

¹⁰Ngohi aha tadotagao onanguku o parangi, o habirokata, deʼ o bobaku o panyake hiädono önanga mata-mata yohonenge deʼ komoiua naga yogogogere o bereraka nënanga Tahidoa-doakoka onangika deʼ toönanga manga ete de manga tohoraika.”