Read Tobelo O YEREMIA 25 Bible Online

O YEREMIA 25 - Tobelo bible

O YEREMIA 25

¹ O taongo maiatoka ipahaika o Yoyakim o Yosia aingohaka o nauru wodadi o Yehuda ma koano, ngohi tamake o behehongo ma Jou ino yakorona o Yehuda manyawa yongodumu. O öraha gënanga ma taongo madodihiraka ipahaika o Nebukadnezar o Babel manga koano.

²Ngohi tätemo o Yehuda manyawa deʼ o Yerusalem yogögogerika,

³”Madekana o taongo monaoko de hanga aipareta o Yosia o Amon aingohaka o Yehuda mabereraka, hiädono o wange nënanga ma Jou wotemo-temoka ngohino deʼ komaiwa ngohi toalipa tohiadono nginika okianaga Waheto-hetongoka. Mangini nihaduliua.

⁴Ma Jouö itoa-toakua wahuloko nginika o nabi-nabi Ai gilaongo, mangini nioluku niahigihene deʼ nialegaikaua önanga.

⁵Onanga inihuloko ngini niamal̄a niawowango itotorou madodagi, deʼ hagala niamanarama iböbaradoha, hupaya ngini yakunu kahirahi nigogere o bereraka nënanga wini hidoa-doakoka ma Jou nginika deʼ nia ete de nia tohoraika hokä niapuhaka.

⁶O nabi-nabi gënanga inï higumal̄aua ngini niahuba deʼ nipuji o gikiri mahomoaika. Onanga inï higumal̄aua ngini niahuba hagala o gomanga ngini niadodiai, hababu o hali gënanga yadiai ma Jou wongamo. Nako ngini niamoteke ma Jou Ai pareta gënanga, Unanga winï hukumua ngini.

⁷Mä ma Jou mahirete wotemo ngini niwihigihenua Unanga. Ngini kaidogo niatumomiki Ai dohata karana hagala niagomanga gënanga. Ngini mahirete niodotagao Ai hukumanga nia diriuku.

⁸Karana ngini nioluku nihigihene Ai demo-demo, ho ma Jou Duru Wokokuaha wato,

⁹’Ngohi aha tä ahoko hagala o hoana deo berera o koremieil̄e, deʼ Ahi gilaongo, o Nebukadnezar o Babel manga koano. Onanga aha tatoomu la yäparangi yälawani o Yehuda deʼ yogögogere ikali hagala o hoana deo berera yakokilolitino, o Yehuda manyawa kamamoi de hagala o hoana deo berera imakokadatekuku aha Täbinaha deʼ Tämal̄aika yowede-wederuku kahiado-adonika. Hagala o nyawa yamö make-make aha yatodokana deʼ yamao yäporohono. Ngohi, ma Jou, totemoka.

¹⁰ Toönanga manga ilingi kayo more-morene deʼ o kawingi marameanga aha Tohigumal̄aokaua. Onanga aha koiwa manga minya mangale manga hilo, deʼ toönanga manga gandum aha imata-mataka.

¹¹ O berera nënanga yamode-modekika aha tamal̄aika iwedere deʼ idadi kai rïdika. Hagala o hoana deo berera yakokilolitino aha imagilaongo ma koano Babelika o taongo mori tumidi madekana.

¹²Genanga ipahaika Ngohi aha tähukumu o Babel manyawa de manga koano karana toönanga manga baradoha. O Babel maberera aha Takilianga deʼ Tamal̄aika iwedere kahiado-adonika.

¹³O Babel aha Tahukumu deo bodito mata-mata Tödato-datoroka mangale hagala o hoana deo berera deʼ Tohingahu-ngahuoka itilakuru o Yeremia enagënanga o bodito yatö tuli-tulihi o buku nënanga magoronaka.

¹⁴Hagala o Babel manyawa manga manarama aha Tabalahi; önanga aha o kokoano yolago-agomo de mangöe o hoana deo berera imagilaongo.’ ”

¹⁵Ma Jou, o Israeloka manga Jou madutu wohitemo ngohino, ”Nal̄ë o angguru magalahi nënanga Toguhe-guheukuoka de Ahi dohata ma angguru. Nao o hoana deo bereraika kiaika ngona Tonihuloko, deʼ nahuloko önanga yaokere o angguru nënanga.

¹⁶Nako önanga yaokere, önanga kayo lebo-leboto deʼ ihihanga manga akali karana o parangi Tädotagao onangika.”

¹⁷Ho ngohi tatarima o angguru magalahi gënanga ma Jou Ai giamino, deʼ toiki o hoana deo bereraika kiaika ma Jou wohi hulo-hulokoka ngohi, daha ngohi tadiai önanga yaokere o angguru gënanga.

¹⁸O Yerusalem deʼ mata-mata o kota o Yehuda madaeraka kamamoi de manga kokoano de mapopegawe, tahidöaka yaokere o angguru gënanga, hiädono önanga yodadi hokä o tonaka ilua-luasi itotoongoro deʼ höboborohono. Hiädono o wange nënanga toönanga manga romanga yapake hokä o lolai.

¹⁹Nenanga doka manga roma-romanga o nyawa mahomoa kokiani yaokere ma Jou Ai angguru magalahino gënanga: O Mesir ma koano de ai popegawe deʼ ai popareta mapegawe; mata-mata o Mesir manyawa deʼ o nyawa maporetino o Mesir matonakoka; mata-mata o koano o Us mabereraka; mata-mata o Filistin makota ma kokoano o Askelon, o Gaza, o Ekron mabereraka; mata-mata o nyawa kayo wango-wangohi o Asdod mabereraka; mata-mata o Edom manyawa, o Moab, deʼ o Amon; mata-mata o koano o Tirus deʼ o Sidon mabereraka; mata-mata o koano o Ngöto i Kokorona madaera o gahi madatekino; o Dedan makota, o Tema deʼ o Bus; mata-mata o nyawa manga tadauru yaguti yatotipoko; mata-mata o Arab ma koano; mata-mata o hoana imakoka ganuino manga koano yogögogere o tonaka ikokakahaka; mata-mata o koano o Zimri mabereraka, o Elam, deʼ o Madai; mata-mata o kokoano o koremieuku, magögurutika deʼ itigi-tigino imatengo-tengo. Hagala o hoana deo ber(...)

²⁷De ma Jou wohitemo ngohino, ”Nahetongo hagala o nyawaika gënanga Ngohi, ma Jou Duru Tokokuaha, o Israeloka manga Jou Madutu, wahuloko önanga yaokere hiädono yädaluku deʼ yowuna-wunanga. Tadiai önanga yoruba deʼ yakunokaua yomomikoli karana o parangi Tadödotagao onangika.

²⁸Deʼ nako önanga yoluku yatarima o galahi gënanga ani giamino la yaokere ma angguru, nahetongo ma Jou Duru Wokokuaha wohiparetaka o hali gënanga.

²⁹Ngohi aha tamulaenge o gilianga gënanga Ahi kotaka mahirete. Uha hiädono önanga yatobote önanga aha yähukumua. Onanga maraioka aha yahukumu karana Ngohi aha tadotagao o parangi o hoana deo bereraika o dunia mal̄okuoka yamode-modekika. Ngohi, ma Jou Duru Tokokuaha, totemoka.

³⁰Mata-mata totemo-temo ngonaika hei Yeremia, kokiani nohiadono. Nahetongo onangika, ’Ma Jou Ai ilingi igilaongo o horogauku; Ai gogere Itebi-tebinino Unanga womadotoreke wälawani Ai umati. O dunia manyawa yongodumu yoihene Unanga wopoaka hokä yokarajanga o angguru yoteo mabibidoro mangïoka.

³¹Hiädono o dunia mabatingika yoihene Ai ilingi ihaluhu; Ma Jou wodiai o perekara o hoana deo bereraika. Mata-mata o nyawa aha ya juruhakimi deʼ yatotorou aha yahukumu yahohonenge.’ ”

³²Ma Jou Duru wokokuaha wotemo, ”O dunia mabati-batingoka de yaino o rato maruruhu; o bodito yatapal̄u o hoana deo berera moi de moi.”

³³O wange gënanga hagala o nyawa manga maiyeti ma Jou watö toma-toma aha kai lüluluika o dunia mal̄okuoka ingodumu. Onanga aha yagariua, yagorakua ö mangale yalungunu, mä kayodogumal̄aika dika o tonakoka hokä o wal̄ë madoporono.

³⁴Hei tutuda-tutuda, hei ma Jou Ai umati magogoana-gogoana! Niari nima kua-kuatil̄e! Nima lülulu o kafo magoronaka, hababu maoraha iboaka ngini inïtoma, deʼ yö ota-otana aha hokä hibari-barihi. Ngini aha hokä o rube dema ija-ijaka itifa deʼ iwedere.

³⁵Ngini maraioka aha niotanua.

³⁶Ngini nitaiana deʼ niari de niahininga ihuha karana ma Jou Ai gangamo magoronaka wabinahaka niahoana ikali wawedere niaberera idame-dame gënanga.

³⁸Hokä o singa ihupu ma orikino, hoko genangö ma Jou wohupu mangale wahukumu Ai umati. O parangi madora de mahayanga koiwa deʼ ma Jou Ai gangamo yangalioka o berera nënanga idadi o tonaka makokakaha.